هو الدولار فعلا هيوصل 10 جنيه في السوق.. شوف المفاجأة
الدولار هيوصل 10 جنيه قريب جدا .. دي كانت تحليلات بعض خبراء الاقتصاد واللي انتشرت زي النار في الهشيم في الساعات الأخيرة على السوشيال ميديا.. خلونا نفكر بالراحة.. هو صحيح الدولار ممكن يوصل 10 جنيه في الأيام الجاية وليه وازاي وهل دا احتمال قريب ولا بعيد في الوقت الحالي.. تعالوا نشوف التفاصيل في الفيديو ده خليكم معانا للآخر.
معروف إن سعر الصرف للعملات بما فيها الدولار الأمريكي بيخضع لقانون العرض والطلب يعني لو الطلب عندك اكبر من المعروض النقدي يبقي سعر الدولار هيرفع والعكس صحيح لو الدولار متوفر بقوة في السوق المصرفي ومش عليه طلب كتير سعره هيفضل ينزل وممكن يوصل 10 جنيه وأقل كمان يعني الموضوع مش محتاج اجتهاد لكن ليه علاقة بمعادلة ثابتة عندك قد ايه ومحتاج تصرف قد ايه من الدولار وغير كده يبقي اجتهادات ملهاش اي لأزمة.
اومال إيه حكاية الدولار أبو عشرة جنيه دا؟
الحقيقة في الكام ساعة اللي فاتت انتشرت اخبار مسنودة لخبراء اقتصاد أن الدولار هيوصل 10 جنيه في الفترة الجاية والحقيقة دا كلام بعيد عن المنطق على الأقل في الوقت الحالي لأن لسه موصلناش لمرحلة العرض أكبر من الطلب خاصة أنه تقدر تقول إن لسه الدولار في مستوى عالي من الأسعار بسبب احتياجات الدولة من العملة الأمريكية سواء للاستيراد أو لسداد الديون وسد بقية الفجوة الدولارية في السوق ودا غير مستحقات الشركات العالمية وشفنا مصر دفعت مليارات زيادة من الدولار لاستيراد شحنات غاز إضافية لمنع قطع الكهرباء في الشتا اللي جاي وغير سداد أقساط للشركات الأجنبية والحاجتين دول كلفوا الدولة حوالي 3 مليار دولار ونص وتقدر تقول إن دي مدفوعات اضطرارية ومكنتش في الحسبان ودا غير المطلوب من الدولة في التزامات الديون الخارجية وفاتورة ضخمة من الاستيراد بخلاف حاجة المستوردين ورجال الأعمال وأصحاب الشركات للعملة الأمريكية لشراء مستلزمات الإنتاج يعني باختصار لسه فيه طلب زيادة على الدولار فموضوع أنه يوصل 10 جنيه في القريب العاجل دا صعب جدا .
الرئيس التنفيذي للبنك الأهلي المصري، ورئيس اتحاد البنوك المصرية محمد الإتربي، كان ليه تعليق مهم على موضوع الدولار أبو 10 جنيه دا وقال إنه يتمنى دا يحصل لكن للاسف أمر غير متوقع في الوقت الحالي وقال إن قرار البنك المركزي المصري بتحرير سعر الصرف في مارس اللي فات، كان له آثار إيجابية لأنه نهى على السوق السوداء وأعاد الحياة إلى القطاع المصرفي بالعملة الصعبة.
الإتربي من الناحية التانية اتكلم عن وفرة الدولار في البنوك المصرية خلال الفترة الحالية و البنوك قدرت توفر العملة الصعبة لكل المستوردين وأصحاب المصانع لاستيراد المواد الخام، حتى لا تتوقف عجلة الإنتاج وإن استخدام البنك المركزي المصري لادواته بكفاءة بعد تحرير سعر الصرف أعاد تحويلات المصريين بالخارج للقطاع المصرفي بصورة طبيعية، واللي ارتفعت للشهر الخامس على التوالي خلال يوليو اللس فات بنسبة 86.8 في المئة وسجلت 3 مليارات دولار، وبكده سجلت التحويلات خلال الأشهر السبعة الأولى من 2024، زيادة 32.4 في المئة لتصل إلى 15.5 مليار دولار، مقابل 11.7 مليار دولار خلال الفترة ذاتها من العام السابق.
رئيس اتحاد بنوك مصر طمن الناس وقال إنه طول ما فيه تدفقات دولارية كبيرة هيحصل استقرار في سوق الصرف وسعر الدولار.. في نفس الوقت فيه رأي شايف إن سعر الدولار هيرجع ينزل الفترة الجاية بعد صفقة رأس بناس وتوقعات التوقيع على صفقات استثمارية مع السعودية تتراوح بين 10و15 مليار دولار خلال زيارة بن سلمان للقاهرة الأيام الجاية وغير تخطيط الحكومة لجمع 3 مليار دولار من سوق السندات الدولية في اسرع وقت بعد قرار مجلس الاحتياطي الفيدرالي الأمريكي بخفض سعر الفايدة.
