أزمة الدولار بتخلص والجنيه راجع تاني.. مفاجأة تحويلات المصريين بالخارج اللي هتقلب الموازين
خلال آخر 10 شهور تحويلات المصـريين العاملين بالخارج حققت قفزة تاريخية غير مسبوقة وارتفعت بمعدل 77.1% لتصل إلى نحو 29.4 مليار دولار.. فيا ترى إزاي في وسط الظروف الاقتصادية اللي بيعدي بيها العالم كله المصريين في الخارج يسجلوا رقم تاريخي في التحويلات ويوصلوا لـحوالى 30 مليار دولار في 10 شهور بس؟ وإزاي الحكومة قدرت ترجع الثقة في البنوك والمصارف بعد سنين من الفتور؟ وايه تأثير القفزة دي على الدولار في السوق؟ وايه اللي اتغير السنة دي وخلى الناس ترجع تبعت فلوسها بشكل رسمي مش في السوق السوداء؟
في مفاجأة اقتصادية قوية.. البنك المركزي أعلن عن قفزة تاريخية في تحويلات المصريين العاملين في الخارج.. الرقم وصل لـ29.4 مليار دولار من شهر يوليو 2024 لحد إبريل 2025.. يعني في عشر شهور بس.. المصريين حولوا 13 مليار دولار زيادة عن نفس الفترة السنة اللي فاتت نسبة الزيادة وصلت لـ77.1٪.. والأقوى كمان إن الفترة من يناير لإبريل بس.. سجلت 12.4 مليار دولار بزيادة 72٪ عن السنة اللي فاتت.
يعني كل المؤشرات بتقول إن في حاجة كبيرة اتغيرت.. المصريين في الخارج رجعوا يثقوا في النظام المصرفي.. والبنوك رجعت تكون الملاذ الأول مش السوق السوداء.
بس السؤال هنا.. إزاي ده حصل؟
ببساطة.. الدولة خلال الشهور اللي فاتت لعبت على كذا محور.. أول حاجة.. رفع سعر الصرف الرسمي للجنيه قدام الدولار خلّى الفرق بين السوق الرسمية والسوق الموازية يقل .. وده شجع الناس تبعت فلوسها عن طريق القنوات الشرعية.
تاني حاجة.. البنوك المصرية بقت تقدّم خدمات تحويل مريحة وسريعة.. وكمان بدون تعقيدات زي زمان.. وفيه كمان شهادات استثمار خاصة بالمصريين في الخارج بعائد دولاري عالي.. وده زوّد الجاذبية.
تالت نقطة.. الاستقرار النسبي في السوق وسعر الدولار.. وغياب الأخبار السلبية عن قيود على التحويلات خلى الناس تحس إن فلوسها آمنة.. وإن التحويل الرسمي أفضل مليون مرة من لف ودوران السوق السودا.. وده خلّى كتير من المصريين اللي كانوا بيحوّلوا عن طريق شركات صرافة أو وسطاء يرجعوا للبنوك.
وفي نفس الوقت.. الدولة اشتغلت على حملات توعية للمغتربين .. وأكدت فيها على أهمية التحويل الرسمي في دعم الاقتصاد.. وإن ده بيساعد في تقليل الاعتماد على الاقتراض وزيادة الاحتياطي.
والأهم.. إن الدولة بقت بتسمع للمصريين في الخارج بتحاول تفهم مشاكلهم وتقدم حلول.. سواء في الإجراءات أو في المنتجات البنكية.
طيب.. ايه أهمية الرقم ده؟ وليه أصلاً الناس بتركّز عليه؟
تحويلات المصريين في الخارج من أهم مصادر العملة الصعبة في مصربتيجي بعد السياحة والصادرات.. وممكن في سنين معينة تتصدر الترتيب كمان
كل دولار بيدخل رسمي بيساعد في دعم الجنيه وتقليل الضغط على سوق الصرف بيخلي الدولة تقدر تموّل وارداتها بشكل أفضل.. ويدّي ثقة للمستثمرين في الاقتصاد المصري.
وكل ما التحويلات زادت.. كل ما السوق استقر أكتر.. وكل ما التضخم قل لأن سعر الدولار بيتحكم في حاجات كتير من الأسعار.
يعني القفزة اللي حصلت مش مجرد رقم حلو في بيان البنك المركزي .. ولكن هي مؤشر حقيقي إن الناس بدأت ترجع تثق.. وإن السياسات المالية بدأت تؤتي ثمارها.. والتحدي دلوقتي إن الدولة تقدر تحافظ على الثقة دي.. وتكبر الرقم أكتر.. وتفتح قنوات جديدة.. وتحفّز المصريين في الخارج على الاستثمار مش بس التحويل.
