بـ17 ألف سفينة.. إزاي مصر تحولت لغول لوجستي في الشرق الأوسط؟
اللي مصر عملته في قطاع النقل والمواني، بقى بيحكي ويتحاكى بيه العالم كله، وايه اللي خلى مصر غول لوجستي في الشرق الأوسط.. وإيه الفوايد اللي بتجنيها مصر من مرور واستقبال السفن ؟.. وإيه حجم الإيرادات السنوية من عبور السفن والبضايع؟.. وإزاي مصر قدرت تجهز البنية التحتية لاستقبال السفن العملاقة؟..
من ساعة ما الرئيس السيسي أطلق رؤيته لبناء الجمهورية الجديدة، وعجلة العمل مبتوقفش لحظة واحدة، وده في كافة أنحاء الجمهورية لتنفيذ مشروعات عملاقة في كل المجالات، عشان تقدر تحقق مصر من خلالها التقدم والتنمية، وعلى رأسها مشروعات النقل اللي كان ليها النصيب الأكبر.
الموانئ العملاقة من أهم مشروعات البنية الأساسية اللي اتنفذت في عهد الرئيس السيسي وبقت من أهم أدوات قوة مصر في عالم التجارة الدولية ورفع من أسهم مصر كدولة استراتيجية في العالم وده بسبب موقع مصر الجغرافي والفريد واللي بيربط بين قارات آسيا وإفريقيا وأوروبا، ده غير طبعا وجود قناة السويس اللي بتعتبر أحد أهم الممرات البحرية في العالم.
لحد دلوقتي مصر استقبلت حوالي 17 ألف سفينة خلال سنة واحدة..، وده رقم قياسي كبير جدا محدش يقدر يعمله غير المصريين، وده بفضل البنية التحتية العظيمة اللي عملها الرئيس عبد الفتاح السيسي، وده في إطار الخطة الشاملة لتطوير وتحديث منظومة النقل من عام 2014 لحد 2024، واللي كلفت مصر حوالي 2 تريليون جنيه، منها بس 129 مليار جنيه لتطوير المواني البحرية، و15 مليار جنيه للمواني البرية والجافة والمناطق اللوجستية.
إيه اللي خلى الطلب على مصر بالطريقة دي؟
موقع مصر الجغرافي كان ليه الفضل الكبير بجانب وجود أهم ممر ملاحي عالمي وهو قناة السويس، وده خلى مصر كمحرك للتجارة العالمية واللوجستيات، كمان مصر خلقت ممرات لوجستية دولية تنموية متكاملة لربط مناطق الإنتاج "الصناعي والزراعي والتعديني والخدمي" بالمواني البحرية، بوسائل نقل سريعة وآمنة بالمواني الجافة والمناطق اللوجستية المتكاملة.
طيب إيه خطة مصر الفترة اللي جاية في ملف الموانئ؟
مصر عملت حواجز أمواج بأطوال 15 كيلو وتعميق الممرات الملاحية لتستوعب المواني مليون طن سنويا، بدلا من 185 مليون طن.. و40 مليون حاوية مكافئة سنويا بدلا من 12 مليون، ده غير 10 مليون حاوية ترانزيت و30 ألف سفينة عملاقة سنويا.
طب إيه اللي وصل مصر للمكانة دي؟
الدولة عملت في السنين اللي فاتت، بنية تحتية متكاملة للنهوض بقطاع النقل البحري، وده خلى مصر تتداول أكتر من 208 ملايين طن من البضايع في عام 2024، مسجلة زيادة بنسبة 15%، سواء واردات أو صادرات أو ترانزيت، وده كان من خلال 16221 سفينة، وبتستهدف مصر أنها توصلهم لـ370 مليون طن بحلول عام 2030.
مش بس وكده، ده الحاويات بتستحوذ على النصيب الأكبر من حركة التداول بنسبة 6.8%، عشان كده مصر كانت بتمتلك 6 محطات للحاويات في عام 2022، لكن دلوقتي تم إضافة 6 قطاعات كمان حديثة في معظم المواني، وده بيعزز من قدرتنا الاستيعابية.
اكيد كمان حضراتكم فاكرين يوم تدشين "الرورو".. وظا خط ملاحي شغال بين دمياط إلى ترييستي الإيطالية بموجب اتفاقية ثنائية بين شركة بان مارين لخدمات الشحن وشركة DFDS الدنماركية.
ده غير أن خدمة "الرورو" الأسبوعية بين مصر وإيطاليا، بتقدم جسر بحري حيوي عبر ترييستي الإيطالية، وده بيضمن سرعة وكفاءة النقل، والهدف منه أنه بيحسن وقت تسليم المنتجات الزراعية والطاز، وتوسيع التغطية الجغرافية اللي وصلت لـ أوروبا والمملكة المتحدة، والدول الاسكندنافية، ده غير أنه أسرع بمرتين من خطوط الشحن التقليدية، يعني مثلا الرحلة من القاهرة لـ ميونخ بتاخد أقل من 6 أيام مقارنة بأكثر من 12 يوم عن طريق الحاويات.
