الخير جاي من الصين.. إيه حكاية المنتدي الصيني الأفريقي

جذب وتشجيع الاستثمارات واحد من اهم اهداف الحكومة في الفترة الحالية خصوصأ أن مصر بتستهدف تحقيق رصيد دولاري في خزينة البنك المركزي، والهدف ده هيكون بداية تحقيقه عن طريق الصين.. اية اللي مصر بتعمله مع الصين.. واية الهدف من الشراكة مع الصين في الوقت الحالي
 

الايام دي الدكتور مصطفي مدبولي رئيس مجلس الوزراء مسافر في زيارة خارجية لدولة الصين علشان يحضر المنتدي الصيني الافريقي نيابة عن الرئيس عبدالفتاح السيسي اللي هو كمان في زيارة خارجية مهمة لدولة تركيا علشان يبحث العلاقات المصرية التركية في كل المجالات خصوصا العلاقات السياسية والاقتصادية بين البلدين .
طيب اية هدف الحكومة من المشاركة في المنتدي الصيني الافريقي ؟.
طبعا كلنا عارفين أن الصين هيا المستفيد الاول من دول القارة الافريقية، خصوصا أن دول القارة السمراء مليانة بالمناجم والمواد الخام وكل اللي هتحتاجه الصناعة على مستوى العالم، خصوصا أن الصين طبعا هيا البلد الصناعية الاولي علي مستوي العالم واللي بيوصل حجم صناعتها سنويا لـ7 تريليون دولار، والمنتدى ده  بيحقق تقارب للمصالح المشتركة لجميع الأطراف.
طيب ليه مصر بتشارك في المنتدي ده؟.
مصر من خلال مشاركتها في منتدي الأعمال الصيني الأفريقي بتحاول أنها تكون بوابة لمرور السلع الصينية من خلال التعاون في الصناعة، ده غير أن الصين بتبص لمصر علي أنها مركز لوجيستي عالمي لكل المواد الخام والمعادن النفيسة، ده غير الشراكات الكبيرة اللي بقت موجودة بين مصر والصين في مختلف الصناعات المعدنية والكيماوية والسيارات وانواع كتيرة تانية من الصناعة والعلاقات التجارية والاقتصادية بين البلدين .

وزي ما احنا عارفين أن الصين في الوقت الحالي واحد من أهم الشركاء المعماريين في عمليات التطوير وإنشاء المدن وخصوصا الشراكة مع الهيئة الهندسية ووزارة الإسكان في إنشاء العاصمة الإدارية الجديدة، ده غير عقود الشراكة اللي وقعتها الدولة المصرية مع كبري الشركات الصينية في مشروعات النقل والسكة الحديد، ده غير الشراكة في مشروعات تنمية قناة السويس من خلال إنشاء المراسي الاقتصادية المختلفة اللي هتقوم بتقديم المساعدات اللوجستية للسفن اللي هترسوا لمدة 3 أيام لحين الحصول على تصريح للخروج.
طيب اجمالي الاستثمارات بين مصر والصين بتوصل لكام حاليا، وهل تستاهل تعزيز الشراكة بين البلدين؟.
مصر حاليا فيها 2418 شركة صينية بتسثمر فلوسها في مشروعات موجودة في مصر باجمالي رأس مال مصدر بيوصل لـ 1.1 مليار دولار، بيتركز منها نسبة 47% في النشاط الصناعي في مجالات الفايبر جلاس والأجهزة المنزلية والمنسوجات والصناعات الغذائية والأعلاف الحيوانية.
مش كده بس لأ ده في كمان 7 شركات صينية واللي اللي بيعتبروا من أكبر الشركات في العالم أكدوا اهتمامهم بالدخول للسوق المصرية والاستثمار فيها سواء من خلال نقل مصانعها أو إقامة توسعات لها في مصر بحجم استثمارات هتوصل لأ 5 مليارات دولار.
وطبعا كلنا عارفين أن المنطقة الاقتصادية لقناة السويس هيا المنطقة المحورية والمستهدفة لأغلب استثمار الشركات الصينية في مصر خصوصا أنها بتعد بوابة لنفاذ الاستثمارات الصينية لكل دول العالم من خلال المواني الموجودة علي شط القناة .