مصر ترد على السؤال الصعب وشروط صندوق النقد.. ايه اللي حصل
ليه مدبولي اتكلم على شروط صندوق النقد الدولي.. وايه السؤال الصعب اللي الحكومة ردت عليه وايه مصير الشريحة الخامسة من القرض المصري.. وليه رئيس الحكومة قال إن الحكومة مش بتعتمد على الصندوق.
في الساعات الأخيرة رئيس الحكومة الدكتور مصطفى مدبولي عقد مؤتمر صحفي مهم واتكلم فيه عن علاقة مصر بصندوق النقد الدولي وحط فيه النقط على الحروف وقال إن الصندوق مش بيفرض شروط على مصر لكن اللي بيحصل أن مصر عملت برنامج اصلاح اقتصادي عشان تطور اقتصادها ودا باتفاق واضح وشفاف مع صندوق النقد كجهة تمويل والبرنامج دا تم بمعرفة وطلب الحكومة المصرية لأننا كنا في حاجة ماسة للبرنامج دا عشان اصلاح الخلل المالي والتغلب على نقص التمويل اللي نتج عن الأزمات العالمية.
وأكد مدبولي أن الحكومة المصرية ملتزمة بمواصلة تنفيذ برنامج الإصلاح الاقتصادي سواء بالتعاون مع الصندوق أو بدونه وقال إن مصر لا تعتمد على الصندوق لكن بتسير في طريق الإصلاح الاقتصادي بناءً على قناعة تامة بأن دا هو المسار الأنسب لمواجهة التحديات الاقتصادية الراهنة.. يعني ببساطة التعاون مع الصندوق مش اجباري ومصر كانت هامشي في نفس الطريق لتنفيذ برنامج الإصلاح الاقتصادي حتى لو مفيش صندوق.
طيب ليه الحكومة اعتمدت على صندوق النقد الدولي في تنفيذ برنامج الإصلاح ومرحتش لجهات تانية ؟
دا سؤال مهم جدا وليه اسباب كتير أولها أن مصر عضو مهم في الصندوق وبحكم عضويتها بتلجأ إليه لتمويل برامج الاقتصاد المصري ودا مش اول تعاون بين مصر والصندوق واللي بتعتبر من أكبر عملاء الصندوق بعد الارجنتين وتاني سبب إن الاعتماد على الصندوق كان ضروري عشان رفع تصنيف مصر الائتماني ولما التصنيف يرفع الاستثمارات الخارجية بتزيد لأن تقاريره مصدر ثقة لوكالات التصنيف الدولية وكمان بتعتبر بوصلة للمستثمرين في العالم على جاذبية السوق المصري وعشان كمان الصندوق عنده القدرة إنه يوجه جهات ودول مانحة تانية لتمويل الدولة المصرية.
طيب يعني مفيش شروط اصلا من الصندوق على الحكومة؟
هي مش شروط هي اتفاق بين طرفين بالتوافق عليه والحكومة بتلتزم بيه عشان البرنامج ينجح وفي نفس الوقت الصندوق يطمن إن الدولة المصرية هتقدر تسدد الديون وتستقبل تمويلات جديدة يعني المصلحة مشتركة ولما الصندوق طلب مثلا رفع الدعم الحكومي على المواد البترولية والكهرباء دا كان عشان تخفيف فاتورة الصرف على الحكومة والالتفات لدعم فئات تانية أكثر احتياجا ولما طلب تخارج الحكومة من السوق فدا كان عشان إتاحة الفرصة للقطاع الخاص عشان ينطلق في الاقتصاد زي ما بيحصل في الاقتصاديات المتقدمة اللي بتقوم على أكتاف القطاع الخاص ودا لأنه قطاع مرن وبيسعى دايما للمنافسة والتطوير والتوسع في الإنتاج لانه قائم على الربح ودا بينعكس على وفرة الإنتاج وتوفير فرص عمل جديدة والجودة وزيادة موارد الدولة من الضرائب والرسوم وغيرها.
وبخصوص المحادثات الاخيره مع الصندوق فالمعلومات بتقول إنها مفاوضات ناجحة وهبتك صرف الشريحة الخامسة قريب جدا بعد الموافقة عليها ودا لأن البنود الصعبة في البرنامج خلصت وكانت في بند رفع الدعم والباقي خطوات فنية بيتم التعامل معاها حاليا.
