الجنيه الرقمي في الطريق.. المركزي يقترب من إعلان المفاجأة

ايه المفاجأة اللي البنك المركزي المصري بيستعد للإعلان عنها وإزاي الجنيه الورق اللي في جيبك زمنه هينتهي وإيه البديل عنه.. تعالو نشوف مع بعض التفاصيل

قطاع المصارف والدفع الالكتروني في العالم بيتطور كل دقيقة ودلوقتي خلاص بقت المليارات بيتم تحويلها في ثانية واحدة من أقصى الأرض لأقصى الأرض وزمن العملة الورقية انتهي في بلاد كتير بقت تعتمد على العملات الرقمية.. طيب إيه هي العملات الورقية الأول..
شوف حضرتك العملة الرقمية هي نفس العملة الورقية وبنفس القيمة بس مش بتشلها في جيبك لكن بتكون في حساباتك الالكترونية وبتدفع بيها وتشتري كل حاجة وكله الكتروني وهي عملة معترف بيها بين البنوك المركزية وشركات الدفع الالكتروني وهيتم تداوله بين محافظ الكاش على الموبايل النقالة وكروت الدفع الإلكتروني للجهات الحكومية وحالات الشراء، وزي ما قلنا الجنيه الرقمي بيساوي الجنيه الورقي في قيمته والتسلسل اللي بيحمله الورقي.

ومصر سبق وأعلنت إنها شغالة على دراسة إطلاق الجنيه الرقمي بحلول 2030 ودا لأنه لغة العصر وأكتر أمان وبيحافظ على الأموال وبيوفر في طباعة العملة الورقية.

الجديد بقي في موضوع الجنيه الرقمي المصري اللي أعلنه النهاردة البنك المركزي المصري واللي قال إنه بدأ في دراسة مدى جدوى إطلاق العملة الرقمية وكيفية تطبيقها وتهيئة الكوادر واعداد الخبرات وكشف المركزي في تقرير النهاردة، أنه تم الانتهاء من المرحلة الأولى من دراسة المشروع واللي خلصت إلى إعداد تقرير الدراسة وتحليل مشروع العملة الرقمية للبنك المركزي المصري .

طبعا المركزي لازم يدرس ويعمل حساب كل حاجة قبل ما يطلق الجنيه الرقمي لأن الموضوع كبير وعاوز بنية رقمية وألأمن سيبراني جدديد وطريقة التحكم والمراقبة وليلة كبيرة جدا وعشن كده المركزي شغال على مهلة وبيدرس بعمق البنية المالية التحتية لأنظمة وخدمات الدفع في مصر، واعتبارات تطبيق العملة الرقمية وتحديد الأهداف الاستراتيجية ونماذج العمل وكمان تقييم المزايا والمخاطر بجانب تطبيق العملة الرقمية وتقييم المخاطر دا هو أكتر حاجة المركزي شغال عليها لأن دي مليارات الجنيهات هتكون في السيستم الرقمي وفي النهاية اقتصاد دولة بالإضافة إلى قابلية التطبيق من حيث عوامل الأمن السيبراني والتقنيات التكنولوجية المستخدمة، وكمان الجوانب القانونية والتشريعية وكفاءة النظام المالي.

البنك المركزي شغال كمان على مشروع التعرف على هوية العملاء الكترونياً  أوالهوية المالية الرقمية، واللي بتهدف للتعامل مع العملاء إلكترونيا بطريقة آمنة لمستخدمي الخدمات المالية واللي هتمكنهم من إنشاء هوية مالية الكترونية تسمح بالتحقق من بيانات العملاء الكترونيا وبالتالي فتح حسابات البنوك بشكل إلكتروني عن بعد.