لو عايز تشتري عربية بأطول فترة سداد.. شوف الفيديو ده
لو نفسك تجيب عربية من خلال قرض، إيه أفضل قروض السيارات اللي بتقدمها البنوك دلوقتي، وهل فترات السداد بتبقى طويلة ولا متوسطة ولا قصيرة، وإيه هي الضمانات المطلوبة.. هنقولك كل التفاصيل في الفيديو ده.
دلوقتي، البنوك المصرية بتقدم برامج متنوعة للتمويل، واللي منها قرض السيارة، ومن هنا ناس كتير بتفضل تاخد قرض بأطول فترة سداد في المدة عشان يكون القسط مناسب.
أول البنوك اللي بتقدم قروض السيارات، البنك الأهلي المصري، واللي ببيدأ من 20 ألف جنيه لحد مليون جنيه، وبفترة سداد 7 سنوات.
كمان، بنك تنمية الصادرات، بيقدملك قرض العربية 30 ألف جنيه لحد مليون ونصف المليون جنيه حسب فئة العميل، وهنا بتبقى فترة السداد على أقساط لمدة 8 سنوات.
كمان، بنك القاهرة بيقدم قرض من 15 ألف جنيه حتى 6 ملايين جنيه حسب شريحة العميل، وبمدة سداد القرض بتكون 8 سنين.
نقدر نقولك كمان، إن بنك الإسكندرية هو كمان ضمن قايمة البنوك اللي بتقدم قرض السيارة، واللي بيبدأ فيه من 15 ألف جنيه لحد مليون جنيه، وبفترة سداد 8 سنين.
ضيف كمان عندك بنك الاستثمار العربي، اللي ممكن يديك 5 مليون جنيه عشان تشتري عربية أحلامك، واللي فترة سداد القرض ده بتكون 7 سنين.
حضرتك هنا، ممكن تشوف القرض المناسب لإمكانياتك وتلم ورقك واطلع على البنك.
وقبل نهاية الفيديو، هنقولك شوية نصايح في حالة إنك أخدت القرض وعايز تشتري عربية جديدة
أولاً: لازم تحدد الميزانية اللي هتشتري بيها العربية، أو المبلغ المادي، كمان لازم تحدد المبلغ اللي تقدر ت تحمله من تكاليف شهرية للسيارة.
ابحث كويس عن النماذج المفضلة ليك وقارن بين العروض المتاحة، ودور على الإنترنت عن الموديلات والأسعار وكمان اطلع على التقييمات والاستعراضات، واتحقق من الأسعار والمميزات للعربية اللي ناوي تشتريها.
تجربة القيادة مهمة جدا، فقبل اتخاذ قرار الشراء، لازم تعمل تجربة قيادة للعربية عشان تتأكد من راحتك وثقتك فيها.
كمان، حاول تكون مفاوض جيد واستخدم أسلوب الفصال بحكمة عشان تقدر توصل لأفضل سعر.
وعشان ماتتخمش ولا تضيع فلوسك، هنقولك شوية نصايح تانية قبل ما تشتري العربية، أولها انك لازم تختار المكان المناسب للشراء أو الأجنس الموثوق فيه، يعني لازم تكون عارف المكان اللي هتشتري منه كويس جدا ويكون ثقة وله اسم.
كمان حضرتك لازم تجمع أكبر قدر من المعلومات عن العربية اللي عايز تشتريها، سواء من خلال الإنترنت أو من خلال سؤال أهل الثقة والاختصاص، وكمان عشان ماتقعش فريس لجشع التجار، وماتنساش تاخد معاك أحد المختصين في السيارات أثناء الشراء، لأنه بيكون عنده علم ودراية بأجزاء السيارة والأعطال بتبقى فين، وكمان معاه أسعار السوق.
ادرس السوق وأسعاره كويس قبل ما تشتري، وجهز فلوسك وانزل اشتري بس ماتنساش تتأكد من مصداقية الورق والمستندات الخاصة بالعربية.
