إيه اللي هيحصل لأسعار الدهب في مصر في شهر 9 و10 الجايين؟
هو إيه اللي بيحصل لأسعار الدهب في السوق المصري، وليه الأسعار كل شوية في الطالع وكل ساعة بسعر، وهل ممكن تتوقف موجة الارتفاعات في أسعار المعدن الأصفر الفترة الجاية.. هنقولك كل التفاصيل في التقرير التالي.
سوق الصاغة دلوقتي مرتبك جدًا، لأن سعر الدهب بيشهد حالة من التذبذب أو عدم الاستقرار، امبارح كان بسعر وانهاردة بأزيد منه أكتر من 50 جنيه، عشان كده في تجار لجأوا لغلق المحلات ووقف حالات البيع والشراء تجنبًا للخسائر، لكن في تجار تانيين شايفين إن الوقت ده هو الأنسب للبيع.
.
وكمان سجلت أسعار الذهب محليا زي ما قالت الشعبة العامة للذهب والمجوهرات التابعة للغرف التجارية، نحو 2431 دولارا للأونصة، أما بالنسبة للذهب عيار 21 فبلغ محليا 3470 جنيها للشراء، و3450 للبيع.
وبالنسبة لسعر الذهب العالمي، فبيشهد دلوقتي تباين في الأسواق العالمي ، خاصة مع اقتراب صدور بيانات التضخم أو ارتفاعات الأسعار للسلع في الولايات المتحدة المقرر صدورها خلال الأسبوع ده، وده بيجي لتقدير حجم خفض أسعار الفائدة المحتملة واللي هيتم إقراره من قبل البنك المركزي الأمريكي في سبتمبر المقبل.
وفي الحقيقة، أسعار الذهب العالمية حققت ارتفاعات قوية خلال الأيام الأخيرة، وده انعكس على السوق المحلي المصري، واللي سجل ارتفاعات هو كمان خلال الأيام الأخيرة للمعدن النفيس.
كمان، نصة "جولد بيليون" المتخصصة في الدهب، توقعت إن الأسعار المحلية في مصر هتحصل لها تغييرات في الأيام المقبلة، خاصة بعد ما طالبت شعبة الذهب الدولة بإعادة تطبيق مبادرة زيرو جمارك، واللي سمحت بدخول حوالي 4.6 طن من الدهب عند تطبيقها لمدة سنة، وده المفترض أنه هيعمل على تحقيق توازن بين العرض والطلب في السوق المحلي.
أما بالنسبة للطلب المحلي على الدهب، فشهد ارتفاع في مصر في الأيام الأخيرة، مقارنة بأي فترة تانية، وكان السبب هو ارتفاع سعر أونصة الذهب العالمي لمستويات تاريخية، بالإضافة لتزايد التوترات الجيوسياسية المحيطة بمصر، واللي بيحصل في المنطقة زي فلسطين.
طب التوقعات رايحة فين، والأسعار الأيام الجاية هتكون كام؟
بص يا سيدي، كل التوقعات بتقول إن الأسعار هترتفع، ومتوقع جرام 21 يسجل 4 آلاف جنيه صافي في الشهرين الجايين سبتمبر وأكتوبر، وكمان يسجل الجرام حوالي 6 آلاف جنيه بنهاية السنة دي 2024.
وكمان، بتيجي من ضمن الأسباب اللي تخلي الناس والمستثمرين يشتروا الدهب عشان هو ملاذ آمن وأكتر حاجة تحفظ قيمة فلوسك بدون خسارة، لذلك الإقبال على الشراء في ظل الظروف المضطربة بيكون كتير، وكلما زاد الشراء ارتفع الثمن.
كما الضغوط البيعية اللي بتحصل في الأسواق العالمية دلوقتي ساهمت في حدوث تذبذب قوي لأسعار الدهب الفترة دي في ظل ارتفاع سعر الدولار، واللي ممكن يستمر للفترة الجاية، عشان كده متوقع جدا سعر إن الأسعار تبقى في الطالع وماتنزلش.
