“نمبر1” رفض 200 مليون في مسلسل واحد.. ثروة خيالية لمحمد رمضان.. بيكسب ملايين وهو نايم
ليه محمد رمضان رفض بطولة مسلسل بـ200 مليون جنيه .. هو فعلاً ثروته وصلت لأكتر من نص مليار جنيه.. ويا ترى بيكسب منين فلوس غير التمثيل.. وايه سر النجاح اللي خلاه دايمًا في الصورة حتى وهو مش في موسم رمضان.
محمد رمضان.. واحد من أكتر الفنانين المثيرين للجدل في مصر والوطن العربي.. سواء كنت بتحبه أو مش من جمهوره.. مفيش خلاف إنه عامل حالة.. وبيعرف يسوّق لنفسه كويس جدًا
ومؤخرًا رجّع الجدل للساحة تاني بعد ما رفض بطولة مسلسل بـ200 مليون جنيه.. آه.. الرقم صح.. 200 مليون.. بس هو طلع وقال بكل ثقة.. آسف مش هعمل المسلسل.. أنا مش موظف عند حد.
الناس بدأت تسأل.. طب الراجل ده مش ناوي يمثل.. وبيعتذر عن شغلانة بالمبلغ ده.. يبقى بيكسب منين.. وهنا بدأ الكلام عن ثروته واللي على حسب تقديرات مواقع اقتصادية زي "سيليبريتي نت وورث" و"فيميل ريتش ليست".. بتتراوح بين 15 لـ20 مليون دولار.. يعني بالمصري بنتكلم في حدود نص مليار جنيه.
طيب الفلوس دي جاية منين؟
رمضان مش بس ممثل.. ده مغني بيعمل حفلات في الخليج وأوروبا وأسعار تذاكر حفلاته أوقات بتوصل لـ2000 درهم للفرد.. ده غير الإعلانات اللي بيشارك فيها.. وآخرهم حملة كبيرة مع شركة اتصالات وكمان عنده قناة يوتيوب بتجيب ملايين المشاهدات.. والغريبة إن القناة دي بس بتدخل له أكتر من 2 مليون جنيه في الشهر من الإعلانات.
رمضان كمان بيحب يستثمر.. واشترى فيلا في الساحل وشقق في دبي.. وكلها استثمارات بتزيد من صافي ثروته.
ولو رجعنا شوية وافتكرنا عربياته اللي دايمًا بيحب يستعرضها.. هتلاقي إن بعضها بيتجاوز سعره 10 مليون جنيه للعربية الواحدة.
اللي بيخلي رمضان مختلف عن غيره إنه مش بيشتغل لمجرد الظهور.. هو بيختار خطواته بدقة.. حتى لو كانت مستفزة للبعض بس هو شايف إن النجاح محتاج مخاطرة.. وجرأة.. وصوت عالي.
فيا ترى هل محمد رمضان هيفضل في القمة من غير موسم رمضان؟ ولا الجمهور ممكن ينساه؟ وايه الجديد اللي بيحضّره بعد ما قال لأ لـ200 مليون؟
الأيام الجاية هتجاوب على كل الأسئلة دي.
