الدهب يتراجع.. شوف اللي بيحصل لأسعار المعدن الأصفر وتوقعات الأيام الجاية
يا ترى إيه اللي خلا سعر الدهب ينزل فجأة بعد ما كان بيكسب، هل الموضوع له علاقة بالدولار والرسوم الأمريكية، ولو معاك دهب دلوقتي تبيع ولا تستنى شوية؟
في الحقيقة، في تطورات مهمة حصلت في سوق الدهب، سواء محليا أو عالميا، والمعدن الأصفر نزل 25 جنيه في مصر، وسعر الجرام عيار 21 بقى 4615 جنيه بعد ما كان 4640، أما الجنيه الدهب، فنزل هو كمان حوالي 300 جنيه.
وعالميا، الأوقية فقدت 34 دولار، وبقت ب 3303 دولار بدل ما كانت فوق ال 3330، وده لعدة اسباب، أهمها هو الدولار الأمريكي اللي بيرتفع، ودلوقتي الأسواق كلها مستنية يوم الأربع الجاي لما أمريكا تعلن رسميا عن رسوم جمركية جديدة، وده عمل حالة قلق عند المستثمرين.
اما بقى عندنا في مصر، فالسوق لسه خارج من موجة مكاسب، لكن دلوقتي فيه ضغط من الدولار والفيدرالي الأمريكي بيقول مش هيخفض الفايدة قريب، فده بيقلل جاذبية الدهب.
وده هيحصل لان الدهب أصل آمن بس ما بيكسبش فوايد، ومع ارتفاع عوائد السندات الأمريكية، الناس بتسيب الدهب وتروح للأصول اللي بتجيب دخل.
لكن خلي بالي، في عامل تاني ممكن يقلب الموازين، وهو تهديدات الرئيس الأمريكي ترامب، واللي قال إن أي دولة تمشي ورا سياسات "بريكس" هيفرض عليها 10% رسوم إضافية، والكلام ده عامل حالة ضبابية في الاقتصاد العالمي، وده ممكن يدي دفعه للدهب تاني كملاذ آمن.
والكلام ده معناه، إن لو التوترات زادت أو حصل تصعيد تجاري، فالناس هترجع تجري على الدهب، والأسعار ممكن تطلع تاني.
ودلوقتي، الناس بتسأل نبيع دلوقتي ولا نستنى؟
الإجابة مش واحدة للجميع، لكن لو شاري من زمان وسعر الشراء أقل من دلوقتي بكتير، ممكن تستنى شوية وتشوف الوضع بعد محضر الفيدرالي يوم الأربع، اما بقى لو محتاج سيولة أو مش مرتاح من التذبذب، فالبيع دلوقتي مش خسارة كبيرة.
والخلاصة. هي إن الدهب بيعدي بمرحلة ش وجذب، الدولار قوي والفيدرالي متشدد، وفي نفس الوقت في توتر عالمي بسبب ترامب وبريكس، يعني ممكن الأسعار تنزل شوية كمان، وممكن ترجع تطلع لو حصل تصعيد سياسي أو اقتصادي كبير.
