لو معاك فلوس عايز تزودها.. تحطها في وديعة ولا شهادة الاستثمار؟
يا ترى لو معاك فلوس وبتفكر تحطها في البنك وتزودها تعمل إيه، هل ممكن تحطها في وديعة ولاشهادة الاستثمار، وإيه الأفضل فيهم والأسهل؟.. خلينا معانا للآخر وهنقولك كل التفاصيل من غير لف ولا دوران.
طبعا كلنا عارفين إنك لو شيلت الفلوس على جنب اليومين دول أكيد هتخسر وده بسبب ارتفاع معدلات التضخم، عشان كده لازم تستثمرها صح وتحطها في المكان المناسب، عشان من ناحية تقدر تحافظ عليها ومن ناحية تانية تكسب منها، عشان كده هنقولك تعمل إيه.
بص يا سيدي، أنت ممكن بسهولة تحط فلوسك في وديعة، يعني إنك بتحط مبلغ معين في البنك، وبتسيبه هناك فترة محددة، سواء شهر، 3 شهور، سنة أو أكتر، وفي المقابل البنك بيديلك عائد ثابت عليها.
بس خلي بالك، الوديعة مفيهاش مرونة كبيرة، طب ده يعني إيه؟
يعني لو جيت تسحب فلوسك قبل الميعاد، هتخسر جزء من العائد، وساعات البنك ممكن ياخد عمولة على فك الوديعة، يعني باختصار، إمان؟ آه، مرونة؟ لأ، عائد ثابت.. بس مش الأعلى.
أما بقى شهادة الاستثمار، فهي زي الوديعة كده بس فيها شوية فروق مهمة، زي إن مدتها أطول، من سنة ل 3 سنين أو 5، وفي بعض الأحيان ممكن توصل ل20 سنة.
والشهادة، العائد بتاعها غالبا أعلى من الوديعة، وفي أنواع منها بتصرف العائد شهريا، وده ممتاز لو محتاج دخل منتظم كل شهر، وكمان ممكن تاخد قرض بضمان الشهادة لو احتجت.
بس زي ما في مزايا، في حاجة لازم تعرفها، وهي إن معظم شهادات الاستثمار مينفعش تكسرها قبل 6 شهور، وبعد كده لو فكيت بيكون فيه شروط معينة.
طيب.. تختار إيه بقى؟ الوديعة ولا الشهادة؟
ده بقى بيعتمد على هدفك، فلو أنت عايز تحط فلوسك فترة قصيرة من غير مخاطرة، فالوديعة مناسبة، أما لو مش هتحتاج الفلوس قريب، وعايز عائد أعلى أو دخل شهري منتظم، ساعتها الشهادة تكسب.
لكن في الآخر، الاتنين يعتبروا أدوات آمنة للاستثمار، وكل بنك بيقدم عروض مختلفة، فاسأل وقارن واختار اللي يناسبك.
وفي النهاية نقدر نقولك، إن الفلوس في البنك مش بس أمان، ده ممكن تبقى كمان وسيلة تزود دخلك وتحقق أهدافك المالية، المهم تختار الصح.
