انفراجة كبرى في أزمة شح العملة.. شوف الدولة هتجيب مليار دولار منين ؟
تشجيع الاستثمار واحد من اهم البنود اللي الحكومة شغالة عليها في الوقت الحالي، وأخذت إجراءات كتيرة لزيارة التدفقات الاستثمارية اللي جاية لمصر من الخارج.. يا تري مصر مستهدفة كام في العام الحالي.. وايه هي العوائق اللي واقفه في طريق زيادة الاستثمارات الاجنبية في مصر؟
الدولة المصرية أخذت اجراءات كتيرة علي مدار الشهور اللي فاتت لتحسين وتيرة الاقتصاد المصري، وخصوصا الاجراءات اللي اقرتها الحكومة في شهر مارس واللي تضمنت تحرير سعر صرف الجنية المصري بشكل كامل قدام الدولار الأمريكي، والقرار ده كان له مفعول السحر في انتهاء وجود السوق السودا في التجارة بالعملة، واللي طبعا كانت بتهدد وجود الاقتصاد المصري بشكل كامل، ولو لا قدر الله كملت لحد دلوقتي كان الوضع تغير تماما واسعار السلع كانت هتوصل لارقام خيالية، وكان الاقتصاد المصري بشكل عام مش هيكون موجود .
وزي ما احنا عارفين كمان ان بداية التعديل والاصلاح الاقتصاد كان مع توقيع الحكومة لصفقة الاستثمار السياخي في راس الحكمة واللي دخلت استثمارات نقدية مباشرة لخزينة البنك المركزي باجمالي 35 مليار دولار، واللي وفرت رصيد كويس في البنوك للمستوردين والتجار وأمنت عمليات استيراد السلع من الخارج وعملت استقرار في السوق المصري.
طيب اية اللي بتعمله مصر حاليا علشان تأمن احتياجاتها من العملات الأجنبية ؟.
المهندس حسن الخطيب وزير الاستثمار والتجارة الخارجية قال أنه تم جذب استثمارات أجنبية مباشرة بقيمة 10 مليارات دولار في السنة اللي فاتت، وحاليا الدولة بتستهد الوصول جذب استثمارات أجنبية مباشرة بتتراوح ما بين 10 الي 15 مليار دولار في العام المالي الحالي .
وزير الاستثمار والتجارة الخارجية كمل كلامه وقال أن الوزارة بتستهدف الانتهاء من اتفاقية تشجيع الاستثمار الثنائية مع السعودية في خلال أسبوعين، خصوصا أن الاتفاقية هتكون صفحة جديدة للعلاقات المصرية السعودية، وهيكون معاها حلول كتيرة لاي مشاكل بتواجه المستثمرين السعوديين لدخولهم وعمل استثمارات جديدة في مصر .
الخطيب كمل كلامه وقال أنه في إقبال كبير من الشركات الأجنبية للتواجد في السوق المصرية من دول تركيا والصين والخليج الإمارات والسعودية خصوصا في مجالات الاجهزة الكهربائية وضفائر السيارات اللي بيوجد منها جزء مكون محلي كبير.، وان الحوافز الموجدة حاليا في قانون الاستثمار مش كفاية لجذب المزيد من المستثمرين، والوزارة بتحاول بكل الطرق أنه تتوسع في منح الحوافز الاستثمارية لجذب المستثمرين من كل دول العالم لاقامة مشروعات في مصر .
الخطيب قال برضوا انه يتم حاليا تقييم الرخصة الذهبية لتحديد فرص التوسع فيها في كل القطاعات، خصوصا أن التوترات الجيوسياسية اللي حصلت في المنطقة العربية حطت كل الدول في موقف مصر، لكن مصر بتحاول بكل الطرق زيادة توطين الصناعة بكل أنواعها خصوصا أن الدولة والقيادة السياسية شغالين بكل قوة حاليا علي زيادة فاتورة الصادرات وتقليل الورادات واستقرار الميزان التجاري للدولة .
