الدولار والشركات بتخزن عشان ترفع الأسعار .. إزاي ظهرت السوق الموازية في الأدوية

ازمة نقص الأدوية الموجودة في السوق المصري بقت منتشرة وللاسف طالت أنواع كتيرة من الأدوية لحد ما وصلت للأدوية العادية سواء نزلات البرد وغيرها من مختلف الأدوية اللي بتعالج الأمراض العادية.. ياتري الازمة وصلت لفين وأسعار الادوية وصلت لفين وايه اسبابها 
 

سوق الدواء المصري حاليا بقي بيعاني اشد معاناة من نقص انواع واصناف كتيرة جدا من الأدوية خصوصا الأدوية الحساسة زي ادوية علاج امراض السكر والضغط والأورام وغيرها من الامراض اللي ربنا يحفظنا ويحفظ حضراتكم منها، ولكن للاسف لحد اللحظة دي الدولة مش عارفة تسيطر علي الأزمة دي ولا عارفة تحط لها نهاية ولا قادرة تتحكم في الأسعار، وحاليا في مرضي كتير مش لاقيين العلاج ولو لقوه مش قادرين يدفعوا سعره.
طيب اية هيا حكاية نقص الادوية الموجودة في السوق ؟.
الدكتور على الغمراوي رئيس هيئة الدواء المصرية، طلع واتكلم عن ازمة نقص الأدوية في السوق المصري، وقال ان الدولة حاليا بتحاول تحل الأزمة الموجودة في نقص الادوية في السوق المصري وبدأت تدبر العملة الأجنبية لاستيراد المواد الخام اللي بتدخل في صناعة الدواء، بالإضافة إلي أن الدولة بدأت تعيد النظر في تسعير بعض الأدوية المهمة بعد تحرير سعر الصرف.
رئيس هيئة الدواء اتكلم كمان عن أهم العقبات اللي الدولة واجهتها في الايام اللي فات واللي للاسف كانت سبب رئيسي لارتفاع اسعار الأدوية في السوق المصري زي محاولة بعض شركات الادوية والصيدليات تخزين كميات بتزيد عن الاحتياج الفعلي علشان يعملوا سوق موازية لتداول الأدوية ويحصل نقص في السوق ويكون في طلب متزايد وبعدين يقوموا اعادة طرحه بسعر أعلى عن الاسعار الرسمية.
الدكتور علي الغمراوي قال كامن أن سوق الدواء المصري عايز 100 مليون دولار شهريا علشان يستورد بيها المواد الخام ومستلزمات الإنتاج اللي بتدخل في صناعة الدواء، وأن المادة الخام اللازمة لصناعة الدواء بتتوفر من 4 إلى 6 أشهر في مصانع الأدوية كمخزون، وبتقعد لمدة شهرين في التخزين في المصانع وبتفضل لمدة شهر بعد تصنيعها في الصيدليات وبكده بيكون مدة المخزون الاستراتيجي للأدوية بيوصل لـ 7 شهور.
رئيس هيئة الدواء اتكلم كمان وقال ان 85% من المواد الخام اللي بتدخل صناعة الادوية يتكون مستوردة من الهند والصين، وصناعة الدواء في مصر لها خصوصية مش زي أي سلعة تانية، وإجراءات شراء المادة الخام بتأخذ وقت، ده غير أن شركات الأدوية بتشتري اكثر من 4 آلاف مادة فعالة ومش كل مصانع الهند والصين بتوفرهم، وصناعة الدواء بتحتاج إلي  وقت طويل علشان توصل للمواطن خصوصا مع الإجراءات الرقابية وبعدها التصنيع وتحليل الدواء واللي بياخد وقت علي توصل للمواطن في الصيدليات.

الغمراوي اتكلم كمان عن زيادة اسعار الأدوية وقال أن مفيش زيادة في سعر دواء زي التاني، والدواء اللي بيعالج الصداع المادة الفعالة فيه بتختلف غير الدواء الثاني، ومفيش سعر زي التاني والزيادة بتكون  حسب نسبة المكون الدولاري الموجود جوا العلبة.
الغمرواي قال برضوا ان مستحضرات التجميل الدوائية فيه نقص شديد قوي في السوق، وفي أكثر من 15 ألف صنف مسجل في هيئة الدواء، والنقص موجود في 81 مستحضر بس في السوق .