الجنيه رجع.. ايه اللي حصل في البنوك المصرية
هو ايه اللي حصل في تداولات البنوك.. وسر عودة الجنيه والصعود المستمر وهل انتهت أسطورة الدولار والتوقعات بتقول ايه..
من ساعات طلعنا على حضراتكم هنا في بانكير وكنا بنتكلم عن مستقبل سعر الصرف الدولار والجنيه وقلنا إن العملة المصرية راجعة بقوة وهتستمر في الصعود أمام الدولار ف باول يوم تداول وفعلا دا حصل والدولار فقد حوالي 4 قروش في عدد من البنوك في بداية تعاملات اليوم..
ليه الدولار بينزل قدام الجنيه ؟
زي ما قلنا لحضراتكم قبل كده إن نزول الدولار مش معناه ضعف العملة الأمريكية لكن معناه زيادة قوة العملة المصرية ودا لأن الطلب بيزيد على الجنيه المصري مع انتعاش الاقتصاد والتنمية والمشروعات.. وكمان الدولار بينزل عشان خلاص مفيش أزمات زي زمان في العملة.. ودا لأن مصر بقي عندها موارد دولارية مستقرة وبتزيد كل يوم عن التاني..
يعني باختصار وحسب قانون العرض والطلب انخفاض سعر الدولار أمام الجنيه دلوقتي طبيعي جدا.. وخد المفاجأة الوضع لو استمر كده سعر الدولار هيفضل ينزل عشان دا قانون السوق.. والتوقعات بتقول إن التدفقات الدولارية في مصر هتستمر في الصعود وتحقيق القفزات خاصة من السياحة والتحويلات والاستثمار والتصدير ودا غير التمويلات الخارجية والشراكات الاقتصادية والصفقات التجارية الخاصة.. ولو مش واخد بالك .. مصر لتتحول لقوة صناعية وزراعية وتجارية كبيرة في المنطقة بتسقبل استثمارات بالمليارات وتقدر تشوف اللي بيحصل في المنطقة الاقتصادية لقناة السويس وفي الساحل الشمالي وفي ساحل البحر الأحمر والمناطق الصناعية الثانية في المحافظات.
يعني نفهم من كده إن مصر مش محتاجه الدولار وإن مفيش أزمات في المستقبل؟
عشان نكون منطقيين الدولار عملة عالمية واقوى عملة في العالم ودا لأن الاقتصاد الأمريكي هو رقم واحد في الكوكب وشفنا اي قرار بيطلع من البيت الأبيض بيهز كل الأسواق الدولية وعشان كده هيفضل الدولار عملة عالمية بيتم بيها التداولات لكن في نفس الوقت بتخصع العرض والطلب قدام باقي العملات واللي يهمنا هنا مصر.. ودا عشان الدولار كان سبب رئيسي في أزمات اقتصادية كتير على مر التاريخ في مصر بسبب الاعتماد الكبير على الاستيراد والديون.
طيب ازاي مصر قدرت تهزم الدولار ؟
أول حاجه عملتها الدولة كانت إنشاء بنية أساسية حديثة عشان تستقبل استثمارات ضخمة وعجلة الاقتصاد تدور ويكون عندك وفرة دولارية تقدر توازن بيها سوق الصرف.. تاني حاجه الحكومة قررت تصنع الدولار بمعني توطين الصناعة وتوفير العملة الصعبة اللي بنستورد بيها.. تالت حاجة تقليل الاعتماد على الدولار نفسه من خلال برامج مبادلة مع الدول.. وفيه حاجة تانية وهي تحويل جزء من الديون الي استثمارات ومصر نجحت في توقيع اكتر من اتفاقية وآخرها كان مع ألمانيا.. وفي نفس الوقت مصر بتحقق معدلات نمو قوية عالميا ودا بيدفع حركة الاستثمار اكتر وبالتالي تدفقات اكتر ودا بيخفض سعر الدولار باستمرار.
