لو أنتي ربة منزل.. إزاي تاخدي معاش شهري من الحكومة؟
لو أنتي ربة منزل ومش بتشتغلي، ومفيش مصدر دخل ثابت، ممكن تاخدي معاش شهري من وزارة التضامن الاجتماعي، بس إزاي بتقدمي عليه؟.. وإيه الشروط اللي بتخليكي تاخدي المعاش ده؟ وإيه المميزات اللي هتاخدها الستات منه؟
رغم كل الأحداث اللي بتحصل وتصاعد التوترات الجيوسياسية، الدولة مبتنساش الست المصرية الأصيلة، ودايما بتقدر مجهودها وتعبها في البيت، والمفاجأة بقى أنها هتوفرلها معاش شهري، عشان تعيش حياة كريمة.
الستات بتسأل عن تفاصيل معاش ربات البيوت، وده بعد ما أتاح قانون التأمينات الاجتماعية الموحد رقم 148 لسنة 2019 تحول كبير في دعم الستات المصرية اللي ملهمش أي مصدر دخل.
طب إيه معاش ربات البيوت ده؟
المعاش ده بيسمح للمرأة غير العاملة الاشتراك في نظام التأمينات الاجتماعية اختياريا بدون ما يكون عندها وظيفة رسمية أو صاحبة عمل، وبيضمن ليها معاش شهري عند التقاعد أو في حالات العجز، وده بيكون نقلة نوعية في مظلة الحماية الاجتماعية بمصر.
طب إزاي تاخدي المعاش ده؟
القانون كشف كل التفاصيل وقال إن السيدة ممكن تدفع الاشتراك بنفسها، وحدد قيمته 207 جنيهات شهريا، وده بيعادل 7 جنيه بس كل يوم، وده اللي خلى الاشتراك متاح لمعظم ربات البيوت، ومحفظات القران الكريم والفئات غير العاملة اللي بتدور كل يوم عن ضمان دخل مستقر وده من غير ما تدخل في أي وظيفة رسمية.
طب إيه مميزات المعاش ده؟
المعاش ده من مميزاته أن الست بتقدم عليه بصفتها ربة منزل، من غيرما يكون فيه وظيفة أو تكون تبع أي جهة عمل، طب وشروطه إيه؟.. لازم يكون عمر الست ما بين 18 لـ45 سنة ولازم تدفع الاشتراك باستمرار من غير ما تقطع شهر واحد، ومتكونش السيدة مشتركة في أي نظام تأميني، كمان أن المدة القانونية للحصول على المعاش متقلش عن 180 شهر أي 15 سنة، ولا يسمح بصرف المعاش قبل استكمال مدة الاشتراك المحددة.
النظام التأميني للمرأة بيمنح السيدة معاش شهري بمجرد التقاعد أو في حالة العجز، كمان بيمتد لأسرتها في حالات الوفاة، وده بيأمن حياة أفراد الأسرة من الناحية المالية، وبيقلل من الحاجة للاعتماد على الآخرين أو الجمعيات الخيرية والمساعدات.
طب إيه الفايدة من القانون ده؟
القانون ده فرصة ذهبية للناس اللي معندهاش وظيفة أو شغلها مش مستقر وده بيعزز من استقلالهم المادي في المستقبل، خصوصا في الظروف الاقتصادية الصعبة اللي بنعيشها، واللي خلت كل أسرة تفكر كويس جدا أنه تضمن مصادر دخل متعددة وآمنة، وده ضمن سياسات الدولة لتوسيع قاعدة الحماية الاجتماعية وتمكين المرأة اقتصاديا، وده من خلال استهداف ربات البيوت والفئات غير المنتظمة في سوق العمل، عشان يكون عندهم مظلة تأمينية زي اللي بياخدها العاملين في القطاعين العام والخاص.
