خطة الحكومة لتحويل مصر لمركز إقليمي في الصناعات التعدينية.. شوف اللي بيحصل
يا ترى إيه اللي بيحصل في ملف التعدين، وإزاي مصر هتبقى مركز إقليمي ضخم في الصناعات التعدينية، وإيه تفاصيل اللي أعلنته وزارة البترول مؤخراً عن تحويل مصر لمركز إقليمي للصناعات المعدنية؟
النهاردة وزارة البترول والثروة المعدنية، أعلنت عن خطوات جديدة ضمن خطة ضخمة بتحويل مصر لمركز إقليمي للصناعات التعدينية، وده مش مجرد كلام، دي خطة واضحة بدأت فعلاً تتنفذ على الأرض.
والخطة دي بتركز على حاجة مهمة جدا، وهي إننا مانكتفيش بتصدير الخامات زي ما هي، لكن نصنعها الأول ونضيف عليها قيمة قبل التصدير، يعني مثلا بدل ما نصدر خام الفوسفات أو الدهب أو الرمال السودا، لأ، نصنعهم عندنا في مصر، يعني نعمل سماد، نعمل سبايك دهب، نعمل مواد أولية تدخل في صناعات تانية، وده اسمه تعظيم القيمة المضافة.
والوزير قالها بصراحة: "مصر مش بس غنية بالثروات، دي كمان جاهزة تبقى مركز صناعي وتعديني يخدم المنطقة كلها"، طب إيه اللي اتعمل لحد دلوقتي؟
بص يا سيدي، وزارة البترول أطلقت "الاستراتيجية القومية للتعدين لحد سنة 2040"، واللي بتستهدف رفع مساهمة قطاع التعدين في الناتج المحلي من أقل من 0.5% لـ 5% خلال كام سنة.
وده بيتم من خلال حاجتين مهمين، الأولى هي تطوير البنية التحتية في المناطق الغنية بالخامات، والتانية استثمارات محلية وأجنبية في مجال التنقيب والتصنيع.
وخلال السنتين اللي فاتوا، حصل تطور كبير، زي طرح مزايدات عالمية جديدة للتنقيب عن الذهب والمعادن، وتوقيع أكتر من 15 اتفاقية مع شركات عالمية في مجال التعدين، وإنشاء مجمعات صناعية لتصنيع الخامات داخل مصر، وده كمان بجانب تطوير الموانئ ووسائل النقل علشان تصدير المنتجات المصنعة بسرعة وكفاءة.
طيب ده هيفيد المواطن البسيط في إيه؟
بص يا سيدي، أولا، الصناعة دي هتوفر آلاف فرص الشغل في كل محافظات مصر وخاصة في البحر الأحمر والصحراء الشرقية وأسوان وغيرها، وثانيا الصناعات التعدينية بتجيب عملة صعبة، يعني دعم مباشر للاقتصاد.
عندك كمان، مع زيادة التصنيع المحلي، الأسعار هتبدأ تبقى أكتر استقرار، والدولة مش هتضطر تستورد منتجات جاهزة غالية، يعني من الآخر، نقدر نقول إن تحويل مصر لمركز إقليمي في الصناعات التعدينية هيساوي شغل أكتر، دخل أعلى، واقتصاد أقوى.
واللي مهم نعرفه كمان، إن وزارة البترول مش شغالة لوحدها، لأ ده في تنسيق كامل مع هيئة الثروة المعدنية، والمطورين الصناعيين، وحتى كمان وزارة البيئة علشان يكون فيه استدامة في الاستغلال، من غير ما نضر البيئة.
والخطة ماشية بسرعة، لدرجة إن فيه مناطق كاملة هتتحول لمجتمعات تعدينية متكاملة، فيها مصانع، مساكن للعمال، خدمات، وكل اللي يخلي الصناعة تشتغل بكفاءة، ؤدي مجرد البداية بس.. واللي جاي هيكون أقوى بكتير.
