طريقة التقديم على الإسكان البديل بقانون الإيجار القديم.. إيه الأوراق المطلوبة؟
سمعت عن الإسكان البديل للمستأجرين في قانون الإيجار القديم؟، لو إنت ساكن في شقة قديمة من اللي إيجارها بـ5 جنيه، وبتدفع أقل من تمن كوباية قهوة في الشهر، ركّز معايا كويس.. إزاي تقدر تقدم فيها؟.. وإيه الشروط والأوراق المطلوبة؟.
الحكومة دلوقتي فتحت باب التقديم على وحدات سكنية بديلة، وده مخصوص للناس اللي ساكنين في شقق إيجار قديم ومهددة بالإخلاء، أو المالك عايز يستردها.
طب ليه الحكومة بتعمل كده؟
لأنها عايزة توفق أوضاع الناس، وتدي فرصة للمالك ياخد حقه، وفي نفس الوقت المواطن اللي ساكن بقاله سنين مايتشردش، ودي فرصة حقيقية بدل ما تفضل في شقة حالتها تعبانة، ممكن تاخد شقة جديدة ومحترمة، وتبدأ صفحة جديدة.
خد بالك، فيه مادة مهمة جدًا في قانون الإيجار القديم الجديد اللي مجلس النواب وافق عليه بشكل نهائي، وهي المادة 8… المادة دي بتحط طريقة واضحة عشان الناس تقدر تنقل من الشقق القديمة لشقق تانية بشكل آمن ومن غير ما يحصل ظلم لحد، وكمان بتحافظ على حق المالك في ملكه.
طيب إيه اللي بتقوله المادة دي؟
إنه يحق للمستأجر الأصلي، أو أي حد امتد ليه عقد الإيجار (يعني حد من قرايبه اللي ساكنين معاه)، إنه يقدّم طلب للدولة ياخد وحدة بديلة، سواء كانت شقة سكنية أو محل أو مكتب، على حسب حالته، وده هيختار بين نظامين، يا إما إيجار بشروط جديدة، يا إما تمليك بالتقسيط.
طيب علشان تقدم وتاخد وحدة بديلة، لازم تعمل إيه؟
في شوية شروط بسيطة، بتقدم طلب رسمي بتقول فيه إنك عايز وحدة بديلة وتمضي على إقرار مكتوب إنك هتسيب الشقة القديمة، وهتسلّمها أول ما تستلم الشقة الجديدة اللي الدولة هتخصصهالك، كمان الحكومة قالت إن التخصيص هيكون بالأولوية للفئات اللي ظروفها أصعب، زي المستأجر الأصلي نفسه أو الزوج أو الزوجة أو الأب أو الأم اللي امتد ليهم عقد الإيجار، يعني الموضوع واضح وبطريقة منظمة، وبيحاول يظبط الأمور ما بين المالك والمستأجر، من غير ما يكون في حد مظلوم.
طب إيه الشروط عشان تاخد شقة بديلة؟
لو ناوي تقدّم على شقة بديلة من الدولة في قانون الإيجار القديم، فيه شوية أوراق لازم تجهّزها قبل ما تقدم، وهي صورة بطاقة الرقم القومي بتاعت المستأجر وكمان الزوج أو الزوجة وصورة من عقد الإيجار القديم اللي معاك ولو فيه مستند يثبت إن عقد الإيجار امتد ليك (زي لو كنت ساكن مع والدك أو والدتك)، جهّزه، ده غير إيصال مرافق حديث (كهربا أو مية) باسمك أو باسم المستأجر وإقرار مكتوب وممضي إنك موافق تسيب الشقة القديمة وتسلمها للدولة أول ما يتم تخصيص شقة جديدة ليك.
كمان لو معاك أوراق طبية أو اجتماعية تثبت إنك من الفئات الأولى بالرعاية (زي مرض مزمن أو دخل محدود)، قدمها، وطبعا طلب التخصيص الرسمي، وده بيكون على نموذج معيّن هتحدده الجهة المسؤولة عن التقديم.
