هل وزارة التموين هتحذف اللي عنده تكييف من الدعم؟.. اعرف الحقيقة

يا ترى إيه قصة إن وزارة التموين هتحذف أي حد عنده تكييف من الدعم، هل هي حقيقة ولا إشاعة، وايه هو رد الوزارة على الكلام ده.. هنقولك كل التفاصيل في الفيديو ده. 
 

في الساعات الأخيرة، ناس كتير اتداولت على السوشيال ميديا، إن وزارة التموين هتحذف أي حد عنده تكييف، ومش هيبقي له لا تموين ولا عيش مدعم.

ومن هنا، رد الدكتور شريف فاروق، وزير التموين والتجارة الداخلية، وقال إن الكلام ده مش صحيح، ومافيش أي معايير جديدة للعدالة الاجتماعية تم إقرارها.

الوزير أكد كمان، إن اللي بيتقال بأنك لو عندك إنترنت أرضى هتتحذف من التموين، مش صحيح هو كمان،  وهو مايعرفش مين مصدر الشائعات دي، وإن الوزارة لم نقر أي معايير جديدة، ولا يوجد حذف لأي مواطن من البطاقة التموينية.

وعن معايير العدالة الاجتماعية فالأكيد أنها مش هتتغير، وأي قرارات جديدة هتتعلق بالحذف من التموين لازم تتعرض على لجنة العدالة الاجتماعية، أولا قبل إقرارها، وطبعا ده لأنها عندها مجموعة معايير وضوابط لاستبعاد غير المستحقين من الدعم التمويني، زي مثلا جوانب اقتصادية واجتماعية عشان تضمن وصول الدعم إلى مستحقيه الفعليين.

ومن ضمن محددات الاستبعاد من التموين، هو الدخل الشهري، فببتم استبعاد الأسر اللي بيزيد إجمالي دخلها الشهري عن 15,000 جنيه مصري.

كمان بيتم استبعاد أصحاب فواتير المحمول اللي بتزيد على 6,000 جنيه، ضيف على كده كل  اللي بيمتلك عربية تزيد سعتها عن 1600 سي سي.

وكمان بيتم استبعاد الأسر اللي أولادها بيتعملوا في مدارس دولية أو مدارس خاصة تتجاوز مصروفاتها 20,000 جنيه سنوياً، بالإضافة لكل شخص بيتملك عقارين فأكثر، خاصة إذا كان أحدهما في المناطق الجديدة أو السياحية.

ووزارة التموين بتستبعد الأسر اللي بيزيد معدل استهلاكها من الكهرباء شهرياً عن 650 كيلو وات، وأي حد بيمتلك أراضي زراعية تتجاوز 10 أفدنة، وكذلك أصحاب السجلات التجارية اللي بتتجاوز مبالغ مالية كبيرة، وأصحاب الضرائب اللي بتزيد عن مليون جنيه، وأي حد بيسرق كهربا.

ومن ناحية تانية، انهاردة وزير التموين قال إن الاحتياطي الاستراتيجي من محصول القمح هيكفينا لمدة 6 أشهر، ولسه الوزارة بتنسق مع جهات كتير عشان تقدر توصل إلى الكميات الاستراتيجية الآمنة من جميع السلع الاستراتيجية، خاصة من القمح، سواءً من خلال السوق المحلي، أو من خلال الاستيراد من الخارج.

وده بيجي تنفيذًا للتوجيهات الرئاسية، مع التوسع في إنشاء الصوامع، للحفاظ على الأمن الاستراتيجي الغذائي.

في نفس الوقت، بيتم مراجعة جودة المعروض من الدقيق لأصحاب المخابز، والنظر في كل الطلبات من خلال اللجنة المعنية بكده برئاسة نائب الوزير، للنظر في الشكاوى والطلبات الجديدة.

كمان وزارة التموين بتعمل معارض سلع مخفضة دلوقتي، ودي بتعتبر من أهم الخدمات اللي بتقدمها الغرفة لأكثر من 70 ألف تاجر وصانع ومؤدي خدمة بمختلف مراكز وقرى المحافظة، وده بيجي في سياق تعزيز الاقتصاد المحلي والتنمية المستدامة، وتعزيز الاستثمارات وجذب رؤوس الأموال، وتشجيع الفرص التصديرية، وكل ده بيسهم في تعزيز الاستقرار الاقتصادي.