نهاية هوجة الدولار.. إزاي البنك المركزي أجهض أكبر مؤامرة على الجنيه؟

أى حد متابع اللى بيحصل فى سوق صرف العملات الأجنبية أكيد لاحظ اللى حصل الأيام الأخيرة فى سعر الدور وازاى كان فيه محاولات خبيثة لنشر وبث الرعب بين المتعاملين والايحاء بان سعر العملة الأمريكية الفترة الجاية هيزيد وده طبعا خلا فيه طلب غير مبرر على الدولار وبدأت الأسعار تتحرك.. وطبعا البنك المركزي كان واعي جدا ومراقب اللى بيحصل وفعلا اتحرك على طول وقدر يجهض أكبر مؤامرة على الجنيه المصري.. فيا ترى ايه اللى بيحصل فى كواليس سوق صرف العملات الأجنبية وازاى البنك المركزي عرف يسيطر على الأوضاع؟

الأيام اللى فات فيه حاجة غريبة جدا بتحصل فى سوق صرف العملات الأجنبية..  وتحديدا من بعد موافقة صندوق النقد على المراجعة التالتة لبرنامج الاصلاح الاقتصادي وصرف شريحة جديدة من قرض ال 8 مليار دولار.. وبدل ما سعر الدولار يهدا والأمور تستقر اللى حصل العكس وسعر العملة الأمريكية كان كل يوم بيزيد

طب ليه ده بيحصل ؟

بص يا سيدي .. بعد الاعن الموافقة على المراجعة التالتة لبرنامج مصر الاقتصادي المسئولين فى صندوق النقد طلعوا وقالوا كلام عن ضرورة الاستمرار فى تطبيق سعر صرف مرن ناس كتير فهمت ان كده الصندوق مش راضي عن ادارة مصر لملف السياسة النقدية وان الدولار مش مقيم بسعره العادل .. وفي ردود سريعة على تلميحات صندوق النقد الدولي بشأن ضرورة الاستمرار في تطبيق نظام الصرف المرن سجل الدولار ارتفاعات مفاجئة مقابل الجنيه في التعاملات الأخيرة .. وتزامن ده مع خروج جزء من الأموال الساخنة من السوق وزيادة فى الطلب على العملة الأجنبية بعد شائعات عن ارتفاعات كبيرة فى الدولار مستقبلا.

وازاى الصندوق بيطالب بتطبيق سعر صرف مرن .. هلى الحكومة مش طبقته من مارس 2024 ؟

بالفعل البنك المركزي وفى اجتماع استثنائي للجنة السياسة النقدية قرر فى 6 مارس اللى فات تحرير سعر صرف الجنيه قدام العملات العربية والأجنبية وقال ان سعر العمل هيتحدد وفقا لاحتياجات السوق وقوانين العرض والطلب ومن يومها قفز سعر الدولار من 31 الى حدود 49 جنيه حاليا والبنك المركزي حاليا مش بيتدخل فى سعر الجنيه لكن الصندوق عاوز السياسة دي تستمر وعنده مخاوف ان الدولة ترجع تحط ايدها تانى فى سوق الصرف

بس التلميحات اللى اتقالت من مسئولى الصندوق عملت ربكة غير مبررة وادت انطباع ان مصر مش بتطبق سعر صرف مرن وخلت البعض يكون عنده مخاوف ان الدولار هيرتفع الايام الجاية فحل صلب متزايد على شراء العملة الأمريكية وده السبب فى الزيادات اللى حصلت فى سعر الدولار الفترة اللى فاتت

طب البنك المركزي بيتعامل ازاى حاليا فى الملف ده ؟

البنك المركزي كان ليه تحركات على الأرض فى سوق الصرف وزي ما قولنا لأنه بيطبق سعر صرف مرن بمجرد ما الطلب زاد على الدولار سعر العملة المريكية ارتفع والرفع ده كمان قلل من حجم خروج الأموال الساخنة لأن المستثمر الجنبي اللى باعلك الدولار ب 50 جنيه لو السعر فضل ينزل من مصلحته يبيع ويكسب يعنى يبيعلك الدولار ب 50 ويرجع يشتريه منك ب 47 مثلا هنا هو حقق مكاسب ضخمة فى فترة زمنية لا تتعدى 3 شهور

كمان البنك المركزي رد بأخبار سارة عن حصيلة النقد الأجنبي وأعلن ارتفاع تحويلات المصريين بأكتر من 65 % وكمان رئيس الحكومة طلع بنفسه وأكد الن الأموال الساخنة اللى خرجت من السوق لا تتعدى 8% من حجم الأموال الموجودة وأكد على نقطة مهمة جدا وهى ان مصر ما بتعتمدش على قلوس الاموال الساخنة فى حجم الاحتياطي وان اللى خرج منها خرج عن طريق السوق والبورصة .. يعنى المستثمرين اشتروا اسهم بقيمة معينة وباعوها مع هوجة البورصات فى العالم كله