الذهب يتراجع والدولار ينهار.. سر الحركة العكسية في السوق العالمي
يا ترى ليه الطلب على الدهب قل فجأة، وإزاي الدولار الأمريكي كمان بيضعف، مش المفترض العلاقة بينهم عكسية لو واحد نزل التاني يطلع، ايه بالظبط اللي بيحصل؟
مع إننا متعودين إن وقت الأزمات الناس بتهرب للدهب كملاذ آمن، بس المرة دي الوضع مختلف شوية، وده لان الطلب على الدهب قل بسبب إن التوترات الجيوسياسية اللي بدأت تهدى شوية، خاصة في منطقة الشرق الأوسط، وكمان فيه أخبار عن اتفاقيات تجارية جديدة بين أمريكا والصين، وكندا كمان لغت ضريبة على شركات التكنولوجيا الأمريكية، وده هدى السوق كتير.
والكلام ده معناه باختصار، إن الناس بقت أقل توتر، فمش شايفين إنهم محتاجين يشتروا دهب ويخزنوه، وبالتالي الطلب نزل والسعر بدأ يضعف.
بس المفاجأة، إن رغم ده، الدهب رجع ارتفع تاني بعد ما لمس أدنى سعر ليه من شهر، وده بسبب حاجة تانية تماما، وهي ضعف الدولار.. طب يا ترى ليه الدولار نزل؟
الدولار الأمريكي بيقع اليومين دول لأنه فيه توقعات إن الفيدرالي الأمريكي هيبدأ يخفض الفايدة قريب، بسبب بيانات اقتصادية ضعيفة وضغوط من الرئيس الأمريكي نفسه.
ولما الفايدة بتقل، الناس بتسيب الدولار وتروح لأصول تانية زي الدهب والبورسة، وده بيخلي قيمته تنزل قدام باقي العملات.
ومن هنا نرجع للدهب، فضعف الدولار بيخلي الدهب أرخص على الناس اللي بتشتري بعملات تانية، فده بيخلي سعره يعلى شوية، حتى لو الطلب عليه نفسه قل كملاذ آمن.
يعني إحنا في موقف غريب شوية، التوترات بتقل فالناس مش عايزة دهب كتير، وكمان الذولار بيضعف فالدهب بيرتفع شوية تاني، زالمحصلة هي إن السوق في حالة شد وجذب، والأسعار رايحة جاية وبسرعة كمان.
عندك بردو، هنلاقي إن عقود شراء الدهب من المستثمرين الكبار قلت، وكمان عدد كبير منهم بدأ يراهن على انخفاض السعر، وده برضو سبب تاني بيقول لنا ليه الطلب قل.
أما على مستوى السوق المحلي في مصر، فالدهب عيار 21 بيتم التداول عليه حوالين 4590 جنيه للجرام بعد ما كان نزل امبارح، وده بسبب إن سعر الدولار قدام الجنيه كمان بدأ يضعف شوية، وده بيأثر فورا على تسعير الدهب عندنا.
والخلاصة هي أن التوترات بتهدى، والدولار بيضعف، وكمان الفيدرالي الأمريكي ممكن يخفض الفايدة، والنتيجة هي سوق مس مستقر، والدهب بيتأرجح بين العرض والطلب.
وفي النهاية، نقدر نقول للي بيفكر يشتري أو يبيع دهب، لازم يتابع الأخبار لحظة بلحظة، لأن كل عامل من دول ممكن يغير اتجاه السوق في أي وقت.
