سر انخفاض الدولار.. مفاجأة في التدفقات

 

ايه سر استقرار الدولار وبعدين انخفاضه من بداية الأسبوع لغاية النهاردة وايه هي المفاجأة في السوق المصرفي وعلاقته بالتدفقات الجديدة.. خليكم معانا للآخر وهتعرفوا التفاصيل في الفيديو ده 
 

كلنا ملاحظين أن سعر الدولار في البنوك كان مستقر اليومين اللي فاتو عند متوسط 48.73 حنيه بالبنوك وبعدها نزل 5 قروش في منتصف تعاملات اليوم ليسجل 48.68 جنيه فياتري ايه السر؟
الحقيقة الموضوع مفيهوش سر ولا حاجة لكن مرهون بالعرض والطلب المعتمد على تحرير سعر الصرف من مارس اللي فات وطالما السعر نزل يبقي فيه زيادة في المعروض وانخفاض في الطلب والحقيقة كمان إن تحقيق المعادلة دي مجاش من فراغ لأن الدولة شغالة ليل نهار على قصة توفير الدولار من كل القطاعات الاقتصادية في البلد ودا غير خطط تانية لترشيده زي خطة توطين الصناعة أو تصنيع الدولار زي ما قال الفريق كامل الوزير وزير الصناعة ودي هتفيد البلد من ناحيتين أولها توفير الدولار اللي كان بيروح في الاستيراد وتاني حاجة توفير الدولار من التصدير وتوفير فرص عمل جديدة وضمان ضخ سيولة دولارية كبيرة في سوق الصرف.

والحقيقة اللي بيحصل في ملف الصناعة لوحدة معجزة دلوقتي وشفنا حالة الحراك الكبيرة في الملف ده من ساعة ما الفريق كامل الوزير مسك وزارة الصناعة وازي بينهي كل العقبات قدام المصنعين المصريين والمستثمرين الاجانب وكمان الدكتور مصطفى مدبولى رئيس مجلس الوزراء قال إن الحكومة هتجتمع أسبوعيًا مع كبار مصنعى السيارات لزيادة عمليات التوطين ودا ضمن خطة توطين صناعة مهمة جدا عالميا وتحويل مصر لمركز صناعي تستفيد بيه من خلال موقعها الجغرافي الفريد وكمان من بنيتها القوية في المواني والطرق وخطوط التجارة الدولية على أراضيها واللي بتمر من بحارها ودا كله في النهاية بيصب في هدف توفير الدولار باستمرار.

كمان فيه سبب تاني لانخفاض سعر الدولار في الأيام اللي فاتت وهو التحسن الكبير في القطاع المصرفى فيما يتعلق بالتدفقات من العملة الأجنبية ، خاصة مع عودة الاستثمارات فى أدوات الدين وبخلاف الزيادة فى حجم تحويلات المصريين فى الخارج  إلى جانب صفقة رأس الحكمة اللي ساهمت جميعها بشكل كبير فى حدوث وفرة من العملة الأمريكية.

مش كده وبس دا كمان  استثمارات الأجانب فى أذون الخزانة المحلية  قفزت إلى 37.5 مليار دولار بنهاية مايو الماضي، من 35.2 مليار فى أبريل، وما حسب النشرة الإحصائية الشهرية للبنك المركزى المصري وزادت جاذبية أدوات الدين المحلية قصيرة الأجل أمام المستثمرين بعد التعويم، و عزز من ثقتهم توصيات مؤسسات جى بى مورجان وسيتى جروب بشراء أذون الخزانة بالجنيه لأجل عام.. ودا غير ارتفاع ايرادات السياحة المصرية والتدفقات الاستثمارية الكبيرة في الفترة الأخيرة.