ليه مصر بتعتمد على إفريقيا لتحقيق حلم الـ140 مليار دولار ايرادات من الصادرات؟
افريقيا واحدة من اهم الاسواق للعالم كله..ولها اهمية خاصة بالنسبة لمصر.. ياتري اية سر اهتمام مصر بالسوق الأفريقي.. واية الفايدة اللي بتعود علي الاقتصاد المصري من التوسع فيه.
لو انت من متابعي نشرات الأخبار أو حتي المواقع الأخبارية أو حتي مهتم بالقراءة، هتلاقي كل يوم اخبار عن زيارات متبادلة بين مصر والدول في قارة أفريقيا، وهتلاقي كل يوم علاقات جديدة مصر بتطورها مع دولة افريقية جديدة، وطبعا هيجي السؤال الأهم في دماغك هيا الدولة دي هتفيدنا باية خصوصا أن أغلب دول أفريقيا دول فقيرة وبالعربي كده معندهش حاجة ناخذها منهم بالعكس هما اللي محتاجين لنا.
وقبل ما تسرح وراء افكار غلط كلها لازم نكون عارفين أن قارة أفريقيا عبارة عن سوق اقتصادي مهم للعالم كله خصوصا مصر واللي مصر بتحاول تجدد علاقاتها السياسية والتجارة مع اغلب دولة القارة السمراء، وده لأكثر من سبب اولهم البعد السياسي والدور السيادي اللي مصر بتعلبه من زم الزمن والريادة الأفريقية لمصر علي القارة، وتاني سبب أنه سوق اقتصادي مستهلك وواعد وجاهز لاستقبال كل البضائع والمنتجات في اي وقت وفي كل زمان، واغلب دول العالم بتحاول بكل الطرق أنها تلاقي منفذ تصدر منه منتجاتها لدول افريقيا.
طيب اية اللي بتعمله مصر علشان تسيطر علي السوق الأفريقي ؟.
الحكومة من زمان وهيا فهمت الفولة، وعرفت ليه اغلب دول العالم بتكون حريصة علي تحسين علاقاتها من دول افريقيا، وطبعا الهدف الاقتصادي هو المحرك الاساسي في الموضوع، وبدري جدا الدولة بدأت تمد جوزها في دول القارة وكانت أول خطوة تاخذها الحكومة هو مشروع طريق القاهرة كيب تاون واللي هيكون طريق بري تقدر مصر من خلال تدخل البضائع اللي عايزها للسوق الأفريقي، ده غير أن خطة مصر للتحول لمركز اقليمي للتبادل التجارية قايمة علي استغلال علاقات مصر بالدول الافريقية ونقل البضائع اللي هتوصل عن طريقها وهتدخلها للاسواق الأفريقية وده طبعا هيكون بمقابل بالدولار وده هيكون باب جديد لمصر لزيادة ايرادات مصر من العملة الصعبة في الناتج القومي .
وعلشان مصر تسيطر علي السوق التجاري الأفريقي، بالحكومة اخذت خطوة كمان وعملت مراكز لوجيستية في اغلب دول القارة والمراكز عبارة عن مراكز تخزين للسلع والمنتجات المصرية، وده بهدف وجود واستمرار المنتجات المصرية في السوق الأفريقي لأطول فترة ممكنة خصوصا أن الوصول للسوق الافريقي حاجة فير منتهي الصعوبة بسبب الطبيعة الجغرافية الصعبة لأغلب دول القارة عن طريق ضعف البنية التحيتة من الطرق والمؤاني والمطارات في القارة واللي بتعصب برضوا الوصول لهناك، وبالتالي وجود المراكز اللوجيتسية بيسهل علي مصر تصدير البضائع وهيقرب مصر من حلمها بالوصول لتحقيق 140 مليار دولار كايرادات من الصادرات في 2030، وكمان افريقيا بتمثل لمصر سوق مهم جدا للمواد الخام اللي بتدخل في الصناعة المصرية.
