إزاي الأسعار والايجارات تضاعفت في سنة واحدة.. إيه اللي بيحصل في سوق العقارات

هو سوق العقارات رايح على فين وازاي الاسعار والايجارات اتضاعفت خلال سنة واحدة بس يعني زيادة 100% خلال 12 شهر بس.. وايه علاقة اللاجئين بالفوضي اللي في السوق ولو مصر مابنتش المدن الجديدة كان ايه اللي حصل.. خليكم معانا للأخر وهنعرف التفاصيل في الفديو ده.

من حوالي سنة تقريبا كانت الأمور معقولة في سوق العقارات لكن فجأة بدأت تصعد وتزيد بشكل كبير لغاية ما وصلت في بعض الاوقات إلى 175% زيادة عن الاسعار اللي كانت موجودة وهنا احنا بنتكلم عن العقاراات في القاهرة الكبرى يعني قاهرة وجيزة وقليوبية ودا لأن دا غالبا السوق اللي عليه تركيز أكتر.
طيب ايه سبب الزيادة الكبيرة دي في اسعار الشقق والمحال والوحدات الادارية وفي الايجار كمان؟
طبعا سبب اساسي في الزيادة دي وكلنا عارفين هو موجة تدفق اللاجئين على مصر من السودان واليمن وليبيا وفي البلاد اللي فيها مشاكل وصراعات وطبعا أغلبهم إذا مكانش كلهم بيفضلو يسكنوا في محافظات القاهرة الكبرى التلاتة عشان يبقوا جمب قرايبهم أو عشان الخدمات أفضل أو لأي سبب ولما نتكلم في موجة من مئات الالاف من الأسر الجديدة اللي بتدور على سكن طبيعي الاسعار تقفز لاكتر من الضعف ولأن السوق عرض وطلب طبعا الاسعار والايجارات وصلت المريخ والنتيجة الناس المصريين مش لاقيين شقق في الاماكن دي بسبب زيادات الايجارات الكبيرة والأصعب إن ملاك الشقق اجبروا ناس تسيب شققها قبل أو مع انتهاء عقد الايجار عشان تأجرها بالغالي للاجئين ودا حصل ولسه بيحصل.
القصد مصر عمرها ما رفضت لاجئ ولا عملت مخيمات في الصحرا لكن في نفس الوقت احنا قدام مشكلة كبيرة بيعاني منها الناس المصريين وهنا الحكومة لازم تدخل لأن الاسرة المصرية الي كانت بتدفع الفين جنيه ايجار في شقة مطلوب منها 10 الاف جنيه دلوقتي ولو مش هتدفع فيه غير سودانيين ويمنيين قادرين يدفعوا وتقدر تتخيل طبعا حجم معاناة الاف الأسر المصرية اللي ارتبطت بالاماكن اللي مستأجرة فيها شقق من سنين وغير مدارس الولاد والشغل والجيران وفجأة حياتهم تتقلب عشان القفزة الرهيبة في اسعار الشقق او الايجارات.
حسب الارقام والدراساات الرسمية شهد سوق الإسكان في مصر ارتفاع غير مسبوق في أسعار البيع والإيجارات، مدفوع بمزيج من انخفاض قيمة العملة وارتفاع التضخم وقال تقرير حديث إن منطقة  زي السادس من أكتوبر، ارتفعت أسعار البيع فيها 175% سنويا في الربع التاني من  2024، ووصلت الزيادة ف القاهرة الجديدة  180% على أساس سنوي، كمان وصلت الزيادة في سوق الإيجار بأكتر من 122%  في الربع التاني من 2024 يعني بنتكلم في شهور قليلة أومال باقي السنة والسنين اللي جاية الاسعار هتوصل فين؟.