مكاسب أضخم مشروع لإنتاج الوقود في الصعيد.. هيكفي ويوفر الدولار

يا ترى إيه قصة أضخم مشروع لإنتاج الوقود اللي بتنفده الحكومة في الصعيد، وليه الحكومة مركزة أوي دلوقتي في ملف الطاقة، هل الموضوع له علاقة بأزمة انقطاع الكهرباء اللي عانينا منها سنة كاملة، ولا الهدف توفير العملة الصعبة اللي هي الدولار.. هنقولك كل التفاصيل في الفيديو ده. 
 

من ساعات، وزير البترول والثروة المعدنية المهندس كريم بدوي، تفقد مجمع إنتاج السولار والمنتجات البترولية عالية الجودة بشركة أسيوط لتصنيع البترول «أنوبك».

ومجمع السولار ده أخد ضجة كبيرة على السوشيال ميديا وكمان بين المهتمين بالطاقة، لأنه ببساطة أول وأضخم مجمع لإنتاج السولار في مصر، وكمان هيوفر احتياج الصعيد من المنتجات البترولية.

كمان المجمع ده بيصنف بأنه أكبر وأضخم مشروع لتكرير البترول في الصعيد أو جنوب مصر، لأن استثماراته بتوصل ل 3.1 مليار دولار.

ومن أهم أهدافه أنه هيعظم الاستفادة من موارد الدولة، باستخدام أحدث التكنولوجيات لتكرير البترول، وكمان بيشتغل بتقنية التكسير الهيدروجيني للمازوت منخفض القيمة عشان يحوله لمنتجات بترولية عالية القيمة.

طب هل يا ترى المجمع ده.. هيكفي احتياجات السوق المحلي في الصعيد؟

بص يا سيدي، المجمع بالتأكيد هيلبي احتياجات السوق المحلي في الصعيد، وخاصة السولار اللي هينتجه بالمواصفات الأوروبية، وكمان البنزين عالي الأوكتين، أما الطاقة الإنتاجية للمجمع فهتبلغ 2.8 مليون طن سولار سنوياً.

ومن المقرر إنه ينتج البنزين عالي الأوكتين بطاقة إنتاجية إضافية تبلغ 400 ألف طن سنوياً، وكمان هينتج المجمع 100 ألف طن بوتاجاز سنوياً، و300 ألف طن فحم سنوياً، و66 ألف طن كبريت سنوياً، ضيف على كده إن نسبة المكون المحلي في المشروع إلى أكثر من 40%.

وعشان الحكومة مهتمة جدا بملف الطاقة والمشروعات الجديدة في هذا القطاع، فانهاردة، علاء البطل الرئيس التنفيذى للهيئة المصرية العامة للبترول، عمل زيارة مفاجئة لمنطقة السويس البترولية، واللي شملت شركتي النصر ومصر للبترول.

وكان هدف الزيارة متابعة الموقف التنفيذى لمشروع وحدة استخلاص البوتاجاز الجديدة VRU ، لأن المشروع ده يهدف إلى تعظيم إنتاجية البوتاجاز من تقطير المتكثفات، وتبلغ طاقتها الإنتاجية حوالى ٣٢٠ ألف طن سنوياً.

كمان من المخطط بدء تجارب التشغيل للمشروع خلال ديسمبر القادم، وده بيعتبر إنجاز جديد في ملف الطاقة، لأنه هيسد احتياجات قطاعات كتيرة بتستخدم البوتاجاز وبالتالى هتزيد إنتاجية البنزين عالي الاوكتان بمنطقة السويس.

كل ده.. هيساهم بالتأكيد في استدامة تأمين احتياجات السوق المحلي وقطاعات الدولة الاقتصادية من المنتجات البترولية وموارد الطاقة المختلفة.. واللي هو الهدف اللي الدولة بتسعى لتحقيقه دلوقتي وده كله في النهاية هيوفر الدولار والاستيراد