إزاي مصر "هتصفر" ديونها الخارجية.. هل تتدخل مجموعة "البريكس"؟
هل مصر بدأت تحط خطة بديلة عشان تواجه قرار تأجيل صرف الدفعة الخامسة من صندوق النقد؟.. وهل فيه أزمة جاية؟.. ولا كل حاجة تحت السيطرة؟.. وإيه دور مجموعة البريكس في حل أزمة الديون؟
في وسط ظروف اقتصادية صعبة بيمر بيها العالم كله، مصر عندها تحدي كبير وهو ملف الديون، وبرغم إن صندوق النقد الدولي أجل المراجعة اللي كان المفروض يعملها ضمن اتفاق التمويل، الدولة لسه مكملة في خطتها علشان تواجه الديون وتقلل الضغط على الاقتصاد.
هنعمل إيه عشان نوفر عملة صعبة؟
الحكومة بتشتغل على كذا محور في نفس الوقت، أولهم إنهم بيركزوا على زيادة مصادر العملة الصعبة، زي الصادرات، والسياحة، وتحويلات المصريين من بره، وكمان جذب الاستثمارات الأجنبية، وبدأنا نشوف نتائج، زي ارتفاع إيرادات قناة السويس، وزيادة أعداد السياح بشكل واضح.
كمان مصر مش واقفة مستنية المراجعة، بالعكس، بدأت تنفذ إصلاحات داخلية زي ترشيد الدعم، وتحسين مناخ الاستثمار، وتوسيع الشراكة مع القطاع الخاص من خلال "وثيقة ملكية الدولة"، وده بيشجع المستثمرين إنهم يضخوا فلوس في مشاريع جديدة.
إزاي مصر هتقلل الضغط على الجنيه؟
علشان نقلل الضغط على الجنيه، مصر بتحاول تقلل من الاستيراد العشوائي وتركز على التصنيع المحلي، وده جزء من خطة طويلة المدى علشان نقلل الاعتماد على الخارج.
وطبعًا، الدولة ما نسيتش المواطن، بتحاول توازن بين الإصلاح الاقتصادي والدعم الاجتماعي، زي زيادة المعاشات، وتوسيع برامج "تكافل وكرامة"، وكل ده علشان تحافظ على الاستقرار الاجتماعي، يعني باختصار، حتى لو في تأجيل من صندوق النقد، مصر مش قاعدة مستنية، بالعكس، ماشية بخطوات سريعة ومدروسة علشان تواجه ديونها وتحافظ على استقرارها الاقتصادي.
هل البريكس ليه دور في حل أزمة الديون العالمية؟
مصر بتتطلع أن مجموعة "البريكس" يكون ليها دور أكبر في حل أزمة الديون اللي بتواجه دول كتير، وده مش كلامنا احنا، ده كلام وزير المالية أحمد كجوك، وقال إن البريكس ممكن تساعد في أفكار جديدة زي إن الدول تتحول ديونها لاستثمارات، يعني بدل ما نسدد فلوس بس، نستخدمها في مشاريع تنموية تفيد البلد.
وزير المالية المصري قال كمان إن لازم العالم يتحرك ناحية تنمية عادلة وشاملة، ومفيش دولة تبقى لوحدها، لازم الكل يشارك ويبقى فيه تنوع اقتصادي، عشان كل الدول تنتج وكمان "تصفر" ديونها، واللي أكد أننا محتاجين تعاون اقتصادي أكبر بين دول البريكس علشان نقدر نواجه الأزمات العالمية، لأن الأسواق الناشئة زينا اتأثرت جامد بزيادات الجمارك وعدم الاستقرار اللي بيحصل في العالم كله.
وزير المالية اقترح كمان أننا لازم نشتغل على أفكار تمويلية تكون سهلة وبسيطة علشان نقدر ننفذ مشاريع كبيرة، زي مشروعات البنية التحتية، والطاقة المتجددة، والتحول الرقمي، وقال إن البريكس تقدر يكون ليها دور كبير في تحقيق التوازن الاقتصادي العادل ما بين الدول.
ده غير أن مصر بتدعم الشراكة ما بين الحكومة والقطاع الخاص، علشان نوصل لأهداف التنمية اللي عايزينها، وكمان بنشجع تبادل الخبرات والتعاون بين دول البريكس في مواجهة التغيرات المناخية، وفي الآخر منصة الاستثمار الجديدة اللي أطلقتها البريكس تعتبر فكرة مبتكرة علشان تجمع فلوس من القطاع الخاص وتوجهها لمشاريع استراتيجية تفيد الناس والاقتصاد.
