فيديو|مدبولي يفضح شبكات المصالح في أزمة الدولار.. مفاجآت بالجملة

النهاردة الدكتور مصطفى مدبولي قال كلام خطير جدا ولاول مرة عن أزمة الدولار والخفايا والمؤامرات اللي كانت تحصل في السوق وكمان كشف دور أجهزة خارجية وأطراف داخلية لتعميق الأزمة لتنفيذ أجندات خارجية كمان مدبولي اتكلم عن حاجات كتير  مهمة في الشأن الاقتصادي خاصة ملف الديون الخارجية وأزمة اللاجئين والتضخم وجهود الحكومة.. واسرار كتير تانية .. هتلاقوها في الفيديو ده خليكم معانا للآخر
 

من اول أزمة الدولار في مصر واللي بدأت في فبراير 2022 مع الأزمة الروسية الأوكرانية ومفيش مسؤول مصري رفيع المستوى اتكلم بصراحة عن الأزمة وكشف ابعاد خطيرة فيها زي اللي كشفه النهاردة الدكتور مصطفى مدبولي رئيس الحكومة وكشف قد ايه البلد دي كانت مستهدفة والمطلوب أنها توقع .. تعالي نشوف مدبولي قال ايه.

مدبولي النهاردة عمل مؤتمر صحفي بعد اجتماع الحكومة بمقرها الصيفي في مدينة العلمين الجديدة وكشف إن فيه شبكات مصالح استفادت بشكل كبير بأرباح كبيرة جدًا من أزمة الدولار سابقًا.. والشبكات دي من مصلحتها العودة مرة تانية لتحقيق أرباح جديدة على حساب الشعب... دا كلام مدبولي بخصوص النقطة دي والحقيقة هي دي اهم حاجة قالها في المؤتمر كله لأنها يتكشف إبعاد المخطط الاسود اللي كان بيستهدف تركيع الدولة وتدمير اقتصادها.

لو فاكرين على مدار شهور أزمة الدولار بانكير قدم تقارير كتيرة جدا بالأدلة وشرح فيها تفاصيل كتير عن المخطط ده وشبكات المصالح اللي اتحدت كلها بهدف واحد وهو خلق حالة من الفوضى والهلع الاقتصادي ووقف التنمية وصولا لتسخين الشارع.. فاكرين لما قلنا إن الدولار في ذروة الأزمة كان يختفي حرفيا من السوق مش بغرض المتاجرة بيه لكن عشان يحصل تجريف للعملة والاسعار تولع في السوق السوداء والدولية متلاقيش دولار واحد تستورد بيه.. فاكرين لما قلنا إن فيه عصابات بتحول الدولار لدهب وتهربه للخارج عشان تعطش السوق اكتر واكتر.... وفاكرين كمان لما قلنا إن فيه تقارير مدفوعة بمبالغ ضخمة عشان تتنشر بالسلب ضد الاقتصاد المصري وترويج اشاعات وتوقعات غير واقعية عشان تدمر سوق الاستثمار.... وفاكرين لما انكلمنا عن الدور المشبوه لوكالات التصنيف العالمي عشان تضغط على الحكومة المصرية..

طيب فاكرين يامصريين الإعلامي اليهودي الشهير إياه لما قال ياتوافقوا على التهجير والتخلي عن محور صلاح الدين في غزة وإلا الدولار هيوصل 200 جنيه.... وفاكرين كمان لما شبكات وعصابات غامضة بقت تلم الدولار من المصريين بالخارج عشان تضمن مفيش دولار واحد يدخل البلد ويحرمها من اي فرصة للنجاة.. عشرات المؤامرات اللي اتكلمنا عنها هنا في بانكير بالتفصيل وهو دا اللي اتكلم فيه مدبولي النهاردة وكشف جزء منه وفيه تفاصيل كتير مقالهاش طبعا لأسباب تانية.

لكن الأهم ان البنك المركزي والأجهزة المصرية كانت صاحبة جدا للمؤامرات دي كلها وقطعت عليها الطريق بتحركات مسبقة ومدروسة وشفنا اكتر من إجراء اتخذه البنك المركزي للسيطرة على نزيف الدولار من ناحية ومن الناحية التانية اخترع مبادرات لضمان تدفق الدولار من قطاعات تانية ..
الدولار مكنش في حد ذاته هدف لإسقاط الدولة المصرية لكن كان وسيلة لتحقيق ده وجت على طبق من دهب لاهل الشر اللي اتحالفوا مع أجهزة خارجية وأطراف تانية معادية لمصر لكن في المقابل كانت فيه خلية نحل مش بتنام في غرف البنك المركزي ومتصلة بمصادر المعلومات رفيعة المستوى لرصد التحركات والمؤامرات واجهاضها أول بأول وقدر المركزي بحرفيته من القضاء على شبكة المصالح وبالعكس المركزي قدر يأدب كل الأطراف دي ويكبدها خسائر فادحة بعد نجاحه في إخفاء قرار التعويم في 6 مارس واللي بسبب شبكات المصالح دي خسرت ملايين الملايين بعد هبوط سعر الدولار وفضلهم في تصريفه بعد تضييق الخناق على غسل الأموال وأسواق الصرف.

نرجع بقي للي قاله مدبولي تاني النهاردة ومنها تأكيده إن البنك المركزي المصري ملتزم بالسعر الحر للعملات في سوق الصرف وحذر في الوقت نفسه من التطورات الخطيرة الأخيرة في المنطقة وقال إن محدش عارف بكرة فيه إيه ولا ايه اللي ممكن يحصل وجائز مصر تتعرض لأزمات تانية بسبب قربها من مناطق التوترات.
وشرح  رئيس الحكومة إن المجموعة الاقتصادية الوزارية حاليا بتقر  أجندة أولوياتها في المرحلة الحالية، لاستهداف التضخم من خلال وضع سياسات لكبحه لضمان شعور المواطن بانخفاض الأسعار.

وبخصوص الدين الخارجي فأكد مدبولي إنه مازال في حدود آمنة والاحتياطي النقدي يغطي 8 أشهر ودي مدة أول مرة يغطيها الاحتياطي النقدي واللي كانت مش بتزيد عن 6 شهور بس والأهم في ملف الديون دا اللي كشفه مدبولي بأن فيه استراتيجية واضحة في التعامل مع الديون الخارجية لضمان تراجع المديونية الخارجية وعشان الديون تكون في حدود آمنة ..
وشرح رئيس الحكومة إن ديون الدولة الخارجية مربوطة بسعر فايدة عالمي، ودلوقتي الفايدة العالمية ارتفعت، ودا بيزيد من أعباء الدين الخارجي وكل دول العالم اتأثرت وطمأن مدبولي المصريين لما قال الحمد لله الأوضاع الاقتصادية مستقرة، واستوعبنا تمامًا الهزات الاقتصادية التي حدثت على مدار الأسبوه وإن اقتصاد الدولة  قادر على التعامل مع هذا الأمر بمنتهى الاحترافية، ولدينا الموارد المالية والنقدية التي تمكننا بالتزامن مع خطط زيادة الصادرات بشكل كبير لتعظيم موارد مصر من العملة الصعبة ..

ورد مدبولي على أنباء خروج مبالغ ضخمة من الاموال الساخنة وقال إن كل اللي خرج مايتعداشمن 7-8% من إجمالي الأموال الموجودة في السوق في ذلك الوقت.. وكمان اتكلم عن أزمة ارتفاع أسعار ايجارات العقارات وقال إن الحكومة مش هتقدر تتدخل لأن دي سياسة السوق والعرض والطلب وإن ضيوف مصر عليهم التزامات زي ما الدولة ما بتوفرلهم كل احتياجاتهم..
الخلاصة من كلام مدبولي إن مصر بخير والوضع الاقتصادي تحت السيطرة وإن الأزمات الكبيرة مش هترجع تاني وإن اللي جاي أفضل بكتير ومصر دخلت مرحلة التعافي والديون في الامان والدولار مش هيتجنن تاني والاسعار قربت تستقر وتنزل