فلوسك في أمان أكتر فين؟.. الفرق بين الشهادات والودايع وأدوات الدين
معاك مبلغ وعايز تحطه في مكان مضمون.. بس محتار؟ تحطه في وديعة؟ ولا تشوف شهادة استثمار؟ ولا تجرب أدوات تانية زي أذون الخزانة أو السندات؟
الاختيارات كتير.. والعروض أكتر.. بس الفكرة مش في العائد العالي بس.. الفكرة إنك تختار الأنسب لك.. حسب ظروفك واحتياجاتك.
في الفيديو ده هنفكك لك الحكاية كلها.. ونفهمك ببساطة الفرق بين كل نوع استثمار.. وهنقولك تمشي في أنهي سكة حسب خطتك.
أول حاجة.. الوديعة البنكية.. الوديعة ببساطة.. بتحط فلوسك في البنك لفترة معينة.. سنة مثلاً أو 3 شهور..البنك يديلك عليها عائد ثابت.. بس بشرط ما تقربش من الفلوس قبل المدة دي..لو سحبت قبل الميعاد.. هتخسر جزء من العائد.. يعني الوديعة تعتبر خيار آمن.. لكن مرونته محدودة.
تاني حاجة.. شهادة الاستثمار.. الشهادة قريبة من الوديعة.. بس مدتها أطول غالبًا.. من سنة لـ 3 أو حتى 5 سنين.. وعائدها أعلى من الوديعة غالبًا.. وممكن يكون شهري.. ودي نقطة مهمة لو محتاج دخل ثابت.
وميزتها ممكن تكسر الشهادة بعد 6 شهور وكمان تقدر تاخد قرض بضمانها يعني نوع من الاستثمار الآمن.. بس على مدى أطول شوية.
تالت اختيار.. أذون الخزانة
دي حاجة مختلفة شوية.. لأنك كأنك بتسلف الحكومة.. يعني بتشتري أذون خزانة لمدة من 3 شهور لسنة.. بس بتدفع مبلغ أقل من قيمتها.. ولما المدة تخلص.. الحكومة ترد لك القيمة الكاملة.
مثلاً.. تشتري أذون بـ 95 ألف.. بعد شوية تسترد 100 ألف.. والفرق ده هو مكسبك ودي وسيلة ممتازة لو بتدور على استثمار قصير المدى.. ومفيهوش مغامرة كبيرة.
رابع اختيار.. السندات
السندات تشبه الأذون.. بس على فترة أطول.. سنتين لـ 10 سنين أو أكتر.. وعائدها ثابت.. بيتدفع ليك كل 6 شهور أو سنة.
وميزتها انها استثمار طويل المدى.. والدخل فيه منتظم.. بس لو الفايدة في السوق زادت.. إنت هتفضل على العائد القديم.. فممكن يكون سلاح ذو حدين.
طيب.. تختار إيه؟
لو عايز حاجة أمان أمان..الوديعة أو الشهادة هما الأفضل.. لأن العائد معروف ومافيش مخاطرة تقريبًا.
لو عايز عائد سريع وفترة قصيرة.. أذون الخزانة مناسبة جدًا ليك.. ولو بتفكر في المستقبل البعيد ومرتاح تحجز فلوسك فترة..السندات هتكون أحسن خيار.
ولو عاوز نصيحة مننا .. ما تحطش كل بيضك في سلة واحدة.. وزّع فلوسك بين أكتر من نوع استثمار.. كده تقلل الخطر.. وتزود فرص الربح.
ولو لسه محتار.. استشارة خبير مالي هتفرق معاك كتير.. علشان كل قرار استثماري لازم يبقى على مقاسك.. مش على مقاس السوق.
