مين بيلعب في سوق الدهب.. عودة عفاريت الصاغة

مهما كان اللي بيحصل في الاسعار العالمية فيه حاجة غريبة بتحصل في سوق الدهب وفيه اصابع خفية رجعت تعلب في سوق الصاغة والتسعير.. ايه اللي بيحصل بالظبط في سوق الدهب وسر الارتفاع الكبير في الاسعار.. كل دا هنعرفه في التقرير التالي خليكم معانا للاخر
 

النهاردة الدهب واصل ارتفاعه في مصر كالعادة وجرام 21 الشعبي في مصر قرب على حاجز 3500 جنيه وعيار 24 داخل بثقة على مستوى 4 آلاف جنيه  ودا خلي الناس وحتى التجار يفتكروا أيام الازمات اللي كانت في 2023 واللي بسببها كان بيوقف التسعير بسبب الارتفاعات السربعة في سعر المعدن الاصفر واللي كان وقتها معروف إن فيه مضاربات وتلاعب واحتكار وتسعير اجباري في سوق الصاغة وقت ما كان للدولار أكتر من سعر قبل التعويم.
النهاردة رجعت عفاريت الصاغة تلعب في السوق من تاني بس المرة دي بعيد عن الدولار وقرروا الاستفادة من هوجة الارتفاع في السوق العالمي عن طريق تخزين الدهب وتقليل المعروض ودا اللي بيأكده تجار دهب ومواطنين كمان عشان التجار الكبار يرفعوا ارباحهم. 
خبراء الدهب شايفين إنه ررغم ارتباط تسعير المعدن النفيس في مصر بعوامل عالمية ومحلية واضحة على غرار سعر الصرف وسعر الدهب العالمي والعرض والطلب، لكن أسعاره في السوق بتشهد ارتفاع غير مبرر وغير متناسب مع هذه العوامل.

رئيس الشعبة العامة للمشغولات الذهبية باتحاد الغرف التجارية هاني ميلاد شايف إن زيادة الأسعار في الفترة الاخيرة راجعة إلى الإقبال الكبير على شراء الدهب، اللي بيصنف كملاذ آمن عند وجود أزمات، بعد الانخفاض في سعر صرف الجنيه أمام الدولار بداية الشهر الجاري.

وتوقع خبير الدهب  استمرار ارتفاع أسعار الدهب خلال 2025... وفيه ناس تانية شايفة إن الأسعار في الأيام اللي فاتت قفزت نتيجة زيادة الطلب الناتج عن القلق من الانهيار اللي أصاب الأسواق المالية العالمية والمحلية الأسبوع الماضي، كمان أثر انخفاض سعر صرف الجنيه على معنويات السوق، بسبب مخاوف من استمرار صعود الدولار نتيجة شائعات انتشرت بشأن احتمالية حدوث تعويم جديد.

أحد تجار الدهب بالقاهرة فجر مفاجأة عن ممارسات وتلاعب بيتم في الصاغة منها تقليل المعروض زي ما قلنا وحاجة تانية اخطر وهي اتجاه تجار حالياً إلى تصدير المشغولات الدهبية إلى الخارج والاحتفاظ بيها بره البلد.. ودا بسبب خوفهم من الأحداث العالمية الاقتصادية والسياسية الأخيرة

شعبة الدهب طلبت من الحكومة عودة العمل بمبادرة اعفاء الدهب القادم مع المغتربين من الرسوم والجمارك لضبط الاسعار وزيادة المعروض .. وزي ما احنا عارفين إن رئيس الوزراء مصطفى مدبولي أصدر في مايو 2023، قرار بإعفاء واردات الدهب الخاصة بالمصريين العائدين من الخارج من الضريبة الجمركية والرسوم الأخرى لمدة 6 أشهر، ثم تم تمديدها حتى مايو الماضي.

والحقيقة المبادرة حققت تغيير  كبير وتوازن في الاسعار وقتها ودخل البلد أكتر من 4 طن من الدهب لكن تصادف توقف العمل بالمبادرة مع انخفاض أسعار الدهب في مصر، ودا فتح الباب أمام تصدير الجهب للخارج، وفيه أكتر من طن دهب خرج في الفترة من مايو وحتى نهاية يوليو اللي فات.

وحسب  بيانات صادرة عن مجلس الذهب العالمي مشتريات المصريين من السبايك الدهبية انخفضت خلال النص الأول من السنة بنحو 31%، مسجلة 12.8 طن.