ليه مصر بتستورد قمح بكميات ضخمة.. رقم خرافي في 5 شهور

يا ترى ليه مصر بتستورد كميات ضخمة من القمح فى الشهور الأخيرة ؟وايه علاقة ده باللى بيحصل بين ايران واسرائيل ؟ وايه تأثيره على فاتورة الواردات المصرية؟

وفقا لبيانات واحصائيات رسمية مصر أنفقت أكتر من 2 مليار دولار على استيراد القمح خلال أول 5 شهور من 2024 بزيادة تتجاوز 38% عن المبلغ المنفق على نفس البند خلال نفس الفترة السنة اللى فاتت  بينما طلبت شحنات قياسية تانية فيما وصفه البعض بأنه تحوط من تصاعد الاضطرابات بالمنطقة.

وحسب بيانات الجهاز المركزي للتعبئة العامة والإحصاء ارتفعت قيمة واردات مصر من القمح خلال الفترة من يناير وحتى مايو لتسجل نحو 2.011 مليار دولار.. والرقم ده بيمثل ارتفاع بقيمة 559.182 مليون دولار لو اتقارن بالمبلغ اللى تم انفاقه في نفس الفترة من العام الماضي والبالغ 1.452 مليار دولار، وفقا لبيانات الإحصاء.
بيانات جهاز الإحصاء إلى كشفت كمان أن واردات القمح ارتفعت في مايو الماضي إلى 658 مليون دولار، مقابل 259 مليون دولار في نفس الشهر من عام 2023، بزيادة بلغت نسبتها 153%. .. وده فى وقت طرحت مصر فيه مصر قبل أيام ممارسة دولية هي الأكبر ليها على الإطلاق لشراء 3.8 مليون طن من القمح.

طب ليه مصر بتشترى الكميات الضخمة دي من القمح؟

فيه تفسيرات كتيرة لتحرك الحكومة فى الملف ده وبعض الخبراء شايفين إن الحكومة المصرية بتسعى للاستفادة من تراجع الأسعار العالمية للقمح إلى أدنى مستوياتها في اخر 4 سنين وبيوقوا انها لو نجحت في شراء القمح بأسعار منخفضة ممكن ده يساعدها في دعم الاقتصاد وتوفير مليارات الدولارات مستقبلا.

ومن أيام أعلن وزير المالية أحمد كجوك في مؤتمر صحفي إن المسؤولين في الحكومة بيحاولوا يغتنموا الفرصة لشراء احتياجات مصر من القمح في ظل الوضع الحالي بالسوق العالمية.

وفيه تفسيرات تانية بتقول ان مصر بتعمل كده من باب التحوط خصوصا مع اشتعال الصراع فى منطقة الشرق الاوسط واماكانية تصاعد الأمور خلال الشهور الجاية .. وخد بالك مش بس واردات القمح اللى زادت  بيانات الإحصاء كشفت كمان أن المنتجات البترولية بلغت قيمة وارداتها نحو 812 مليون دولار في مايو، مقابل 436 مليون دولار في شهر مايو 2023، بزيادة بلغت نسبتها 86% فى اطار سعي مصر بشكل دائم لتأمين احتياطياتها من الوقود والقمح وسلة من السلع الضرورية .

وفي يوليو اللي فات كشف تقرير لوزارة التموين والتجارة الداخلية أن مخزون القمح لدى الوزارة يكفي لأكثر من 6 شهور

ومصر واحدة من أكبر مستوردي القمح في العالم، لأنه المصدر الرئيسي للخبز المدعم اللى بتعتمد عليه ملايين الأسر المصرية في التغذية.. وبتستورد هيئة السلع التموينية وحدها حوالي 5.5 مليون طن من القمح سنويا لدعم الخبز وبتعمل الحكومة على تأمين جزء من احتياطياتها عبر توريد القمح المحلي من المزارعين.

وفي مايو اللى فات  أعلن رئيس الوزراء مصطفى مدبولي رفع سعر رغيف الخبز المدعم 300% إلى 20 قرشا اعتبارا من أول يونيو وقال أن تكلفة رغيف الخبر على الدولة 1.25 جنيه بينما تبيعه بـ 5 قروش.. وأكد أن قيمة الدعم السنوي للخبز في مصر تبلغ 120 مليار جنيه، والإنتاج اليومي يصل إلى 100 مليار رغيف.