سابت الهندسة واتفرغت للدهب وزوجها رجل أعمال.. صندوق أسرار أميرة الدهب
يا ترى إيه سر الشهرة الكبيرة لأميرة الدهب .. وازاى فى فترة صغيرة بقت حديث الناس في مصر والوطن العربي؟ .. وإزاي قدرت واحدة ست توصل للمكانة دي في عالم المعادن النفيسة؟
في شهور قليلة فاتوا .. اسم أميرة حسان الشهيرة بـ أميرة الدهب .. بقى على كل لسان .. فيديوهاتها اللي بتعرض فيها شغلها الذهبي بتنتشر زي النار في الهشيم على كل منصات السوشيال ميديا .. بس أميرة الدهب مش بتعرض شغل عادي .. دي بتعرض حاجات الناس مهتمة بيها وبتثير فضولهم.
بس إيه سر شهرة أميرة الدهب؟
أميرة الدهب ليها طريقة مختلفة ومميزة في عرض شغلها .. مش بتعرض دهب عادي وخلاص .. لأ دي بتركز على المشغولات الدهب التقيلة وغير التقليدية .. يعني ممكن تشوف عندهاطقم "كرسي جابر" .. اللي وزنه ممكن يوصل لكيلو دهب! .. تخيلوا كيلو دهب في طقم واحد؟ ..
أيفونات مطلية بالدهب .. آه زي ما سمعتوا كده .. موبايلك ممكن يبقى قطعة فنية من الدهب ..
أساور بتجسد أشكال حيوانات .. زي الأسد والتعبان وغيرهم .. شغل فني مبهر ومختلف عن أي حاجة ممكن تشوفها في محلات الدهب العادية ..التميز ده في الشغل هو اللي خلى الناس تتكلم عنها .. وتتشد ليها .. لأنها بتقدم حاجة جديدة ومختلفة.
طب بعيد عن شهرتها .. مين هي أصلا أميرة الدهب؟ وايه حكاية شغفها بالمعادن النفيسة؟
أميرة الدهب .. حكايتها ملهمة جداً ..من وهي طفلة صغيرة .. كانت بتعشق الدهب وأشكاله وأنواعه .. الشغف ده فضل يكبر معاها ..درست هندسة معمارية .. بس حبها للدهب كان أقوى .. وقررت تسيب مجال الهندسة وتتجه لشغلها اللي بتحبه.
بدأت رحلتها في عالم الدهب من حوالي 4 سنين بس .. يعني في 2020 .. وفي المدة القصيرة دي قدرت تعمل اسم لنفسها وتوصل لشهرة كبيرة جداً ..
هي صاحبة واحدة من أشهر سلاسل الدهب والمجوهرات في مصر والشرق الأوسط .. فروعها منتشرة في محافظات كتير.
أميرة متجوزة رجل أعمال .. وعندها ولدين .. وابنها الصغير بيظهر معاها دايماً في فيديوهاتها على السوشيال ميديا ..
ومش بس بتبيع دهب .. دي كمان بتطلق مبادرات كتير للعرسان والشباب عشان تسهل عليهم شراء دهب الفرح ..وبتقدم كمان نصايح مهمة جداً لأي حد بيفكر في الاستثمار في الدهب .. إزاي يشتري .. وإزاي يحافظ على فلوسه في الدهب ..
شهرة أميرة الدهب ماوقفتش عند حدود مصر .. فيديوهاتها وشغلها وصل لدول عربية كتير .. وبقت مصدر إلهام لكل اللي عايز ينجح ويعمل اسم لنفسه في أي مجال .. خصوصاً لو كان عنده شغف وحب للي بيعمله .. قولولنا .. مين فيكم بيتمنى يكون عنده طقم "كرسي جابر" ده؟ .. أو أيفون مطلي بالدهب؟
