سر القفزة الأخيرة في الاستثمارات.. مصر فيها ايه
ليه السوق المصري بقي جاذب للاستثمارات الأجنبية والعربية وليه الاستثمارات الخليجية زادت بشكل كبير في الفترة الأخيرة وايه مردود الاستثمارات دي على سوق الصرف والمواطنين بشكل عام.
الاقتصاد مفهوش مجاملة وفي عالم البيزنس والاستثمار مفيش حاجة للصدفة والدولار اللي بيتدفع لازم يجي قصاده 10 دولارات وراس المال زي ماهو جبان لكن صاحبه زكي وبيدور دائما على المكسب والسوق الكسبان واللي يقولك غير كده يبقي ببخدعك من الاخر.
طيب ليه مصر احلوت فجأة في عيون المستثمرين العرب والاجانب ؟
بالعكس بقي الموضوع مجاش فجأة ولا صدفة ولا مجاملة ولاي أي حاجة من دي لكن السر إن مصر اشتغلت صح على مدار اكتر من 10 سنين عشان تبقي سوق مربح ومريح وآمن للاستثمارات الخارجية وتخلي أصحاب المال والصناديق السيادية العربية والعالمية وصناديق الاستثمار تفضل السوق المصري على غيره.
الحكاية بدأت لما الرئيس السيسي قرر يبني البلد صح عشان تنهض ويحل المشكلات من جذورها وكانت ضربة البداية إنشاء بنية أساسية قوية وحديثه ومتنوعة تلبي احتياجات اي مستثمر وبنى طرق وموانئ ولوجستيات ضخمة وبنية اتصالات حديثة بجانب ثورة تشريعية تواكب الاقتصاد الحديث.. ولو مستغرب الطفره في الاستثمارات الاجنبية لمصر
وليه دلوقتي تحديداً فنحب نقولك إن المستثمر لقي في السوق المصري كل اللي يتمناه من مردود اقتصادي وأرباح مش موجوده في أي سوق في المنطقة ودا اللي خلي مصر تتصدر الأسواق الناشئة من حيث المردود الاقتصادي والمالي..
المستثمر لقى في مصر الأمان والاستقرار السياسي والاجتماعي والاستثماري وعمالة رخيصة ومتدربة وأسواق واعدة ومفتوحة وموقع جغرافي مميز وبنية تجارية قوية وعملة منخفضة وفرص متعددة ومتنوعة للاستثمار من سياحة وصناعة وزراعة وخدمات وتعهيد وأسواق قريبة ومن هنا بدأت الاستثمارات تهل على الأسواق المصرية بالمليارات ولسه دي مجرد البداية لأن الدولة المصرية نجحت في تأسيس اقتصاد على قواعد علمية ومرنة ينافس اي اقتصاد في المنطقة والشرق الأوسط ومرشح يكون سابع أقوى اقتصاد في العالم بشهادة كبرى المؤسسات المالية الدولية.
طيب إيه سر القفزة الأخيرة في التدفقات الاستثمارية الخليجية ؟
الخليج بيعتبر مصر امتداد لامنه الإقليمي والقومي وكمان دول الخليج عندها وفرة مالية وفوائض مالية ضخمة جدا وعندهم استثمارات في كل حتة في العالم لكن مصر بالنسبة للمستثمرين العرب بتمثل حالياً فرصة لا تعوض بعد التطور الاقتصادي الكبير اللي حصل في مصر وشهادة المؤسسات المالية الدولية زي صندوق النقد الدولي والبنك الدولي ووكالات التصنيف ولأن مصر بالنسبة للخليج هي السوق الأقرب جغرافيا ولأنها بقت فيها حاجة حلوة لاي مستثمر وهي إن الاقتصاد المصري بيستعد يكون محور الاقتصاديات في المنطقة والعالم وهيكون مركز إقليمي ودولي للتجارة والاستثمار والسياحة والتصدير وهي كلها قطاعات بتشهد نمو متسارع وفرصة لاي مستثمر وعشان كده الخليج استغل الحراك الاقتصادي الضخم في مصر عشان يحجز مكان بعد ما شاف السباق الصيني الاوربي الروسي على السوق المصري.
اي استثمارات جديدة أو تدفقات دولارية بتأثر بشكل مباشر في سعر صرف الدولار وبالتالي سعره هينزل والاسعار هتنزل خاصة السلع المستوردة والمواد الخام ودا غير إن التدفقات دي بتعتبر عامل أساسي في انتعاش الاقتصاد المصري.
