رسائل الرئيس السيسي للمصريين وسر التوجيهات الرئاسية للحكومة.. مهم خاصة لمحافظ المركزي في أبوجا.. ومفاجآت جديدة في طريق الاقتصاد المصري
المشهد الاقتصادي والمالي في مصر شهد أحداث مهمة جدا على مدار الايام والساعات الأخيرة.. ياترى ايه اللي حصل وإزاي مصر بتجري في طريق النمو وإيه التصريح الخاص من الرئيس السيسي للمصريين.
في الساعات الأخيرة حصلت حاجات مهمة في مصر ليها علاقة بالوضع الاقتصادي وأهمها كانت رسالة الرئيس السيسي للمصريين في ذكرىثورة 30 يونيو.. واللي خاطب فيها المصريين وقال فيها إنه حاسس بمشاكلكم وشغالين عليها.. وقال الرئيس فى كلمته :" الناس شايلة كتير.. ده حقيقي .. واللي شايفه المواطن على الأرض.. الدولة شايفاه كمان وبتتحرك عليه.
الحقيقة الرئيس السيسي قال بوضوح إن تخفيف الاعباء عن الناس أولوية قصوى للدولة مفيش حاجة اهم دلوقتي من إن المواطن يقدر يعيش ويكمل.. وأكد الرئيس إنه في وسط اوضاع صعبة حوالينا من كل اتجاه مصر بتحاول تحافظ على التوازن .. وبتحاول تشتغل على استقرار الأسعار وفتح أسواق جديدة وزيادة المعروض.
واتكلم الرئيس كمان عن الحاجات اللى بتنفذها الدولة وقال إن الدعم شغال والمبادرات شغالة في التموين والصحة والتعليم.. كمان فيه تحسين في المرتبات والمعاشات والدولة بتصرف وبتدعم وبتحاول..
الرئيس السيسي قال للمصريين إنه عارف إن التحديات كبيرة وان الطريق مش سهل بس الأهم إن فيه اعتراف بالضغط اللي الناس فيه وإن في تحرك لتخفيفه.. الرئيس قالها بصراحة الأعباء تقيلة بس احنا مش هنحيد عن هدفنا في وطن كريم..
من الأحداث الاقتصادية المهمة كمان كانت مهمة المصرفي الكبير حسن عبد الله محافظ البنك المركزي المصري في أبوجا بنيجيريا.
في الفترة الأخيرة حسن عبد الله محافظ البنك المركزي سافر الى العاصمة النيجيرية أبوجا .. مش بس كده .. ده راح نيابة عن رئيس الجمهورية نفسه .. عشان يحضر افتتاح الدورة الـ 32 للاجتماعات السنوية لـ بنك التصدير والاستيراد الإفريقي لعام 2025 .. وده معناه ان مصر بتحط كل ثقلها في إفريقيا .. وبتقول بصوت عالي: "إحنا هنا .. ومستقبلنا واحد".
الاجتماعات دي شارك فيها رؤساء دول إفريقية .. ومسؤولين كبار من الحكومات .. ومحافظي بنوك مركزية .. وقادة مؤسسات مالية .. ومستثمرين جايين من كل حتة في القارة. يعني تقدر تقول كده .. قمة مصغرة .. بس كلها اقتصاد وفلوس وتنمية.
حسن عبد الله أكد على حاجة مهمة جداً .. إن مشاركة مصر دي بتأكد على التزامنا الثابت بدعم التنمية الشاملة في إفريقيا كلها .. وتعزيز دور المؤسسات الإقليمية في مواجهة أي تحديات اقتصادية .. خصوصاً في ظل الدور الحيوي اللي بيقوم بيه بنك التصدير والاستيراد الإفريقي في تحقيق التكامل الاقتصادي والتجاري بين دول القارة. يعني من الآخر .. مصر بتشوف إن قوتها في قوة إفريقيا .. وتكاملنا الاقتصادي هو مفتاح النجاح لينا كلنا.
على هامش الاجتماعات .. حسن عبد الله ما اكتفاش بالمشاركة في الجلسات .. ده قابل كمان رئيس جمهورية الجابون بريس أوليجي أنجيما .. وقابل كمان الدكتور جورج إلومبي .. اللي تم انتخابه رئيس جديد لبنك التصدير والاستيراد الإفريقي .. ده مكانه مهم جداً .. لأنه بيجي بعد البروفيسور بنديكت أوراما اللي قعد 10 سنين في المنصب ده وعمل شغل كبير جداً. حسن عبد الله وجه تهانيه للرئيس الجديد .. وشكر أوراما على مجهوداته الجبارة. ده بيدل على عمق العلاقات المصرية الإفريقية .. وإن مصر حريصة على التواصل المباشر مع القادة الجدد والمؤثرين في القارة.
الموضوع ما وقفش عند كده .. محافظ البنك المركزي المصري عمل زيارة رسمية لمقر البنك المركزي النيجيري .. وده كان بناءً على دعوة من نظيره النيجيري أولايمي كاردوسو.. الاتنين قعدوا مع بعض وبحثوا سبل تعميق التعاون المشترك بين البنكين في مجالات كتير .. زي الاستقرار المالي .. ودعم الابتكار في التكنولوجيا المالية والتحول الرقمي .. وتوسيع آفاق التعاون على المستوى العابر للحدود. يعني مش مجرد كلام .. ده فيه خطط عمل واضحة لتعاون مالي وتكنولوجي بين أكبر اقتصادين في إفريقيا.
كمان حصل تطور سريع في ملف من الملفات الاقتصادية الهامة خلال الساعات اللي فاتت ودا بعد الكشف عن أرقام ومؤشرات اقتصادية جديدة وعلى سبيل المثال.
الربع التالت من السنة المالية 2024/2025 شهد مفاجأة اقتصادية مهمة.. معدل نمو الناتج المحلي وصل لـ 4.77%.. وده أعلى معدل ربع سنوي من سنة 2021 تقريبًا.. مقارنة بـ2.2% بس في نفس التوقيت من السنة اللي فاتت.. يعني باختصار.. الاقتصاد المصري رجع يتنفس تاني.
وشرحت الأرقام إن النمو الأخير كانت أسبابه كتيرة وكانت الصناعة التحويلية غير البترولية هي بطل القصة دي.. القطاع ده لوحده حقق نمو 16% في الربع ده.. وده تحول كبير بعد ما كان بينكمش السنة اللي فاتت .. صناعات كتير بدأت تنتعش بشكل واضح.. زي مثلاً: صناعة العربيات اللي قفزت بنسبة 93% الملابس الجاهزة 58% والمشروبات 34% و الورق 20% والمنسوجات 17%.
الطفرة دي في الصناعة مش بس انعكست على الإنتاج.. لأ كمان انعكست على الصادرات.. وده باين في قفزة صادرات السلع تامة الصنع اللي زادت بنسبة 12.7%.. وملف الملابس الجاهزة تحديدًا عامل شغل عالي.. حقق نمو في صادراته بأكتر من 23%.. وده بيأكد إن القطاع ده عنده مرونة وسرعة في التفاعل مع متغيرات السوق العالمي.
نيجي بقى للقطاع التاني اللي لعب دور مهم وهو السياحة.. قطاع السياحة حقق نمو 23%.. واستقبلنا حوالي 4 مليون سائح في الربع ده بس.. وعدد الليالي السياحية وصل لـ 41 مليون ليلة.. وده رقم كبير.
أما تالت قطاع في الترتيب فهو: الاتصالات وتكنولوجيا المعلومات.. القطاع ده بيكبر بسرعة جدًا وبقى واحد من أسرع القطاعات نموًا في مصر.
كمان عندك قطاعات تانية زي التشييد والبناء و الوساطة المالية والخدمات الاجتماعية زي الصحة والتعليم.. وكلها قطاعات ساهمت بشكل واضح في معدل النمو العام.
وده بيحصل في وقت العالم كله لسه بيواجه حالة من عدم اليقين الاقتصادي.. خصوصًا بعد التوترات الجيوسياسية اللي زادت مؤخرًا بسبب الحرب بين إسرائيل وإيران.
بس مصر قدرت تحقق التوازن.. بل ورفعت توقعاتها للنمو السنوي فوق المستهدف اللي كان 4%.. وبقى دلوقتي قرب الـ4.2% لأول 9 شهور.
واحدة من أهم الحاجات اللي ساعدت في الطفرة دي هي الاستثمارات الخاصة.. القطاع الخاص بدأ ياخد مكانه الطبيعي في الاقتصاد.. استثماراته زادت بنسبة 24.2% في الربع التالت.. وده بيمثل حوالي 62.8% من إجمالي الاستثمارات المنفذة (باستثناء المخزون).
