اسرار انتهاء شهر العسل بين الحكومة وصندوق النقد.. وصندوق التنمية هيكون البديل
في تعاون كبير موجود حاليا بين الحكومة وصندوق النقد الدولي، والتعاون ده مرشح أنه يقف في الفترة اللي جاية.. ياتري اية الاسرار اللي ممكن تخلي التعاون المصري مع صندوق النقد يقف في المستقبل.. واية بدائل الحكومة لتعويض صندوق النقد.
من فترات طويلة والحكومة بدأت برنامج اصلاح اقتصادي بالتعاون مع صندوق النقد الدولي بهدف تحويل الاقتصاد المصري لأقتصاد مرن قادر علي مواجهة الصدمات الخارجية، والبرنامج ده بيستهدف وجود أكثر من مصدر للدخل الدولاري لمصر من الخارج.
التعاون المصري مع صندوق النقد الدولي مرشح وبكل قوة أنه يقف بعد انتهاء الحكومة من الحصول علي شرائح قرض الـ8 مليار دولار واللي الحكومة حصلت علي موافقته في مارس 2024، وحصلنا منه علي 4 شرائح حتي الأن، ومتوقع أن الحكومة تستلم الشريحة الخامسة من القرض مع بداية شهر يوليو اللي جاي واللي هتوصل قيمتها لـ1.3 مليار دولار.
طيب اية هيا الاسباب اللي ممكن توقف التعاون المصري مع صندوق النقد الدولي؟.
المراجعة الرابعة لبعثة صندوق النقد الدولي في مصر حصلت فيها شوية مشاكل كتيرة بسبب تاخر مصر تنفيذ بعض البنود اللي طلبها الصندوق من الحكومة واللي كانت كلها متعلق بالدعم، والحكومة عللت تاخرها في تنفيذ البنود بسبب الظروف الاقتصادية الصعبة اللي تحكمها الاقتصاد المصري بسبب التوترات والتغيرات الاقتصادية والجيوسياسية اللي بتحصل علي المستويين الدولي والمحلي .
وقت المراجعة الرابعة لبعثة صندوق النقد الدولي، الرئيس عبدالفتاح السيسي وجه الحكومة للتفاوض مع الصندوق لتخفيف شروطه خصوصا أنها كانت كلها متعلقه برفع الدعم، والحكومة شافت أن رفع الدعم في التوقيت ده هيكون له اثار سلبية علي الطبقات المحدودة الدخل، وبالتالي صدرت قرارات رئاسية بتأجيل رفع اسعار الخدمات اللي بتقدمها الحكومة لفترات زمنية محددة لحين تحسن الظروف الاقتصادية.
المناقشات اللي قامت بيها لحكومة لتعديل وتخفيف شروط صندوق النقد الدولي اخذت وقت طويل جدا علي ما الصندوق استوعبها، وده اللي خلي الصندوق يأخر صرف الشريحة الرابعة من القرض واللي وصلت لـ1.2 مليار دولار لفترات بعيدة جدا مع مواعيدها الرسمية، وده اللي بيأكد أن قرض الـ8 مليار دولار هيكون أخر تعامل بين مصر وصندوق النقد الدولي، وحاليا الحكومة بتدور علي مصادر تمويل بديلة والاقرب هيكون بنك التنمية الجديد اللي تابع لمجموعة البريكس واللي مصر عضو فاعل فيها.
