الإثنين 15 يوليو 2024
رئيس التحرير
عمرو عامر
المشرف العام
عبدالعظيم حشيش
تحليل

الذهب على موعد مع حدث عالمي.. اليوم

الجمعة 28/يونيو/2024 - 02:20 ص
الذهب
الذهب

 

ياترى ايه الحدث اللي سوق الدهب في العالم مستنية النهاردة  وإيه مصير الاسعار العالمية وتأثيرها على الاسعار في مصر.. خليكم معانا هنعرف التفاصيل كلها
 


سوق الدهب ليه فترة كبيرة مش مستقر وطالع نازل لكن في العموم واخد منحي صعودي وده بسبب الأزمات الدولية والصراعات والتوترات واللي خلت البنوك المركزية تشتري دهب بكميات كبيرة مع استمرار التوقعات بارتفاع عمليات الشراء في الفترة الجاية لنفس الاسباب اللي قلناها وضيف عليها سبب رئيسي ومهم وهو اتجاه بنك الاحتياطي الفدرالي الامريكي لخفض سعر الفايدة على الدولار وده الحدث اللي العالم كه مستنيه وخاصة سوق الدهب لأن اي خفض لسعر الفايدة معناه ارتفاع كبير في سعر المعدن الاصفر والعكس صحيح طبعا.
طيب ايه اللي هيحصل بكرة في سوق الدهب؟
شوف ياسيدي زي ماقلنا الأسواق الدولية منتظرة الأسبوع ده لبيانات تقديرات الناتج المحلي الإجمالي للربع الأول في الولايات المتحدة  واللي هتطلع النهاردة الساعة 12:30 بتوقيت غرينتش، وكمان الاسواق مستنية تقرير بيانات تضخم نفقات الاستهلاك الشخصي واللي هتصدر بكرة الجمعة والحاجتين دول مهمين جدا لأنهم مع بيانات التضخم وهما اللي بيحددوا سياسة الفدرالي بخصوص سعر الفايدة سواء بالتخفيض أو التثبيت أو الرفع ولو جت التقارير بتاعتهم ايجابية فدا بيزود احتمالية إن الفدرالي يخفض الفايدة حتى لو بنسبة صغيرة لكن هتكون بداية لنهاية عصر التشدد النقدي واللي أرهقت العالم كله لان الدولار عملة تداول عالمية.
نرجع لسوق الدهب المصري ايه علاقته باللي هيحصل بكرة؟
أكيد طبعا اي حاجة بتحصل في سوق الدهب تحديدا بيكون ليها تأثير على السعر العالمي للدهب وبالتالي على السوق المصري لأنه بيستورد الدهب بالدولاروفيه نسبة وتناسب بين الأسعار هنا وهناك لان الدولار بيحدد سعر الدهب هنا في الصاغة المصرية بردو زي ما بيتحكم فيه في الاسواق الخارجية وأكيد ده كمان ولو حصل والبنك الفدرالي الامريكي خفض سعر الفايدة هيحصل ارتفاع كبير في سعر المعدن الاصفر في مصر لان ساعتها سعره العالمي هيزيد بشكل كبير جدا لأن الدهب زي ماقلنا ماشي عكس الدولار ولو بدا بنك الاحتياطي الفدرالي سياسة التخفيض هيحصل هجوم شرس على سوق الدهب العالمي لأن البنوك المركزية هتحاول تعوض خسارة الدولار في الاحتياطي النقدي بشراء المعدن النفيس اللي قيمته فيه.
كل التوقعات اللي بتصدر من مؤسسات دولية بتقول إن الشهور الجاية كلها لغاية سنة 2025 الدهب سعره هيزيد بشكل كبير سواء عالميا أو محليا بسبب حالة التوتر الكبيرة في الاسواق الدولية.