الجمعة 14 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

مدبولي هيجيب 30 مليار دولار استثمارات منين.. أول اختبار صعب للحكومة الجديدة

الأربعاء 05/يونيو/2024 - 12:40 ص
الدكتور مصطفى مدبولي
الدكتور مصطفى مدبولي رئيس مجلس الوزراء

 

 
خلال أيام هيتم الاعلان عن التشكيل الوزاري الجديد برئاسة الدكتور مصطفى مدبولي وبعدها مصر هتبدأ مرحلة جديدة وفي وقت عندها أزمات اقتصادية وتحديات كبيرة.. ياترى ايه الملف الاصعب اللي بيواجه حكومة مدبولي التانية وهيجيب 30 مليار دولار في السنة استثمارات منين.. تعالوا نشوف إيه الحكاية .
 
لو تابعت في الساعات اللي فاتت وزير المالية الدكتور محمد معيط قدم  البيان التمهيدي للموازنة في مصر إلي مجلس النواب واللي حصلت على موافقة  البرلمان،  والحقيقة الموازنة كان فيها ارقام كتير مهمة زي مثلا إن الدولة عندها خطط لاحتواء معدل التضخم لما يتراوح بين 19  و25 في المية خلال السنة المالية نفسها ومن الأرقام المستهدفة في الموازنة الأخيرة جذب استثمارات أجنبية مباشرة بحوالي 30 مليار دولار في السنة المالية الجديدة واللي بتبدأ في أول يوليو وتنتهي في اخر يونيو كل سنة.
وهنا هنتكلم عن الرقم 30 مليار دولار واللي الحكومة قالت إنها هتحققه في الاستثمار المباشر وعشان نعرف قد ايه الرقم ده كبير وطموح خلينا نقولك إن صافي تدفقات الاستثمار الأجنبي المباشر  في مصر وصل 10 مليار دولار في نهاية العام المالي اللي فات يعني احنا بنتكلم في 20 مليار دولار جديدة تعهدت الحكومة بجذبها للسوق المصري في ملف الاستثمار المباشر والرقم ده لو تتحقق طبعا هيكون ليه تأثير مباشر على كل القطاعات الاقتصادية اللي عندها أزمة بسبب الدولار أو تدفق العملات الأجنبية .

وعلى فكرة رقم 30 مليار دولار استثمارات المستهدفة ده بعيد عن  الاستثمار في النفط أو الاستثمار غير المباشر في أدوات الدين من أذون خزانة وسندات وغيرها وده معناه إن حكومة مدبولي التانية عندها تحدي مهم جدا في قطاع الاستثمارات المباشرة وده كان واضح جدا في التكليفات الرئاسية للحكومة الجديدة وإن اللي جاي كله لازم يكون بيعتمد بشكل أكبر عن ضخ المستثمرين للأموال في الأسواق المصرية بعيد عن الاقتراض والمنح وغيرها من الموارد اللي لتشكل ضغط على الدولة ومصر حسب أهل الاقتصاد عندها فرصة كبيرة جدا لجذب مليارات الدولارات الاجنبيه من خلال ميزة انخفاض العملة المحلية واللي بتعتبر ميزة كبيرة جدا للمستثمر لأنها بتقلب تكلفة المشروعات مقارنة بأسواق تانية في المنطقة.

كمان مصر عندها قطاعات تقدر تجذب مليارات الدولارات كل سنة  زي مشروعات قطاع الطاقة والطاقة الخضراء واللي الحكومة وقعت فيها اتفاقيات ل 8 مشروعات باستثمارات إجمالية خلال 10 سنوات هتوصل إلى 50 مليار دولار، وبدأت الشركات إنشاء هذه المشروعات ومحطات الطاقة.. كمان مصر فيها كنز تاني تخلي اي مستثمر يجي عندنا  وهو القطاع العقاري و القطاع الصناعي والقطاعين دول بالذات عليهم العين في الفترة الجاية لأن فعلا تم ضخ  استثمارات ضخمة فيهم بعد طرح الحكومة الحالية لحوافز استثمارية وضريبية واهتمام الدولة بتشجيع الاستثمار في هذا القطاع لأهميته في نمو الاقتصاد المصري،ودعم تعميق صناعة المكون المحلي في مصر..... كمان مصر عندها  القطاع الزراعي و تكنولوجيا المعلومات واللي متوقع يتم فيهم استثمارات كبيرة في الفترة الجاية ده غير طبعا القطاعات التانية اللي في مصر واللي ممكن تقلب موازين الاستثمار في المنطقة كلها مش في مصر بس زي الإمكانيات الواعدة في القطاع السياحي والمشروعات الضخمة اللي بتعمل وفي المواني واللوجستيات وغيرها وعشان كده الاستثمار المباشر هو الحل السحري لكل أزمات مصر الاقتصادية.