الحكومة ناوية على إيه مع المواطنين في العيد الكبير
العيد باقي عليه ساعات وكل سنة وحضراتكم طبيبين.. وقبل العيد الناس بتسأل ياترى الحكومة ناوية على ايه للمواطنين وايه القرارات اللي هتاخدها عشان يبقي العيد فرحة.. هنشوف مع بعض اللي هيحصل في الفيديو ده.. خليكم معانا.
الحكومة قدمت السبت عشان الأحد يعدي على خير واللي هو فيه يوم العيد والسبت اللي قدمته الحكومة للمواطن هو تبكير مواعيد صرف المرتبات للموظفين في الجهاز الاداري للدولة وكمان لأصحاب المعاشات وبرامج تكافل وكرامة عشان ناس يبقي معاها فلوس لمصاريف العيد الكتير..
طيب الحكومة ناوية على ايه تاني عشان تصالح المواطن؟
تاني حاجة الحكومة هتعملها هي وقف العمل بتخفيف الاحمال وقطع الكهربا في ايام العيد وده لأن العيد جاي في ذروة موجة حارة والناس مش هتستحمل الاجازة بتاعتها تعدي بأزمات وتعكنن عليهم فرحة العيد وده غير إن فيه سلع كتير هتكون في التلاجات ومش هتستحمل الكهربا تقطع في الحر ده وتعرضهم لخساير كبيرة.
طيب فيه مفاجآت تانية ممكن الحكومة تعيد بيها على المواطن؟
اكيد فيه اجراءات تانية الحكومة هتنفذها عشان اجازة العيد تعدي على خير زي ضبط الاسعار والاسواق والسيطرة على ممارسات الاحتكار وفيه كلام ووعود حكومية إن اسعار سلع كتير هتنزل في ايام وقبل العيد على طول ومنها اسعار الدواجن واللي هتننزل بشكل كبير.
الحكومة كمان هتاخد اجراءات تانية لكن هتكون ممتدة لبعد العيد زي متابعة المخزون السلعي والاسعار اللي عليه في المحلات والبقالة وحسب المعلومات والتصريحات الحكومة هتزود معارض البيع الخاصة بيها بعد توجيهات الرئيس السيسي بالسيطرة على الاسعار بشكل دايم وبيعها بأسعار معقولة للمواطنين والحقيقة ده ملف مهم جدا وتكليف مباشر من الرئيس والحكومة زي مااتقال بدأت فيه فورا وفي الفترة الجاية متوقع تكون فيه نتايج ملموسة.
المفاجأة الاخيرة اللي الحكومة ممكن تفاجيء بيها المواطنين هي إنها تثبت اسعار البنزين والمواد البترولية ومترفعش سعرهم لأن الظروف الاقتصادية لاتسمح بزيادة جديدة في الاسعار لان زي ماقلنا كتير لو البنزين والغاز والسولار سعرهم زاد أغلب أنواع السلع هتزيد بسبب زيادة تكلفة الانتاج.
