بعد 48 ساعة.. أول مراسم من نوعها في تنصيب الحكومة الجديدة

 
 
ياترى ايه اللي هيحصل بعد 48 ساعة من دلوقتي وايه المراسم الجديدة في اعلان الحكومة الجديدة وحلف اليمين وياترى الحكومة هتحلف اليمين فين .. اقرأ التقرير التالي وهتعرف كل التفاصيل والمفاجات خليكم معانا 
 
الكلام كتر اووي عن تأخر إعلان الحكومة الجديدة واللي قرب على 30 يوم من ساعة الرئيس السيسي ما كلف الدكتور مصطفى مدبولي بإعادة تشكيل الوزارة الجديدة بعد تقديم استقالة حكومته الحالية بعد حلف الرئيس لليمين الدستورية للولاية الجديدة لدرجة طلع كلام إن الرئيس السيسي عدل عن تكليفه لمدبولي بتشكيل الحكومة الجديدة وإن مدبولي هيستني لغاية ما يعدي 40 يوم من تكليف الرئيس من غير ما يعلن التشكيل عشان يسقط دستورياً حقه في تشكيل الحكومة لكن الكلام مش صحيح.
اومال إيه حصل وهيحصل ؟
شوف ياسيدي الدكتور مدبولي الرئيس أعاد تكليفه بالوزارة في ظروف صعبة جدا مرت بيها البلد وبنقصد هنا أزمة انقطاع الكهرباء وتخفيف الأحمال والغضب الشعبي بسبب قطع الكهربا في الموجة الحارة جدا اللي بتمر بيها البلد ومدبولى كان مشغول بحل الأزمة خاصه بعد توجيهات الرئيس للحكومة الحالية بالبحث عن حلول منطقية لحل مشكلة تخفيف الأحمال وقصرها في أضيق الحدود وطلع بعدها مدبولي في مؤتمر صحفي وأعلن عن إجراءات جديدة للسيطرة على الأزمة ورغم كده الدكتور مصطفى مدبولي مكانش بينام تقريبا لانه كان مشغول بردوا باختيار وزراء الحكومة الجديدة وقابل عشرات الشخصيات المرشحة لكل وزارة عشان في الاخر يختار وزراء أكفاء ومختصين وخبراء كل في مجاله حسب توجيهات الرئيس واللي طلب من مدبولي إن أول حاجة يعملها في وزارته الجديدة التخفيف عن الناس في الأسعار وازمة الكهربا والإصلاح الاقتصادي.
طيب ايه اللي هيحصل بعدها ؟
المعلومات الأكيدة عندنا أن الدكتور مدبولي انتهى فعلا من اختيار الوزراء الجدد اللي هيكونوا معاه في الوزارة الجديدة وهي اسماء مفاجأة وأغلبها شخصيات مرموقة في مجالها وإنه هيتم الاعلان عن تشكيل الحكومة الجديدة في مراسم خاصه بتحصل لاول مرة وإن الحكومة هتحلف اليمين في القصر الجمهوري الجديد في العاصمة الإدارية أمام الرئيس السيسي وإن دي اول حكومه تحلف اليمين في القصر ده ودي رساله للجميع أن مصر بدأت عصر جديد والمعلومات بتقول كمان إن الأجهزة المختصة عملت بروفة على مراسم اعلان الحكومة الجديدة وحلف اليمين أمام الرئيس وهتكون سابقة محصلتش قبل كده وفي حدث هيكون على قدر قوة مصر الحديثة ومكانتها.