اشربوا متخفوش.. الميه مفهاش حاجة ثامب.. أخطر إشاعة في مصر
الدواء فيه سم قاتل، لالا المياه المرة دي فيها سم قاتل وميكروبات اوعوا تشربوا من الحنفيات اشربوا مياه معدنية، لالا اغلوا المياه كمان، اللي هيشرب مياه من الحنفية هيموت..
سمعنا كلام كتير من امبارح والسوشيال ميديا مقلوبة، والتحذيرات مليه الدنيا وفعلا في ناس خافت تشرب ونزلت اشترت مياه وقالت بلاش ناكل المهم نجيب مياه معدنية عشان منموتش زي بتوع أسوان.
الشعب المصري بطبيعته وطيبته بيصدق اي كلام وبياخد احتياطاته كمان، لكن مجلس الوزراء علق على الكلام ده وقال كفاية شائعات يا جماعة، ناس عمالة تقول مياة الشرب اختلطت بالصرف الصحي ازاي الكلام ده هيحصل يعني
وكمان أكد أن منظومة مياه الشرب في مصر على أعلى درجة من السلامة وشبكة الصرف الصحي منفصلة تماما عن شبكة مياه الشرب، اشربوا براحتكم متخفوش ده احنا بلد الأمن والأمان ونيلنا بخير الحمد لله.
شركة المياه كمان أكدت على كلام الحكومة وقالت إن المياه كلها أمنة ومفيش منها أي خوف، وفي رقابة كمان من حماية المستهلك ووزارة الصحة على جودة المياه وسلامتها.
طبعا في الحالات اللي زي دي فيه ناس بتصيد في الميه العكرة وبيلاقوها فرصة لإثارة الخوف والرعب بين الناس وهز ثقتهم في الدولة والحكومة ويغرسوا فيهم دايما إن الدولة مخبية حاجة على الناس وإنه فيه كارثة والحكومة مش عاوزة تقول عليها وطبعا كتر ترديد الكلام دا بيخلي ناس تصدق وتخاف ولما الموضوع يكون ليه علاقة بالميه طبيعي يحصل قلق وذعر بين الناس.
مستنين نعرف رأيكم في الكلام ده هل بتصدقوا الشائعات وفعلا اشتريتوا مياه معدينة؟
