بعد توقف الحرب. إيه اللي هيحصل في أسواق الدهب الأيام الجاية؟
يا ترى إيه اللي بيحصل للدهب، ليه سعره نزل النهاردة، وهل دي فرصة للشراء ولا للبيع، وهل ممكن يرتفع من تاني؟
النهاردة أسعار الدهب نزلت جامد بعد الإعلان عن وقف الحرب بين إيران وإسرائيل، ودي حاجة خففت القلق شوية من التوترات الجيوسياسية، وطبعا، أول ما الدنيا تهدى، المستثمرين بيقللوا من شراء الدهب، وده بينعكس بشكل كبير على الأسعار.
وعندنا في مصر، أسعار الدهب كانت كالتالي بعد النزول، وهب: الجرام عيار 21 نزل حوالي 130 جنيه وبقى سعره 4690 جنيه، وعيار 24 سجل 5360 جنيه، وعيار 18 نزل ل 4020 جنيه، وبقى الجنيه الدهب بحوالي 37520 جنيه، وكمان الأونصة عالميا نزل لحوالي 3315 دولار بعد ما كان فوق 3360 دولار.
ومن هنا، الخبرا بيقولوا، إن الدهب بيتأثر دايما بالتطورات الجيوسياسية، وأي تهدئة بتحصل بين الدول الكبيرة بتخلي الطلب على الدهب يقل، وعشان كده بنشوف التراجعات دي.
كمان الأنظار دلوقتي كلها على جيروم باول، رئيس الفيدرالي الأمريكي، اللي هيتكلم قريب قدام الكونجرس الأمريكي، فالمستثمرين مستنيين يعرفوا هل البنك الفيدرالي هيفكر يقلل أسعار الفايدة قريب ولا لأ، وده ممكن يكون ليه تأثير كبير على سعر الدهب عالميا، لأن لو الفايدة نزلت فالمستثمرين بيسحبوا فلوسهم من الدولار ويحطوها في الدهب والعكس صحيح.
ولوؤ رئيس الفيدرالي الأمريكي، قال إن مفيش تخفيض قريب يبقى الدولار ممكن يقوى أكتر شوية، وده هيضغط على سعر الدهب فهينزل كمان، لكن لو فتح الباب شوية لاحتمال خفض الفايدة، ممكن نلاقي الدهب بيستعيد بريقه ويرجع يرتفع من جديد.
وفي النهاية، نقدر نقولك إن الدهب دايما حساس لأي خبر سياسي أو اقتصادي كبير، وبما إننا الأيام دي بنعيش أحداث سريعة على مستوى العالم، فالأسعار هتفضل رايحة جاية شوية لحد ما الرؤية تتضح.
كمان، ماتنساش إن التطورات الجيوسياسية زي اللي حصلت بين إيران وإسرائيل ليها تأثير كبير على المستثمرين، وأحيانا خبر واحد ممكن يقلب الموازين، فالنهاردة الدنيا هادية شوية، والدهب ريح، لكن بكرة ممكن يحصل حدث جديد يشعل الأسعار من تاني، فخليك دايما متابع السوق أول بأول.
