مشروعات إماراتية وتركية ضخمة.. إيه اللي بيحصل في العاصمة الإدارية

ايه حكاية المشروعات الإماراتية التركية الضخمة اللي هتعمل في العاصمة الإدارية الجديدة.. وازاي العاصمة قدرت تجذب كيانات ضخمة للاستثمار في مصر.

 العاصمة الإدارية والمالية الجديدة هي من أعظم المشروعات اللي اتعملت في مصر ودي كانت بداية إنطلاقة مصر في الملف الاقتصادي ولو فاكرين ازاي العاصمة اتحولت من صحراء جرداء إلى كيان معماري وتجاري وسياحي واداري مهول وواجهة مصر الحضارية وول ستريت الشرق .. واللي كان إنشاءها بمثابة عهد جديد في الجمهورية الجديدة والنهاردة الرمل بقي دهب في المنطقة والمشروع بقي بوابة لاستثمارات بمليارات الدولارات..

البنك الأوروبي لإعادة الإعمار والتنمية: العاصمة الإدارية ستكون أول مدينة ذكية في مصر

العاصمة الإدارية تستضيف مؤتمر الذكاء الاصطناعي الإقليمي للعام الثاني على التوالي (فيديو)

ايه الجديد في العاصمة الإدارية؟
ناس كتير فاكرة إن مشروع العاصمة الجديدة عبارة عن مباني إدارية ووحدات سكن فاخرة لكن الحقيقة الموضوع اكبر بكده بكتير لان فيها مناطق تجارية وصناعية ومالية وخدمية ولوجستيات كبيرة والجديد إن فيه شركات وكيانات عالمية زي موانئ دبي وبولاريس التركية بتستعد لتوقيع العقود النهائية لإنشاء مناطق حرة خاصة بيهم في العاصمة الإدارية ودا بعد  عطلة عيد الأضحى المبارك ودي خطوة كبيرة بالعاصمة ومهمة وبتعكس التوسع المستمر في جذب الاستثمارات الأجنبية وتعزيز الأنشطة الصناعية داخل العاصمة الإدارية الجديدة ودا اللي اكد  عليه المهندس خالد عباس، رئيس مجلس إدارة شركة العاصمة الإدارية للتنمية العمرانية.

المشروعات الجديدة ضمن مذكرة التفاهم اللي وقعتها موانئ دبي في أكتوبر اللي فات واللي بتهدف إلى تطوير منطقة حرة على مساحة 500 فدان مخصصة لمجموعة من الأنشطة الصناعية زي الإلكترونيات، والسيارات، والملابس، والأحذية.. وفي الوقت نفسه شركة “بولاريس” التركية هتبدأ في تنفيذ مشروعها بالعاصمة الإدارية على مساحة 2 مليون متر مربع، باستثمارات 6 مليار جنيه لتطوير الأرض.. ومن المنتظر  تساهم المشروعات الجديدة في دعم استراتيجية الدولة الهادفة إلى تعزيز التنمية الصناعية وتوفير بيئة أعمال تنافسية داخل العاصمة وتعزيز مكانتها كمركز اقتصادي متكامل.

وبخصوص التراب اللي اتحول لدهب كشف خالد عباس عن استمرار جهود تقييم أصول شركة العاصمة الإدارية اللي وصلت لغاية دلوقتى  350 مليار جنيه، مع توقعات بارتفاعها إلى 420 مليار جنيه بنهاية عام 2025 ووصولها إلى تريليون جنيه بعدها وكمان أرباح الشركة مرشحة للزيادة بنسبة لا تقل عن 20% مقارنة بسنة 2024، واللي سجلت أرباح بلغت 30 مليار جنيه.

ولسه مع الأرقام في العاصمة الإدارية الجديدة واللي كل يوم بيدخلها مطورين عقار وفي الفترة الأخيرة تقدم 32 مطور عقاري للحصول على 16 قطعة أرض ضمن الطرح الأخير في منطقة R8 وبتستهدف الشركة من الطرح ده تحقيق مبيعات تتراوح بين 20 و22 مليار جنيه ومش كده وبس دا كمان بيتم تخصيص الأراضي من خلال نظام المفاضلة وأولوية السداد بالدولار بالإضافة إلى القدرة على دفع أعلى مقدم.