سر خناقة الصينيين والهنود والروس على اقتصادية قناة السويس (فيديو)
إيه اللي بيحصل في المنطقة الاقتصادية لقناه السويس في الفترة الأخيرة.. وايه سر الصراع على الاستثمار فيها من الصين والهند وروسيا.. وازاي المنطقة هتكون بوابة المليارات للخزانة المصرية.
لو تابعنا خريطة الاستثمار الأجنبي في مصر هنلاقي إن فيه هجوم استثماري ضخم دلوقتي من الدول الصناعية الكبرى للاستثمار في مصر وخاصة في المنطقة الاقتصادية لقناه السويس ودا بسبب موقعها الجغرافي المتميز وقربها من أهم ممر ملاحي في العالم وهو قناة السويس ومن شبكة الموانئ المصرية العملاقة واللوجستيات اللي اتعملت جمبها بخلاف خطوط التجارة والطرق الحديثة والسكك الحديدية ودا خلي فيه سهولة كبيرة في نقل المنتجات والبضائع إلى كل أسواق العالم القريبة من مصر سواء في أوروبا أو افريقيا وحتي أمريكا وعشان كده الدول الصناعية الكبيرة بتجري وتتنافس عشان تحجز مكان في المنطقة لضمان تسويق منتجاتها خارجيا.
كمان اغلب الدول دي وخاصة الصين وروسيا بترتبط بشراكات استراتيجية مع مصر والهند دخلت على الخط.. وزي ما احنا عارفين إن الصين ليها منطقة صناعية اسمها تيدا في المنطقة بتضم عشرات المصانع في أكتر من صناعة مهمة وكمان روسيا بدأت رسميا في تطوير وبناء منطقتها الصناعية في نفس المنطقة وأخيرا الهند أعلنت إقامة منطقة صناعية في السويس ضمن حيز المنطقة الاقتصادية لقناه السويس ومضاعفة استثماراتها لثلاثة أضعاف..
وعشان نبقى عارفين المنطقة دي هتكون بوابة المليارات للخزانة المصرية وقدرت ورغم حداثة إنشاءها في جذب 8.3 مليار دولار لغاية دلوقتى والتوقعات بتقول إن المنطقة هتجذب أضعاف الرقم دا في المستقبل القريب ودا معناه موارد دولارية ضخمة وجديدة هتساهم في انخفاض سعر الدولار اكتر في السوق المصرفي ودا معناه انخفاض التضخم ونزول الأسعار بشكل ملحوظ في الفترة الجاية خاصة مع القفزات الموازنة من التدفقات الدولارية من القطاعات الاقتصادية الدولارية زي تحويلات المصريين بالخارج والاستثمار والسياحة والتصدير وعودة إيرادات قناة السويس وغير الدولارات اللي جاية من صندوق النقد الدولي والاتحاد الأوروبي وغيرها من مؤسسات التمويل الدولية ودا كله بيصب في شرايين الاقتصاد المصري واللي ودع زمن الأزمات ودخل في مرحلة الانطلاق.
اي استثمار جديد معناه ببساطة فرص عمل أكتر للشباب وانتعاش حركة التجارة والاقتصاد والصناعة والتصدير والنمو الاقتصادي ومصر حققت المعادلة المستحيلة بقدرتها على التطور الاقتصادي في وقت المنطقة كلها بتعاني من أزمات ودا هيخلق اقتصاد قوى وعالمي ملامحه بدأت تتشكل بالفعل على أرض الواقع.
