بمقدم 30 ألف جنيه.. شوف أسعار شقق الإسكان الاجتماعي 2024 وموعد التقديم
إيه قصة شقق الإسكان الاجتماعي اللي طرحتها الحكومة ممثلة في وزارة الإسكان خلال الفترة الأخيرة في أكبر طرح لها، كام شقة معروضة للبيع ومساحتها كام، والأسعار وإيه هي طريقة التقديم.. هنقولك كل التفاصيل في الفيديو فتابعنا للآخر.
في الفترة الأخيرة، وزارة الإسكان والمرافق والمجتمعات العمرانية، أعلنت عن طرح 60 ألف شقة في المدن الجديدة، عشان تقدر تكفي طلب الشباب على الشقق الجديدة خاصة الراغبين في الجواز، بس هتدفع مقدم 30 ألف جنيه.
والشقق أو الوحدات السكنية دي بتيجي ضمن مشروع “سكن لكل المصريين 2024“، ومن المقرر فتح باب الحجز رسميا عليها خلال شهر نوفمبر الجاي.
كمان، الشقق دي هتكون سكن ملائم بأسعار مناسبة وشروط ميسرة، كمان متاح فيها التمويل العقاري يعني تقدر تستلف من البنك وتحجزها، كمان الوحدات دي متنوعة ما بين المدن الجديدة والمحافظات، ضيف على ده انها بتشمل 10 آلاف وحدة لمتوسطي الدخل و60 ألف وحدة لمحدودي الدخل.
ونص الوحدات السكنية المطروحة هتكون في المدن الجديدة اللي طورتها الدولة، أما النص التاني هيكون في المحافظات والمناطق القديمة، كمان الفترة المقبلة هتشهد إعلانات متتالية تتعلق بتسليمات شقق الإسكان للحاجزين.
ووزير الإسكان قال إن هدف الوزارة خلال الفترة الجاية، هو تنفيذ مجتمعات عمرانية متكاملة، يعني مش همزات سكنية بس، بمعني تنفيذ كافة الخدمات بالتوازي مع تنفيذ العمارات السكنية، كمان قال إنه تم وضع خطة مكثفة لتسليم شقق الإسكان السابقة، مع التأكيد على ضرورة الالتزام بتسليم منطقة سكنية مكتملة الخدمات والمرافق الخدمية والتنموية، بحيث انها تشكل مجتمع متكامل، وبنهاية السنة الجاية 2025 هيتم تسليم كافة الوحدات السكنية.
طب إيه هي مواصفات شقق محدودي الدخل؟
بص يا سيدي، الشقق دي هتكون كاملة التشطيب، يعني جاهزة للسكن بعد الاستلام مباشرة، وهتكون العمارات مكونة من 6 طوابق، وكل دور بيحتوي على 4 شقق، مساحة الوحدة حوالي 90 متر مربع، وبتحتوي على غرفتين أو ثلاث غرفؤ ودي مساحة تعتبر مناسبة للعائلات الصغيرة والمتوسطة.
أما شقق متوسطي الدخل في سكن مصر، فمساحتها بين 100 ل 150 متر، واللي هتكون في الدور الأرضي 108 متر، والأدوار المتكررة 118 متر، أما "دار مصر" ، فبتتراوح المساحات بين 100 و150 متر.
نيجي بقى لأسعار وحدات صندوق الإسكان الاجتماعي، لحد اللحظة دي لم يتم الإعلان عن أسعار الشقق في الطرح الجديد، ولكن في الطرح اللي فات اللي أعلنه صندوق الإسكان الاجتماعي في ديسمبر الماضي، بلغ سعر الشقة لمحدودي الدخل حوالي 530 ألف جنيه، ومن المتوقع أن أسعار الوحدات الجديدة تكون قريبة من الرقم ده.
نيجي لميعاد التسليم؟
بحسب وزارة الإسكان، فمقرر التسليم بعد 3 سنين، ووقت التسليم هتكون أسعار شقق سكن لكل المصريين ملائمة للجميع، وهيتم مراعاة الفئات الأقل دخلًا عند رفع الأسعار.
ولو حضرتك مستعجل وعايز تقدم، فهنقولك شروط التقديم، واللي هي انك تحجز شقة واحدة بس، وكمان ان حضرتك ماتكونش استفدت من مبادرات التمويل العقاري السابقة الصادرة من البنك المركزي بقرارات مجلس إدارته بتاريخ فبراير 2014 أو بتاريخ ديسمبر 2019 وتعديلاتهما الصادرة بتاريخ يوليو 2021.
ضيف على ده، ان مايكونش اتخصص لك قبل كده، قطعة أرض سكنية أياً كان نوعها بالمدن الجديدة أو المحافظات، كمان لازم تكون من أبناء المحافظة اللي بيطرح فيها شقق جديدة، وماتنساش مستنداتك الخاصة زي صورة بطاقة ومستند الدخل الشهري وشهادات ميلاد أولادك، بجانب مفردات مرتب الزوجة لو شغالة، وكمان إيصال سداد مقدم جدية الحجز.
بعد كده، تقدم إلكتروني على البوابة الإلكترونية لصندوق الإسكان الاجتماعى ودعم التمويل العقاري.
