53 مليار دولار.. قفزة في خميرة البنوك من الدولارات
إيه حكاية التدفقات الدولارية الجديدة في البنوك المصرية وياترى البنوك فيها كام مليار دولار وبتوع إيه وإيه الرسالة اللي المركزي عاوز يبعتها لتجار العملة والأزمات والمضاربين.. تابعونا للأخر وشوفو الفيديو للاخر هتعرفوا التفاصيل
زي ما احنا عارفين على مدار الايام اللي فاتت أسعار الدولار ارتفعت بشكل كبير ومتواصل في البنوك واللي هي السوق الرسمي لتداول العملة واقترب الدولار من حاجز الـ49 جنيه بعد ما سجل 48.80 جنيه كأعلي سعر في تعاملات امبارح الاحد ومع صعود العملة الامريكية المتواصل طلعت اشاعات كتير عن الدولار ومنها إن البنوك خلاص مش لاقية العملة وإن أزمة 2023 راجعة من تاني وفيه اللي قال إن المركزي خلاص هيعوم الجنيه تاني ويخفض قيمته أمام الدولار وفيه اللي كان بيحلم وصحي وقال يا جماعة دي السوق السودا رجعت تاني..
طبعا كل الكلام ملهوش أي أساس من الصحة واجتهادات فارغة وسوق الصرف ومفيهوش أي مشكلة وبالعكس زيادات الدولار بتأكد إن فيه سياسة سعر مرن في السوق وإن العرض والطلب هو اللي بيحدد السعر ومفيش اي تدخل من الحكومة أو البنك المركزي والأهم إن فيه طلب زيادة على الدولار ودي حقيقة لكن في نفس الوقت المركزي معندهوش أزمة في التدفقات الدولارية ودي أهم حاجة في السوق عشان يفضل دايما فيه سيولة.
طيب إيه الجديد في ملف الدولار في البنوك؟
شوف حضرتك عشان تعرف إن مفيش أزمة دولار في البلد وإن المؤشرات المصرية المالية قوية جدا الدولار بيانات البنك المركزي الحديثة واللي صادرة من ساعات كشفت عن قفزة في ودائع المصريين بالعملات الأجنبية بأكتر من ملياري دولار خلال 6 أشهر بس.
وحسب البيانات ارتفعت الودائع بالعملات الأجنبية غير الحكومية في بنوك مصر بنحو 2.41 مليار دولار خلال النص الأول من العام الحالي، لتصل إلى 53.03 مليار دولار بنهاية يونيو اللي فات، مقابل 50.61 مليار دولار بنهاية 2023، وفقا لأحدث بيانات عن البنك المركزي المصري.
وكشفت البيانات كمان إن البنوك المصرية تلقت مدخرات أجنبية بقيمة 1.36 مليار دولار خلال يونيو الماضي لوحده، وبكده زادت أرصدة الودائع بالعملة الأجنبية من 51.67 مليار دولار في مايو 2024، إلى 53.03 مليار دولار في يونيو الماضي، وهي الزيادة الأعلى منذ بداية العام الحالي.
البنك المركزي المصري، سبق وكشف في تقريره الشهري، عن وصول حجم الودائع تحت الطلب بالعملات الأجنبية إلى 12.92 مليار دولار، في وقت بلغ حجم الودائع لأجل وشهادات الادخار حوالي 40.11 مليار دولار.
أما عن السر في زيادة تدفقات ودايع المصريين بالعملات الأجنبية فدا راجع لمضاعفة تحويلات المصريين في الخارج - أكتر من مرة من مايو اللي فات مقارنة بالشهور السابقة للتعويم، ودا ساهم بشكل كبير في النمو الملحوظ للمدخرات الأجنبية في البنوك ودا اللي بيقولوا خبراء البنوك واللي أكدو كمان إن كتير من عملاء البنوك بدأوا في إعادة استثمار الودائع والشهادات البنكية بالعملات الأجنبية، مع اقتراب مرحلة خفض سعر الفايدة خلال الشهور المقبلة.
وبنفكركم إن تحويلات المصريين العاملين بالخارج قفزة خلال مايو اللي فات بمعدل نمو 73.8% على أساس سنوي، لتصل إلى 2.7 مليار دولار، مقابل 1.6 مليار دولار خلال مايو 2023.
وأهل الاقتصاد شايفين إن استمرار الثقة في القطاع المصرفي المصري يحفز العملاء على استثمار محافظهم بالعملات الأجنبية في النطاق الرسمي، وإن قرارات الإصلاح الاقتصادي اللي بدأت الحكومة والبنك المركزي تنفيذها من مارس اللي فات، ساهمت في وقف تسرب العملة الأجنبية واستعادة الجزء الأكبر من التدفقات للداخل.
