أسباب إنفجار أزمة تخفيف الأحمال.. شوف اخر التطورات

 
 
الأيام دي مفيش كلام غير علي تخفيف الاحمال وقطع الكهرباء اللي بيحصل كل ساعة والتانية، وهل الموضوع ده هيستمر كده ولا الدنيا هتكون عاملة ازاي في الشهور اللي جاية 

من شهور طويلة والحكومة عندها أزمة كبيرة قوي في موضوع قطع الكهرباء او تخفيف الاحمال واللي بيتم علي أساسه قطع الكهرباء بشكل دوري علي كل محافظات الجمهورية وكانت البداية بالقطع لمدة ساعة واحدة وبعدين بقت ساعتين ووصلت ل 3 ساعات في وقت فيه درجات الحراره بتكون مرتفعة جدا.
وعلشان نكون عارفين أية هيا المشكلة من البداية لازم نعرف ن مصر معندهاش اي ازمة في موضوع محطات توليد الكهرباء وعندنا محطات توليد كهرباء عملاقة جدا زي محطات الكريمات في بني سويف والبرلس ومحطة العاصمة الإدارية واللي الدولة دفعت فيها مبالغ مالية كبيرة جدا علشان تشيد مباني محطات توليد بالكفاءة دي .

وعلشان نكون عارفين كمان أن الحكومة مش متفاجأة بأزمة تخفيف الاحمال وعارفين من فتره طويلة أن هيكون عندنا أزمة طاقة وتوليد للكهرباء مع دخول فصل الصيف واللي معروف طبعا بارتفاع درجات الحرارة، ومكنش في اي تحركات حكومية لحل المشكلة والتعامل معها قبل ما توصل للشكل الموجود عليه حاليا، والسر الأساسي في النقطة دي هو الدولار واللي هو أساس الأزمة من البناية خصوصا أن محطات توليد الكهرباء علشان تشتغل مضبوط لازم يتم استيراد كميات كبيرة من الدولار والمازوت والغاز الطبيعي من برا واللي المحطات بتحتاجهم لتشغيل المولدات، ودول لوحدهم عايزين رقم كبير علشان يتم توفيرهم بالشكل المطلوب لتشغيل المحطات.

طيب ليه الحكومة محلتش أزمة تخفيف الأحمال واستوردت وقود تشغيل مولدات الكهرباء، خصوصا أن عندنا سيولة دولارية من صفقة راس الحكمة ؟.
مصر في الفترة الأخيرة كان عندها سيولة دولارية من صفقة الاستثمار السياحي في رأس الحكمة ولكن السيولة دي أغلبها تم تخصيصه لسداد أقساط ديون والديون مستحقة السداد خلال العام الحالي واللي بتوصل لحوالي 42.5 مليار دولار، ده غير فاتورة مصر الاستيرادية اللي الحكومة بتستوردها من برا مصر علشان توفر الاحتياجات الأساسية للمواطن المصري زي القمح والأدوية واللي بيوصل سعرها لأكثر من 3 مليار دولار شهرياً.

طيب اية اللي خلي الحكومة تتحرك بشكل مباشر الفترة دي علشان تحل أزمة الكهرباء؟.
خلينا نكون عارفين أن أزمة تخفيف الأحمال بدأت تخرج عن سيطرة الحكومة خصوصا بعد ما قطع الكهرباء دخل علي المناطق الصناعية وحاليا قطع الكهرباء عن منطقة صناعية واحدة له أضرار اقتصادية كبيرة جدا صعب تحصرها خصوصا أن المصانع دي لها تأثير مباشر علي فاتورة الدولة من التصدير واللي طبعا بيكون بالدولار ده غير التعاقدات والاتفاقيات اللي مواقعها المصانع دي مع تجار ومستوردين برا مصر واللي في حالة عدم الالتزام بيها هيكون في عقوبات كبيرة جدا علي المصانع عندنا هنا في مصر.

طيب اية اللي يخلي الدولة تستورد غاز طبيعي من برا واحنا كان عندنا غاز طبيعي وبنصدره لبرا؟.
في حاجة مهمة جداً ومعروفة لكل دول العالم وهيا أن إنتاج اي حقل أو اكتشاف بترول في العالم بتيجي عليه فترات وبيقل والمتوسط بتاع التناقص في حقول الغاز بتوصل 15% سنويًا، وحقل ظهر واحد من الحقول دي واللي بيوصل الإنتاج اليومي له ل 2 مليار قدم مكعب يومياً لكن استهلاك مصر حالياً سواء لتوليد الكهرباء أو للأنشطة الصناعية بيوصل 6.3 مليار متر مكعب في اليوم، ومصادر مصر الإنتاجية من الغاز الطبيعي بتتراوح بين 5.2 إلي 5.4 مليار متر مكعب يعني عندنا عجز متوسطة 800 إلي 900 مليون قدم مكعب من الغاز ودا بنستوردة طبعاً.

طيب اية اللي ولع المشكل بالشكل ده دلوقتي؟.
باختصار شديد ومن غير لف ولا دوران، وزارة الكهرباء عندها أزمة كبيرة جداً في موضوع سرقة التيار الكهربائي ومش عارفة تسيطر عليه، وعندنا فاقد بيتراوح بين 40 إلي 60%، خصوصا في شركة دي جنوب القاهرة لتوزيع الكهرباء واللي وصلت معدلات سرقة الكهرباء فيها لحد 60 %، ده غير العدد الكبير من اللاجئين اللي مصر استقبلتهم في الفترة الأخيرة واللي كانوا سبب تحميل مباشر علي موارد الدولة

طيب اية اللي هيحصل دلوقتي وخل موضوع قطع الكهرباء ملهوش حل؟.
لا طبعا له حل، وحاليا وزارة الكهرباء هترجع تقطع الكهرباء لمدة ساعتين علي النظام القديم لتخفيف الأحمال لمدة 3 اسابيع وبعدها هتبدا الوزارة في وضع ترتيبات انتهاء العمل بخطة تخفيف الاحمال للنهاية الا لو حصل جديد في موضوع تعاقدات الغاز وشحنات المازوت اللي الدولة تعاقدت وهتتعاقد عليه في الأيام اللي جاية من برا مصر لتشغيل محطات توليد الكهرباء.