موعد حجز شقق الإسكان الاجتماعي 2025.. زيارة مهمة لمصانع الغزل.. وارتفاع مفاجيء للذهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، موعد حجز شقق الإسكان الاجتماعي 2025، وزيارة مهمة لمصانع الغزل، وارتفاع مفاجيء للذهب.
والبداية من صندوق الإسكان الاجتماعي.. اللي بيستعد يفتح رسميًا باب التقديم في الإعلان التكميلي لمشروع سكن لكل المصريين 5.. واللي هيبدأ من يوم 8 يوليو 2025 ويستمر لحد 7 أغسطس.. التقديم هيكون بنظام التخصيص الإلكتروني العشوائي.
الصندوق بالفعل شغال حاليًا على تطوير الموقع الرسمي وبيجرب الأنظمة اللي هتستقبل الملفات والأوراق المطلوبة من الناس اللي هيتقدموا خلال الفترة دي.
كمان في فرصة أكبر للمواطنين اللي كانوا برا الأولوية في الإعلانات اللي فاتت.. بس بشرط إنهم يكونوا مستوفيين الشروط سواء من ناحية السن أو الدخل وكمان مايكونش عندهم شقق أو عدادات مرافق باسمهم.
الخبر المهم هنا كمان إن مقدم الحجز للوحدات هيكون 50 ألف جنيه، وده هيتسدد مرة واحدة من خلال مكاتب البريد المميكنة.. ولأول مرة التقديم هيكون من غير ما تشتري كراسة شروط.. لأن الصندوق هينزلها على موقعه الرسمي.. يعني مفيش داعي للزحمة على المكاتب.
ونروح لزيارة مهمة.. المهندس محمد شيمي وزير قطاع الأعمال العام، زار شركة دمياط للغزل والنسيج "دمياتكس" التابعة للشركة القابضة للقطن والغزل والنسيج.
بدأ شيمي الزيارة مع الدكتور أيمن الشهابي محافظ دمياط، بلقاء مع عدد من أعضاء مجلس النواب والشيوخ في المحافظة.. وكان حاضر كمان الدكتور أحمد شاكر العضو المنتدب التنفيذي للشركة القابضة، والمهندس جلال الدين سليمان العضو المنتدب لشركة دمياط، وعدد من قيادات الوزارة والمحافظة.
الوزير أكد إن اللقاء كان بهدف تعزيز التواصل والتكامل بين الحكومة والبرلمان.. والاستماع لآراء النواب بخصوص مشروعات التطوير اللي بتخدم على رفع كفاءة الأصول الإنتاجية للدولة وتحقيق تنمية متوازنة.
ونروح لسوق الصاغة.. النهاردة، أسعار الذهب ارتفعت في السوق المحلية حوالي 10 جنيهات على جميع العيارات، حسب آخر تحديث من الصاغة.
الارتفاع ده سببه الأساسي التوترات اللي بتحصل في الشرق الأوسط.. واللي زوّدت الطلب على الذهب كملاذ آمن.. كمان ضعف الدولار الأمريكي لأدنى مستوى ليه من شهرين خلّى الناس اللي معاها عملات تانية تشتري أكتر.
وسجل الذهب النهاردة الأرقام دي:
عيار 24 وصل لـ5300 جنيه.
عيار 21 سجل 4635 جنيه.
عيار 18 بـ3972 جنيه.
والجنيه الذهب سجل 37080 جنيه.
ونختم بخبر مهم من جهاز تنمية المشروعات.. المهندس باسل رحمي الرئيس التنفيذي للجهاز أكد إنهم حريصين على تقوية الشراكات الاستراتيجية مع مؤسسات تنموية عالمية.. خصوصًا اللي بتدعم تمكين الستات اقتصاديًا ومشروعات ريادة الأعمال النسائية.
الكلام ده جه في كلمة ألقاها رأفت عباس نائب رئيس الجهاز، خلال المؤتمر الختامي لبرنامج دعم المشروعات النسائية.. البرنامج ده كان بتمويل من الوكالة الفرنسية للتنمية وبدعم من شركة إنتراست للاستشارات.. واللي اشتغلت على تقديم التدريب والدعم الفني للسيدات المشاركات.
