قفزة الـ33 مليار دولار في تحويلات المصريين.. وسر نزيف الدولار أمام الجنيه.. صدمة الذهب في الأسواق الدولية وايه اللي هيحصل في الصاغة المصرية
وحدة أبحاث بانكير، قدمت عدد كبير من التقارير والتحليلات الهامة في الشأن الاقتصادي والمالي، والبداية مع قراءة حول القفزة القياسية في تحويلات المصريين فى الخارج وحسب بيان البنك المركزي المصري تحويلات المصريين العاملين بالخارج قفزت بعد عام من الإجراءات الإصلاحية المتخذة في مارس 2024 خاصة في الفترة من مارس إلى فبراير 2024-2025 بمعدل 72.4% وبقيمة 13.7 مليار دولار لتصل إلى 32.6 مليار دولار.
وشرح بيان المركزي إن تحويلات المصريين بالخارج ارتفعت خلال فبراير 2025 للشهر التاني عشر على التوالي بأكتر من الضعف لتصل إلى 3.0 مليارات دولار (مقابل نحو 1.3 مليار دولار خلال شهر فبراير 2024)، وهي تدفقات لم تحدث من قبل خلال شهر فبراير تاريخياً من كل عام.
وقال التقرير إن اللي حصل في تحويلات المصريين مش مجرد زيادة طبيعية لكن بتعتبر قفزة تاريخية وقياسية في تاريخ التحويلات ودا بيأكد تعافي موارد مصر الدولارية واستقرار سوق الصرف وبيعزز جهود الحكومة للوصول بحصيلة الدولار الي اكتر من 300 مليار دولار بحلول 2030.
ولفت بانكير إن الزيادة الأخيرة في تحويلات المصريين بالخارج بتأكد عودة الثقة في الجهاز المصرفي للدولة والقضاء نهائىيا على السوق السوداء للعملة وبتاكد في الوقت نفسه أن الاقتصاد المصري بيسير على الطريق الصحيح...
وأشار التقرير إن الحكومة بتتوقع وصول تحويلات المصريين بالخارج الي 53 مليار دولار في 2030 وبتدرس تقديم مزيد من الحوافز للعاملين بالخارج في الفترة الجاية.
منصات بانكير قدمت تقرير خاص النهاردة عن لغز الهبوط المستمر للدولار في البنوك.
وشرح التقرير إنه من حوالي شهر فات كان سعر الدولار بيزيد بشكل كبير واقترب اووي من 52 جنيه في قفزة كبيرة محصلتش من أيام التعويم.. النهاردة الدولار ليه اكتر من 3 أسابيع وسعره بينزل قدام الجنيه بوتيرة بطيئة لكن متواصلة وووصل السعر النهاردة لحوالي 50.45 جنيه في ختام التعاملات في بعض البنوك يعني سعر الدولار نزل حوالي 160 قرش في اقل من 4 اسابيع بالتحديد..
وشرح التقرير اسباب نزول سعر الدولار وقال إن فيه اكتر من سبب منها الأحداث السياسية والاقتصادية الكبيرة في العالم واللي كان ليها تأثير مباشر على أسواق العملات وفي مقدمتها الدولار واللي اتعرض لهزة عنيفة جدا قدام العملات الرئيسية التانية زي اليورو والين والاسترليني والروبل واليوان وغيرها من العملات ودا بسبب قرارات ترامب المفاجأة اللي هزت الأسواق الدولية..
ولفت التقرير إنه من الناحية التانية مصر ظهرت كاسواق بديلة للاستثمار في العالم بعد قرارات ترامب ودا ساعد في الإعلان عن تدفقات استثمارية ضخمة لأن مصر اتفرض عليها أقل نسبة رسوم وفيه مفاوضات مع الإدارة الأمريكية لإزالتها بشكل نهائي ودا بجانب زيادة التدفقات الدولارية بشكل كبير في الفترة الأخيرة من موارد الدولة زي تحويلات المصريين بالخارج واللي وصلت لحوالي 33 مليار دولار ودا رقم قياسي غير مسبوق وكمان ارتفاع إيرادات السياحة والتصدير و وكل ده كانت نتيجة زيادة معروض الدولار وبالتالي انخفاض سعره على مدار الأيام اللي فاتت.
وكشف التقرير كمان إن الدولار ليه فترة مستقر في البنوك يعني نقدر نقول حسب قانون العرض والطلب أن العملة الأمريكية متوفرة بشكل كبير ودا وراء تراجع اسعارها في الفترة الأخيرة يعني مفيش طلب زيادة أو نقص في المعروض.. وكمان زيادة الاحتياطي النقدي بشكل كبير في اخر بيانات رسمية واللي كسر فيها حاجز 48 مليار دولار دليل قوي على زيادة حصيلة الدولار في الدولة وكمان سداد مستحقات الشركات العالمية في مصر دليل جديد على أن معروض الدولار مفهوش أي أزمة..
وحدة أبحاث بانكير قدمت تقرير مهم عن التطورات السريعة في سوق الدهب محليا وعالميا.
وشرح بانكير إن العالم كله النهاردة مشغول بأهم خبر اقتصادي حصل من فترة طويلة .. أمريكا والصين أعلنوا اتفاق تجاري يقلل الرسوم الجمركية بشكل كبير .. أمريكا خفضت الرسوم من 145% لـ30% .. والصين نزّلت رسومها من 125% لـ10% .. الخطوة دي جت بعد شهور من التوتر اللي خلّى الأسواق في حالة قلق.
وكشف التقرير تأثير الاتفاق الصيني الأمريكي على سوق الدهب وقال إن الدهب دايما بيبقى الملاذ الآمن وقت الأزمات .. لما كان فيه توتر تجاري .. سعر الدهب وصل لحوالي 3500 دولار للأونصة .. لكن بعد الاتفاق .. الدهب بدأ يتراجع .. النهاردة الأونصة نزلت لحوالي 3225 دولار .. يعني خسارة 3% في يوم واحد .. لأن المستثمرين بقوا أقل خوف وبدأوا يتحركوا ناحية الأسهم والسندات .. المتوقع إن الدهب يفضل يتراجع شوية ويستقر حوالين 3200-3250 دولار في الأيام الجاية .. بس لو الاتفاق ده اتعطل أو ظهرت مشاكل جديدة .. الدهب ممكن يرجع يطلع ويوصل 3400 دولار تاني.
وشرح التقرير تأثير عودة الهدوء للأسواق العالمية على سوق الصاغة المصرية وقال إن مصر جزء من العالم واي تغير في سوق الدهب العالمي بينعكس على مصر وشفنا الدهب ازاي انخفض النهاردة بشكل كبيرة وبصورة محلصتش من شهر ابريل اللي فات ومتوقع استمرار الانخفاض.
