تعمل إيه لو معاش تكافل وكرامة اتوقف فجأة؟.. خطوات مهمة عشان ترجع معاشك
تعمل ايه لو معاش تكافل وكرامة وقف فجأة ؟ وايه الخطوات اللى لازم تاخدها فورا؟ وايه أصلا الحالات اللى بيتم فيها ايقاف معاش تكافل وكرامة؟
معاش تكافل وكرامة ده من أهم البرامج الاجتماعية اللي بتقدمها الحكومة المصرية .. بيساعد آلاف الأسر إنهم يعيشوا حياة كريمة .. لكن ساعات بيحصل مشاكل ويقف المعاش فجأة .. والناس بتبقا مش عارفة ازاى ترجعوا
خلونا قبل ما نتكلم عن خطوات الإرجاع .. نعرف الأول إيه الأسباب اللي ممكن تخلي معاش تكافل وكرامة يتوقف .. ودي أهم الأسباب اللي بتيجي بسببها المشكلة دي:
أول سب هو تغيير في بيانات الأسرة .. لو حصل أي تغيير في عدد أفراد الأسرة .. زي مثلاً ولادة طفل جديد .. أو وفاة أحد أفراد الأسرة .. أو زواج أحد الأبناء .. لازم تبلغ الوزارة عشان البيانات تتعدل .. لو متعدلتش ممكن المعاش يقف.
تانى حاجة زيادة الدخل .. لو دخل الأسرة زاد عن الحد المسموح بيه .. سواء كان دخل ثابت من شغل جديد .. أو لو في أي ممتلكات أو مصادر دخل تانية ظهرت .. الوزارة بتوقف المعاش عشان تضمن إن الدعم يوصل للمستحقين بس.
وتالت حاجة عدم تحديث البيانات .. وزارة التضامن الاجتماعي بتطلب بشكل دوري من المستفيدين إنهم يحدثوا بياناتهم .. لو متحدثتش في المواعيد المحددة .. بيتم إيقاف المعاش تلقائياً ..
ورابع حاجة امتلاك حيازة زراعية أو سجل تجاري .. لو في أي حيازة زراعية كبيرة .. أو سجل تجاري نشط باسم رب الأسرة أو أي فرد فيها .. ده بيعتبر مؤشر على إن فيه دخل كافي .. وبالتالي ممكن المعاش يقف..
أما خامس حاجة فهي وجود سيارة أو عقار .. امتلاك سيارة حديثة أو عقار باسم رب الأسرة ممكن يكون سبب لإيقاف المعاش .. وكمان خروج الأبناء من التعليم .. لو الأبناء اللي بيستفيدوا من المعاش خرجوا من التعليم قبل سن 18 سنة .. ده بيخالف شروط تكافل .. وبالتالي المعاش ممكن يقف ..
دلوقتي نيجي لأهم جزء .. إزاي ترجع معاشك لو وقف؟
الموضوع مش صعب بس محتاج شوية خطوات تمشي عليها بالترتيب:
أول خطوة لازم تعملها هي إنك تروح أقرب مكتب شؤون اجتماعية تابع ليك .. وتسال هناك عن سبب إيقاف المعاش بتاعك .. هم هناك هيقولوا لك إيه السبب بالظبط ..و بناءً على السبب اللي هيقولهولك الموظف .. هتجهز المستندات اللي تثبت إنك مستحق للمعاش تاني .. يعني مثلاً لو المشكلة في البيانات .. هتجيب صورة بطاقة الرقم القومي بتاعتك وبتاعة الزوجة والأبناء .. وشهادات الميلاد الجديدة لو فيه أطفال اتولدوا .. أو شهادة وفاة لو فيه فرد توفى .. وهكذا ..
بعد ما تعرف السبب وتجهز المستندات .. هتقدم طلب تظلم في نفس مكتب الشؤون الاجتماعية .. الطلب ده بيكون ورقة رسمية بتوضح فيها إنك بتعترض على قرار إيقاف المعاش .. وبتشرح وضعك الحالي .. وبتدعم كلامك بالمستندات اللي جهزتها ..
وبعد ما تقدم التظلم .. لازم تتابع الطلب بتاعك .. ممكن تروح تسأل كل فترة في المكتب .. أو تتصل على الخط الساخن لوزارة التضامن الاجتماعي لو متوفر .. عشان تعرف وصلوا لإيه في طلبك ..
طلبك هيتحول للجان فحص في الوزارة .. اللجان دي بتراجع كل المستندات بتاعتك .. وممكن كمان تبعت باحثين اجتماعيين لبيتك عشان يتأكدوا من وضعك الاجتماعي والاقتصادي .. وبعد ما يخلصوا فحص .. هيتم إبلاغك بقرارهم .. لو وافقوا على طلبك .. هيتم إعادة صرف المعاش تاني .. وهتستلم كل المستحقات المتأخرة ليك .. أما لو رفضوا الطلب .. هيبلغوك بالسبب ..
ماتقلقش .. طالما أنت مستحق للدعم ده بجد .. وحالتك الاجتماعية والاقتصادية بتستاهل .. يبقى إن شاء الله حقك هيرجعلك .. المهم إنك تتحرك بسرعة وتتابع خطواتك.
