770 مليون دولار زيادة في الاحتياطي النقدي لمصر.. شوف السر ورا الزيادة
يا ترى إيه سر زيادة الاحتياطي النقدي عندنا في الفترة الأخيرة، ويعني إيه أصلا احتياطي نقدي، هل هو مهم أوي للاقتصاد، وإزاي هينعكس بشكل إيجابي على حياة المواطن البسيط؟
في الفترة الأخيرة، البنك المركزي المصري أعلن بشكل رسمي، إن صافي الاحتياطي النقدي عندنا وصل في نهاية مايو ل 48.53 مليار دولار، وده معناه إن في شهرين بس، الاحتياطي زاد حوالي 770 مليون دولار..
ولو حضرتك ماتعرفش يعني إيه احتياطي نقدي، فهو مخزون أو حصالة من الفلوس أو للعملات الأجنبية اللي موجودة في حوزة البنك المركزي، زي الدولار واليورو والين الياباني واليوان وغيرها، واللي سجلت في شهر مارس اللي فات برضو، زيادة ب 364 مليون دولار، وأبريل ومايو كان في زيادة برضو.
والكلام ده معاناه، إن البنك المركزي المصري بيتبع سياسة نقدية رشيدة، وبرنامج إصلاح اقتصادي ناجح، وده رغم الظروف الاقتصادية الصعبة اللي بيمر بيها العالم.
كمان، الاحتياطي النقدي ده بيكون مؤشر مهم لقوة الاقتصاد، وبيعكس قدرة الدولة على استيراد السلع بالعملات الأجنبية وتحمل الصدمات الاقتصادية العالمية، وبتكونز مصادره من الصادرات وتحويلات المصريين في الخارج، وكمان دخل قناة السويس وعوائد السياحة، وفوق كل ده أرصدة الدهب والعملات الأجنبية اللي عندنا، يعني كل دولار بيخش من أي مصدر خارجي بيغذي الاحتياطي ده أو خزينة البنك المركزي
والحكومة قالت إن الاحتياطي عندنا بيغطي احتياجات البلد من السلع الأساسية لمدة 8 شهور حتى في أصعب الظروف، وده رقم كويس، ومعناه إن المواطن البسيط هيقدر يلاقي السلع اللي بيحتاجها متوفرة في السوق وبأسعارها العادية بدون زيادة.
ولغة الأرقام بتقول إن في ارتفاع نسبي في تحويلات المصريين من بره، ودي مصدر ثابت للعملة الصعبةؤ وكمان السياحة عندنا بدأت تتحسن، هو غير عوائد قناة السويس اللي زادت رغم أزمة البحر الأحمر.
وبرضو، الاستثمارات الأجنبية بدأت ترجع تدريجيا للسوق المصري خاصة في أدوات الدين والقطاعات التصديرية، يعني في فلوس داخلة البلد والدولة بتحاول تحافظ عليها وتحطها في المصادر الصح.
عشان كده نقدر نقول إن فق مؤشرات بتقول إن السياسات النقدية والمالية بدأت تنجح وتحقق أهدافها، واالأهم من كل ده، إن وجود احتياطي قوي بيخلي البلد عندها قدرة على التفاوض سواء مع صندوق النقد أو مع المستثمرين الأجانب، يعني لما تيجي تطلب تمويل أو تعمل اتفاق، بتبقى واقفة على أرض صلبة.
غير كل ده، الاحتياطي القوي بيدي البنك المركزي أداة دفاع قوية ضد أي تقلبات في العملة أو السوق العالمي، وكمان الأرقام الأخيرة دي بتقول للمستثمرين تعالوا واشتغلوا عندنا.
