دعم للاحتياطي ورسالة اطمئنان للمؤسسات الدولية.. مكاسب اتفاق الـ 5 مليار يورو بين مصر والاتحاد الأوروبي
يا ترى إمتى مصر هتستلم الدفعة التانية من منحة الاتحاد الأوروبي، وليه الاتفاق ده مهم جدا في الفترة دي بالذات، وقيمة المنحة كلها كام، وإيه هي فايدتها للاقتصاد المصري؟
في الساعات الأخيرة، في مصادر حكومية أكدت أن الشريحة الثانية من منحة دعم الموازنة من الاتحاد الأوروبي هتتصرف قريب جدا، أو خلال أسابيع قليلة، وده جزء من اتفاق استراتيجي بين مصر والاتحاد الأوروبي، الهدف منها هو تقوية الاقتصاد المصري، وكمان دعم برنامج الإصلاح الاقتصادي، وبرضو تحسين مناخ الاستثمار وتنفيذ إصلاحات هيكلية، وكمان التحول للاقتصاد الأخضر والمستدام.
والاتفاق ده مش بسيط، ده عبارة عن حزمة دعم مالي بـ5 مليار يورو، هدفها الأساسي هو دعم الموازنة العامة وسد فجوة التمويل، وكمان مساندة برنامج الإصلاح الاقتصادي اللي الدولة شغالة عليه دلوقتي.
ومصر كانت استلمت الشريحة الأولى من المنحة دي في شهر يناير 2025، وكانت قيمتها مليار يورو، ودلوقتي الدور على الشريحة التانية.
طيب في هنا سؤال مهم.. الفلوس دي الحكومة هتعمل بيها إيه؟
أول حاجة، هتزود احتياطي النقد الأجنبي عند البنك المركزي، وده معناه قوة أكتر للجنيه المصري، ومرونة أكتر في توفير الدولار للمستوردين والمصانع.
كمان، ده بيأثر بشكل إيجابي على المواطن البسيط، يعني لما يكون فيه دولار متوفر، فالحكومة بتقدر تستورد السلع الأساسية زي القمح والزيت والأدوية من غير ما الأسعار تغلى، وكمان المصانع بتشتغل من غير توقف، وده معناه استقرار في السوق وانخفاض في الأسعار بشكل تدريجي.
برضو، الفلوس دي كمان بتدي رسالة ثقة للمستثمرين الأجانب، يعني لما يشوفوا إن الاتحاد الأوروبي حاطط ثقته في الاقتصاد المصري، ده بيشجعهم ييجوا يستثمروا، وده معناه فرص شغل أكتر، ودخل أعلى للناس.
عندك كمان، الدفعة دي هتدعم الموازنة وتزود النقد الأجنبي، وهتأثر على انخفاض الأسعار وكمان هيحصل استقرار اقتصادي وده هينعكس على حياة المواطن البسيط بشكل إيجابي جدا.
وده معناه إن الفلوس مش هتروح في الهوا، لأ دي هتدخل في مشاريع وتنمية وقطاعات حيوية، وكمان هتزود الاحتياطي النقدي من العملة الأجنبية، خاصة اليورو، وده بيساعد على تقليل الضغط على الجني، وخفض التضخم واستقرار الأسعا، وتحسين الأحوال المعيشية.
طيب، إيه اللي باقي؟
الاتفاق فيه شرائح تانية بعد الشريحة التانية، ولسه هيتم الإعلان عن مواعيد صرفها، بس المؤكد إن الاتحاد الأوروبي ملتزم بالدعم وإن الحكومة المصرية مستمرة في تنفيذ الإصلاحات المطلوبة.
يعني ببساطة، المنحة الأوروبية دي مش بس ضخ فلوس، دي ضمانة لثقة دولية في الاقتصاد المصري، ودي حاجة مهمة في وقت زي ده.
