هيعدي الـ 5 الآف جنيه.. توقعات صادمة لأسعار الدهب في 2025
الدهب واحد من اكتر الحاجات اللي عليها علامات استفهام كتيرة في الوقت الحالي، خصوصا أن اسعاره كل يوم في الطالع وسعره النهاردة مختلف تماما عن اسعار بكرة، وده خلي كل الناس تسأل توقعات الذهب في 2025 هتوصل لكام.. وهل اسعار الذهب هتنخفض ولا هتفضل في السما زي ما هي.. خليكم معانا للآخر وهتعرفوا التفاصيل
مفيش حد راهن عليه وخسر، وكل اللي احتفظ بيه كسبان، واللي استثمر فلوسه فيه حقق مكاسب كبيرة، وده فعلا اللي حصل في اسعار الدهب خصوصا ان اسعاره في خلال سنتين تلاتة وصلت للسما، وحقق مكاسب كبيرة جدا، وده خلي الناس كلها عينا عليه وكله بيسأل اية توقعات الذهب في الوقت اللي جاي
طيب اسعار الدهب بدأت بكام في سنة 2024؟.
مع بداية السنة الحالية مصر كان فيها سوقين للصرف، اولهم السوق الرسمي لصرف الدولار في البنوك الوطنية والتاني هو صرف الدولار في السوق السودا، وعلشان كده الدهب مع بداية 2024 وصل لأرقام تاريخية وسجل سعر عيار 21 والاكتر انتشارا في الاسواق وخصوصا في القري والمحافظات والصعيد 4100 جنيها وده سعر حتي الأن الذهب موصلش له بعد مرور 9 أشهر من بداية العام وكان الدهب في الوقت الحالي بيرتفع باراقام كبيرة وصلت في بعض الاحيان لـ100 جنية مرة واحدة، وكمان سعر عيار الذهب 24 سجل 4686 جنيه، وعيار 18 سجل 3514 جنيه .
مع بداية 2024 وبسبب الارتفاعات الكبيرة اسعار الدهب في عدد كبير من محلات بيع المشغولات الذهبية وقفت حركة البيع والشراء اكثر من مرة بسبب تذبذب الاسعار خصوصا أن الأسعار كانت بتقفز بطريقة كبيرة جدا وكانت غريبة علي سوق الدهب وفي بعض الأحيان كان بتراجع برضوا بشكل كبير، وعلشان كده في تجار كتير جدا رفضوا المجازفة باسثتمارتهم في سوق المعدن الأصفر ووقفوا تماما حركة البيع والشراء، وشعبة الذهب طلعت في الوقت ده ونصحت المواطنين بالتوقف عن شراء الذهب وقالت ان سعر الدهب حاليا اعلي بكتير من سعره الرسمي.
طيب اية توقعات ادهب في 2025 وهل هنشوف اسعار كبيرة للذهب زي بداية 2024؟
شعبة الدهب توقعت استمرار ارتفاع أسعاره في الربع الأخير من 2024، وكمان استمرار ارتفاعه مع بداية 2025، خصوصا أن العالم حاليا بيحصل فيه تغير جذري، وفي دول حاليا مرشحة متكونش علي الخريطة وطبعا التغيرات دي تاثيرها الكبير بيكون علي قطاع الطاقة، والتغيرات دي خلت دول كتيرة زي الصين والهند وتايوان تشتري دهب بكميات كبيرة جدا خصوصا أن الدهب هو الملاذ الأمن لاي بني أدم أو اي دولة علي الوجود.
شعبة الدهب قالت أن سعر جرام الذهب عيار 21 واللي هو عليه اقبال كبير جدا من المواطنين وهيسجل 5 الآف جنية للجرام، ومرشح كمان يكون اعلي من كده في حال الظروف الحالية استمرت كده ومحصلش هدوء وتغير نسبي للاحداث الحالية .
